الدايم الله والمخاليق نفّاد
سنة عظيم دبّر اللي يريده
والموت حكم الله ماعنه ردّاد
نرضى بحكمه والسبايب عديده
والفقد غالي ماله اشباه وانداد
عز الله انّه راح شيخٍ وليده
فقداه ما هي تقتصر عزوة كناد
والله ولا بتخصّنا ياعبيده
فقدٍ على الحكام والحضر والباد
وفقدٍ على من ينتمي للعقيده
وفقدٍ على قحطان من نجد الى براد
شيخ جمع كل الصفات الحميده
مواقفه تذكر وبافعاله يشاد
ولسانه اسطى من سيوف حديده
يبكيه سيف ومنسف وبشت وشداد
ويبكيه ختم يحتري لمسة ايده
ويبكيه مسجون له اعوام بقياد
واللي مجلّى في ديارٍ بعيده
والحزن ساد بكل الأنحا والأبعاد
وكل يقول الشيخ عايض فقيده
هو ظاهرة ذا الوقت ما اظن تنعاد
شيخ حكيم له حلولٍ سديده
انا أشهد انه حاز نعم وبنى أمجاد
ومخلّدٍ تاريخ ما احدٍ يبيده
فيالله عسا الجنات له خير ميعاد
ولا وزنت الأعمال يرجح رصيده
ويالله ترفع منزله يوم الاشهاد
في ساعة ما أحدٍ قريبه يفيده
واختامها بعداد ماحن رعاد
صلوا على المختار صفوة عبيده

الشاعر / زيد بن وازع الجرابيع

__________________