افــضــل مــايــقـــول مــن يــتــقــدم الصــفـــوف

السلام عليكم ورحمة الله وبركاته
واسعد الله اوقاتكم بكل خير


اخواني ابناء قبيلتي العزيزه ابناء عمي نبغى نستفيد من بعض ولا فيها شي


نبغى مجموعة من افضل ماينقال بعد التحويله عند تقديم العلم والنفعه في الزواجات اوغير الزواجات

لانه كثر الكلام وبدأو الناس ينوعون فيه ويدخلون عليه بعض القصيد فنبغى نشوف الموروث والجميل
وسلامتكم




على سبيل المثال سرتوا في مثل ذا الشوف وجعله على مايرضي رب العالمين جيناكم ومعنا لكم مبلغ ( )
انهو كثير فتستاهلونه وانهو قليل فسمنوه وسلامتكم

عليكم السلام ورحمة الله وبركاته :

ارحب يانشمي القحطاني والله يحييك ويحيي علمك..

في العادة يكون العلم مقسّم إلى ثلاثة محاور رئيسية :

1. الحمد والثناء لله سبحانه في تيسير هذا الزواج ( او الاجتماع ) .
2. الدعاء للحاكم .
3 . التعريف بالوفد ( أي ان يقوم المتحدث بالتعريف بمن حضر معه وبيان مبلغ العطاء أو النفعة بمعنى مرادف )

ويكون بالمثال التالي :

يأتون الضيفان بهذا الزامل :

[poem=font="Simplified Arabic,4,black,bold,italic" bkcolor="transparent" bkimage="" border="none,medium,gray" type=4 line=0 align=center use=ex num="0,black"]
ياسلامي عليكم يالسيوف الصقيلة = لابتن من حربها يشتكي جورها
ياخوين وصل داعيك لازم نجيله = واجبن مثل شمسن شارقن نورها [/poem]

ثم يقومون المضيفين بالترحيبب بقولة مرحبااااا بكم ( مع مد الكلمتين السابقتين ) ثم يقولون بعدها ارحبوا يارارجال ارحبوا ( وبعض القبائل يقولون ارحبوا ياضفان الله يحييكم بصوت جماعي )

ويرد المتحدث عن الضيفان بقوله :

عافاكم الله / السلام عليكم ( وبعض القبائل يردون بصوت جماعي بقولهم سلمتوا والسلام عليكم )

فيرد المضيف التحية ويبدأ بالكيفنة ( مع انها في السابق تكتفى بكلمتين إلى ثلاث فقط وهي كيفنتوا طيبين كلن وحاله وبعض القبائل يبدلون الكلمة الأخيرة ب ماجورين )

المضيف : كيفنتوا / فيرد الضيف : عافيكم أو سلمتوا

المضيف : طيبين / الضيف : طاب الله فيكم

المضيف : ماجورين / الضيف : الله يعافيكم أو جاركم الله .. الخ واذا كانت الكلمة ( كلن وحاله فردها : لا حال بكم شر )

( وهناك كلمة قليلة الاستخدام وتكاد تخص أناس معينين الا وهي : يامسوي وردها : اسو النا والهم )

ثم بعد ذلك يقوم الضيف بتكرار الكلمات التي قالها المضيف له ( كيفنتوا طيبين ماجورين ) ويقوم المضيف بنفس الاجابة التي اجابها الضيف في الاوله ..

وبعد ذلك يقول المضيف تفضلوا الله يحييكم فيقول الضيف التالي :

اعفاكم وطولة ابقاكم على طاعته

الاوله : نحمد الله يوم اهبنا مسلمين والله يعز الاسلام وينصر المسلمين ويديم علينا الامن والامان والستر والعافية ..

الثانية : فالله يقر قرار بن سعود والله يديم حكمه ويمد عمره على طاعته ومن يسمع والله يرزقه البطانه الصالحة الناصحة ..

الثالثة : جتنا دعوة من ( نشمي المغيدي ) ولا جالنا عذر في الوصول جينا مسلمين ومباركين ومهنين والله يبارك له ويبارك عليه معنا عطى الله يعطينا واياكم ارضاه بسمنا يآل جبار من آل معمر عبيدة بواقع 20000 ريال انهي كثيرة تستاهلونها وان هي قليلة فسمنوها وسلامة ذا الوجيه ..
( والبعض يستبدل الجملة الأخيرة وهي انهي قليلة فسمنوها بقولة : انهي قليلة : فالجابر رب العالمين ثم النسب أو الاخوة أو المعزة أو ...الخ )

ثم يقوم المضيف بالرد : تسلمون ولاتندمون والله يحييكم ويحيي عطاكم والله ان مجيكم اكبر عطا والله يقدرنا على رد الجميل في غير باير ولا جاير والله يجعلكم ذخر لمقابيل الايام .. ويستلم النفعة من الضيف.. ويقوم بالسلام على الضيوف واحد تلو الآخر ويقلطون الضيفان بعدها ..





مجرد مثال ..






واعفاك ومن يقرا











وفقك الله ومن يقرا لما يحب ويرضى











أخوك :
أبومسفر القحطــــــــــــــــــــــاني

__________________
يالله إنـي طالبـك عـفـو وغـفـران وسـمـاح = ياللذي تجزي علـى الحسنـه بعشـر أمثالهـا
هـذي الدنـيـا ماتـسـوى لا تـعـب ولا كـفـاح = دام مـاهـي دار خـلـد لـيـه أنــا أتعـنـى لـهـا
عيشتى عيشـت غريـب وادع الغربـه وراح= أو كـمـا عـابـر سبـيـل دوم يـشــد رحـالـهـا
أو كما تايـه بصحـراء مالقـى شربـت قـراح = أو كمـا إللـي تحـت شـجـرة نـاعـم بظلالـهـا
كلـهـا أيــام وليـالـي ثــم قـالـوا فـــلان راح=أخـذه المـوت وحياتـه غــاب نــور هلالـهـا

الشاعر محمد بن مزهر الرفيدي

بيض الله وجهك يا بو مسفر ..

مثال مميز وواضح ..

ولا كلام لنا بعد أستاذنا أبو مسفر ..

لاهنت يابو مسفر
وفي انتظار المزيد

لاهنتو جميعا بيض الله وجيهكم

__________________