[poem=font="Traditional Arabic,5,,bold,normal" bkcolor="transparent" bkimage="http://www.smanalhrj.com/vb/images/toolbox/backgrounds/30.gif" border="inset,2,burlywood" type=0 line=0 align=center use=ex num="0,black"]
قابلت لي شايب كبير وزعلان= وقلت السلام وورد لي بالسلامي
ونشدت عن حاله وقال انه تعبان= وهموم صدره تجتول بازدحامي
قلت اقلط ويا مرحبا عد هتان= وهلت دموعه مثل وبل الغمامي
وقام يتلفت قال يابوك ظميان= قلت اقلط وتبشر بري وطعامي
وكرامتك عندي قعودٍ وخرفان= وابشر بعزك يا عزيز المقامي
قال انت قحطاني ونعمٍ بقحطان= اهل الشجاعه والنفوس الكرامي
انتم هل فعولٍ جزيلات وسمان= وانتم هل الماقف نهار الزحامي
فرسان لا من ثار في الجو دخان= مثل البحر لا صار فيه التطامي
وانتم حكمتوا نجد والعلم وكدان= في نجد ثبّتوّه خمسين عامي
حتى الهداوي جابها فلان وفلان= ماهوب حبٍ ،، ذل والسيف حامي
افعالكم يا عظمها عبر الازمان= ما تنحصي شرق ٍ وغربٍ وشامي
يشهد لكم رمحٍ وسيفٍ وميدان= وتشهد لكم خيلٍ نهار العسامي
وتشهد لكم شمر وحربٍ وعتبان= ومطير تشهد والدواسر ويامي
وتشهد لكم نجدٍ وذودٍ وريضان= ويشهد لقحطانٍ جميع الانامي
وميزانكم يرجح على كل ميزان= وتاريخكم معروف مانيب كامي
قلت الشكر لك وانت للعرف عنوان= والعارفه شرواك له لحترامي
لكن انا شايفك بالهم غرقان= ابغى الصحيح اللي عليه الكلامي
فناظر بعينه قال مانيب طربان= ومن لامني يالله عساه الملامي
انا معي بعض الشكاوي لسلمان= ابيه ينصفني بعدل ونظامي
قلت اشهد انك ناصيٍ طير حوران= هذا العظيم اللي فعوله عظامي
نسل الملوك مطوعة كل فسقان= وعدوهم ما يذوق حلو المنامي
فقال انا بنصا سلايل كحيلان= يالله عساه يحقق لنا المرامي
معه ملفاتٍ ومخباه مليان= ويا كثر ماهو مسجلٍ من الاسامي
وسألت عن اسمه وجاوب بالالحان= انا الشعر وراح نصفي هدامي
احدٍ يبيعه واحد يشري بالاثمان= واحدٍ يرهمها سواة الحرامي
وياكثرهم ذا الوقت حامد وحمدان= كلن يقول انه سبح بحر طامي
وين الفحول اللي لهم بالشعر شان= من بعدهم والشعر روّح عدامي
وين انت يا عنتر وطرفه وحسان= وابن الملوّح والفرزدق ولامي
والنابغه وجرير بالشعر فرسان= قو المعاني مثل ضرب الحسامي
ووين الخلاوي اللي بالاشعار سلطان= ومحمد القاضي لبس له وسامي
وفراج بن ريفه وللقول برهان= شاعر وقسمه من علو السنامي
وصقر النصافي بالمعاني والاوزان= يحكم قصيدة بالمعاني حكامي
وابن السديري جاب حصِ ومرجان= يسبح بحور الشعر ستين عامي
وابن القعيمه هاديٍ وابن جروان= جزلين وافينٍ رجالٍ حشامي
يشهد لهم بالشعر في كل ميدان= شعار لامنه رمى كل رامي
والمسردي شاعر وبالشعر ماهان= وارد على هداج ماهوب ضامي
كم ليلةٍ لامن رقص كل شيطان= دون القبيله كل ليلٍ يحامي
ومحيسن والخس ذربين الايمان= اشعارهم نصحٍ وحب وغرامي
تطرب قلوب الناس في كل الاحيان= لا وصفوا بالشعر في ام الوشامي
لا استرسلوا في وصف مدعوج الاعيان= اهل القلوب الخضر زادت هيامي
ويا كم بعدد لك ولو فتح بيبان= وبلغ تحياتي رشيد الزلامي
وخمسين بالميّه لهم بالشعر شان= وخمسين بالميّه عليه السلامي
والشمس ما تحجب ولو كان ما كان= والنور لا من بان يجلي الظلامي
وجزل الشعر يعرف ليا بان ما بان= يهز فكر اهل العقول الفهامي
وهزل الشعر عيبٍ وذلٍ ونقصان= وما يجيبه الا اهل الكبود الظوامي
واللي يصفق له ضعيفٍ وعميان= يا كثرهم مثل الجراد التهامي
وهذا كلام الصدق من غير حقران= ماهوب يزعل كل حرٌ قطامي
تمت وصلوا عد ما هل ودان= واعداد من هم يلبسون الحرامِي

اخوكم : عبدالله بن هادي بن القعيمه [/poem]