" فوح الضماير " رثاء الفقيد خالد البشري رحمه الله
بسم الله الرحمن الرحيم
هذه إحدى محاولاتي في رثاء الأخ العزيز " خالد بن يحيى البشري " رحمه الله , أرجو أن ترقى لمستوى ذائقتكم , واستروا ما واجهتوا !!
فوح الضماير
بسم رب الكون علام الخواطر ***** أبتدي بالقول والنية مطية
حضروا الأقلام وأبواك الدفاتر ***** والله(ن) ذا الليل ناوي لي بنية
قاله اللي قبل ذي ما كان شاعر ***** لين ذاب القلب من فرقى خويه
احترق معناه من فوح الضماير ***** كن في صدره حروب طائفية
هاجسي من بين الاحيا لا تهاجر ***** مالك ومال المتاعب والبلية
الالم والحزن يسري بالمشاعر ***** ضاقت الدنيا وهي كانت خلية
فزعت القوات وكبار الدكاتر ***** والحرس والجيش وافراد السرية
يسعفونه ما دروا إن الحظ عاثر ***** ما دروا انه بين أنياب المنية
الله اختاره ورب العرش قادر ***** راضي حكمه ونفسي له رضية
يوم جاني العلم فجَّرتْ المحاجر ***** دمعتي هلَّت وهي كانت عصية
خابرٍ نظْرَتْهْ لي والله خابر ***** كل ليله مرسل(ن) طيفه عليه
لايمي يا جعل يطعن بالخناجر ***** جعل ياجي له على الاضلاع كية
خالد المحبوب والتاريخ عاطر ***** ِسعدْ والله بالوفا من هو سميّه
يذكرونه يوم يقرون المحاضر ***** كم حبيس الدين فكَّتْه العطية
والمساجد تذكره ويَّا المنابر ***** في صلاة الصبح ولَّلا في عشية
ويذكره طفل حضر وسط المقابر ***** يوم دفنه حاضر والشمس حية
إيتفقد لعبته في الليل ساهر ***** وإيتذكر لا خذا منه هدية
ليت يرجع ثم بعيونه يناظر ***** دمعةٍ خرسا على خد البنية
اغرقت بالدمع مكحول النواظر ***** جادل(ن) شابت وهي كانت صبية
ترسل العبرات والنظرة تسافر ***** في شريط الذكريات الموسمية
كم تهنَّت بالهوى والحب غامر ***** من يدينه زهرة العشق الندية
حرَّمت بعده وهي من غير قاصر ***** حالفهْ ما بعده من الناس زيه
والله ما تَّنلام يوم الهم كافر ***** يوم رَبَّعْ بين الاقواس الحنية
آه يا قلب العنى يالِّلي تكابر ***** تحسب الدنيا حياة سرمدية
ممِّن(ن) للوقت واثر الوقت غادر ***** ما حسبت الوقت شمَّات عليه
بعد خالد بان لي وجه(ن) مغاير ***** بان لي من شدة الدنيا شوية
بعد خالد ما بقى للسعد خاطر ***** لو ضحكنا ضحكة(ن) ما هي سلية
الله أكبر كم تحديت المخاطر ***** لين جت لك وانت ما ترضى الدنية
يا شهيداً نحسبه لله صابر ***** يفدي بلاده ويضحك للمنية
أبشر برحمة كريم المد غافر ***** الله المطلوب هو جزل العطية
نطلب المولى وهو للعظم جابر ***** يجبر قلوبٍ على ذكرك شِجية
والصلاة على محمد خير حاشر ***** النبي المبعوث هو خير البرية
http://www.youtube.com/watch?v=rCSxXQpVoZo
الرجاء الدعاء للفقيد بالرحمة , فإنه في حاجة للدعاء وجميع موتى المسلمين
,
__________________
سبحان الله وبحمده سبحان الله العظيم
25-01-2011, 02:49 PM
تعليمات المشاركة
المواضيع المتشابهه
العرض الشجري