النصايح الجزء الأخير

السلام عليكم ورحمة الله وبركاته

بعد أن وصل بطلنا إلى حدود ديرته اللي تركها قبل قرابة 18 سنه وبعد

أن أنقذت النصيحة الأولى حياته و الثانية بعد توفيق الله جابت الرزق الوفير

وصل ووجد على حدود الديره بعض الرعاة وسألهم عن أحوال العرب

عن من مات ومن اللي بعد حي ولا فاده الرعيان بشي خلا البل عندهم

يحرسونها مقابل بعض الدراهم وأخذ الأشياء المهمه ونشد عن بيت عمه وعرف

إنه مات دلوه عليه وصلهم تالي عشي قرب من البيت والا هالرجال طول وعرض

وراعي ترحيبة حاره وملقى يشرح الخاطر .. فرش له فراش زين وقربه من

الضو اللي شعبها وقرب منها الدلال والأباريق وأفتر وراء البيت شوي

ولا مقرب الشوايا وتراحيب اللي ما وقفت ومضاحكة ضيفه وتوسيع

خاطره بالسوالف الثمره والطرايف النادره... صلوا المغرب وتقهووا وقبل

العشاء تعشوا.... شاف الجنوبي من كرم هذا الشاب الشي الكثير..... زاد

عليه كرم الأخلاق والمعاملة ...وماغير عليه إلا المرأة اللي لمحها آخر الليل

تقرب من المعزب شي طلبه.... هذي بنت عمه !! ما قال شي فرش له

فراش حتى ينام .... يوم قده في فراشه .." خانت العهد .. ما رقبنتي وهي

اللي عاهدتني ما تزوج بعدي !!" انا اللي تعبت وشقيت وتغربت علشانها

هذا جزاي " وقعد ليله ياكل في عمره والشيطان ينفخ في صدره لين قرر

قتلها هي ورجالها .... قام من فراشه يتسحب لين طل عليهم من فوق القاطع

اللي قاسم البيت وسدد بندقه عليهم يبي يذبحهم وفي هذي اللحظه تذكر .....

النصيحة الثالثة اللي شراها بعشر من البل تذكرونها طبعا ؟؟

تعوذ من الشيطان ورجع لفراشه ورقد نوم الله يعلم به ..وقبل الفجر حس

براعي البيت يشب الضو ويقرب منها كل ما يلزم ويدفي ماء للوضؤ نبه

ضيفه للصلاه في مصلى قدام البيت وبعد الصلاه رجعوا للبيت يتقهوون

ويفطرون وفي هذه الأثناء نادى راعي البيت .. يمه .. يا الغاليه .. تبين

قهوه ؟؟.. ردت عليه بصوت ياله ينسمع بالإيجاب .. بعد لحظات ذهول

سأل الجنوبي راعي البيت هذي أمك ؟؟ جاوبه " نعم " حمد الله الجنوبي

إنه ما إرتكب غلطه عظيمة وإبتلى بدم هذولا العرب الكرام اللى كاد أن

يتسرع لولا لطف الله وتأخيره باللى نوى يقدم عليه ... وبعد أن هدت

نفسه سأل الشاب .....أمك إسمها فلانه ؟؟؟.. وبإستغراب شديد !!!!

"" كيف عرفت إسم أمي ؟؟"" قال الشاب .. قاله الحين تعرف ..إدعها

نادا الشاب أمه وجلست وراء ولدها سالها الضيف أنت" فلانه" قالت له

نعم .. من أنت ؟؟ قال "دققي " ؟؟ دققت .. ما عرفته هنا سنين طويلة

راح منهم ولد أمرد واليوم شنبات ولحيه قد فيها شيب وبنيه ضخمه يحق

لها ما تعرفه قالت " ما عرفتك " قال " انا فلان" أغمى عليها من شدة

الفرح وبعد لحظات إستعادت وعيها وقامت اتحقق ودور علامه ميزه

تعرفها فيه وتأكدت إنه ولد عمها بكت بكاء شديد من الفرح والرجال

يبكي لأن الله رحمه بتذكر النصيحة الثالثة ... وبعد السلام والعتاب ...

وشوي بكاء وشوي ضحك وفرحه عارمه ...وعلمته بأنها بعد ماتركهم بأيام

عرفت إنها حامل وإن هذا الشاب ولده وإن أبوها مات قبل سنوات قليله

حمد الله كثيرا وشكره على نعمه الكبيرة والكثيرة وتوفيقه لشراء هذه النصايح

اللي أنقذت حياتة و أنقذت حياة زوجته وولده ....

تسوى النصايح الثمن اللي شراها به...... تسوى أضعاف ثمنها كثير

واليوم النصيحة بلاش ولا تعجب ومرات تسمع رد ما توقعه من اللي

تنصحه ... وكأنك مخطي ومرتكب إثم والعياذ بالله

وأرجوا أن تعم الفائدة المنشودة

وسلامة الجميع





ابوعابر

مرحبا يا بو عابر ..

قصة من أجمل القصص ..

فيها الكثير من الحكم والعبر ..

لاهنت أخي الغالي ..

__________________
:: سبحان الله وبحمده :: سبحان الله العظيم ::

شـبـكـة قـحـطـان * الموقع الرسمي لقبيلة قحطان *

../ اعتذر لقلّة تواجدي ومشاركاتي في المنتدى وذلك لظروف الاختبارات ، لا تنسوني من صالح دعائكم /..

ارحب يا مشاري...

اسعدني مرورك ....

كما أسعدني متابعتك للقصه...






ابوعابر

شكرا للجميع





ابوعابر