[poem=font="Simplified Arabic,4,black,bold,normal" bkcolor="transparent" bkimage="" border="none,medium,gray" type=4 line=0 align=center use=ex num="0,black"]
الشعر له ناس تقوله وتقراه = له ناس تطرب له وتفهم معانيه
والشعر في الاسلام لمواجه عداه = في وجه من سب النبي ما نخليه
والشعر تاريخ(ن) قديم ومن أسماه = سموه ديوان العرب عند راويه
والشعر موروث للأجداد وحماه = في وجيه رواده من اللي عبث فيه
والشعر في الاوطان يا زين مبداه = يثبت افعال وتواريخ ماضيه
والشعر لا جاء في الملوك وهل الجاه = يبين افعال الشجاع وعزاويه
والشعر له في كبار المواقف سواياه = يعتق رقاب خضر ويقدر وجيه
والشعر قوة حق وخيول وغزاه = وفرسانه اللي ترفعه ما توطيه
والشعر سيف ونتف راس تقفاه = أسرع من البارق وسبحان واليه
والشعر في مدح الرجاجيل محلاه = لا مدح رجال بطيب وهو فيه
والشعر لاهل الشعر وأهل المعاناه = وأهل القلوب الخضر تطرب لطاريه
والشعر في البل تنتشر ثورة اصداه = يشعل حماس الناس ويشوش راعيه
وأكبر دليل اليوم في الحفر شفناه = ذيدان عيال العود خيرة مناقيه
والشعر أبوابه من طرقها تعداه = لوم الرجال ان كان علا مبانيه
والشعر يابعده على اللي تمناه = ويكرم عن اللي لا بغا الشعر يشريه
والشعر أقوله وأسمعه وأتنقاه = وأختار من جزله وهزله أخليه
الشعر أنا بيني وبينه مخاواه = مر(ن) يخاويني ومر(ن) أخاويه
وليا طلبته فزعتة مد يمناه = في حزة(ن) أحتاج فيها مساعيه
واللي يقلل قيمتي أتحداه = أن كاني مروي عطاشى ضواميه
في منتدى الرجال الكرام المسماه = اللي يحبون القصيد وطواريه
لا لجلجو قرابع الشعر وأشباه = ناس يبون الشعر وهم حواليه
أقف على عده و اورد على ماه = وأغرف من صافيه واخشى المشاريه
والشعر ما جاء بالحجج والمحاماه = مواهب الرحمن والله معطيه
الشعر عطران الشوارب تقهواه = هو كيف روس(ن) كيفها ما تخليه
في مجلس(ن) صفر الدلال اتمثناه = مجلس رجال طيبهم يقتدى فيه
مجلس وقار وعز واسلوم وجباه = علامة السجود فيها مواريه
واختامها هذه القصيده ومهداه = لمنتدى قحطان شعري وأنا اهديه
لأدارته وأعضاه واللي تبناه = تحية الفهري تسابق خطاويه
والشعر عرافه تشوفه وتقراه = في عيون شعاره وتفهم معانيه[/poem]