هذه المرثية في الشيخ / سيف بن عبدالله بن حريش واخيه الشيخ / سعد بن حريش وهم من قبيلة ال جربوع ال الصقر عبيدة واقول فيها:


يالله يامنزل آيات كريمات
ياربنا اللي عالم بكل خافي

تجيب لنا يارب كل الدعوات
دعواتٍ أقولها من خاطر صافي

للي لهم بالطيب صوله وجولات
رجال ذكرهم باقي ولاعنه غافي

لهم في كل ديره شهود وإثبات
يشهدون باللي أقوله والعلم وافي

وأذكر جدي اللي علومه طريات
سيف وله من اسمه رسوم ووصافي

رجل له صفات كثار وجميلات
مقطع للحق والحق عنده بانتصافي

مكرم للضيف ولا عنه صدات
به الكرم وقت السنين العجافي

وللرفيق ذرا ولايرضا بزلات
مجالس للمطلق ويجنب الهافي

صادق صدوق وحافظ للامانات
معروف بصدقه ولاعليه اختلافي

وبن سليم وبن دعجم خير الاثبات
وابودبيل وبن فردان وكل عرافي

وعشيرة ال الصقر يأهل المروات
عنده يوم إنه كفو لهاوإسنافي

مزاياه صعبه وللطيب وقفات
ماتنحصرفي مية قافٍ وقافي

وكاسبٍ لطيبه من هل الطولات
عيال ابن جربوع سيوفٍ رهافي

وخواله شيوخ العرب والمهمات
ال جافل ونعمٍ بهم هل الميقافي


وابذكر راعي الكرم وراعي الفزعات
أبوهيله ومثله قليلين الاوصافي

ضيوفه في كل حزه وكل الاوقات
نفسه رفيعه ومارضا بالضعافي

شاربٍ للقرامه شرب البيالات
مثل ماشربها قبله خاله الوافي

شيوخٍ يوم الليالي صعبه ومريرات
واليوم كل شيخته بمال وتزيّافي

والحمد لله ذكرهم حي مامات
من طيب عيالهم والعلم رفرافي

هذي صفات للرجال أهل الشكالات
يوم كل يمدح ماطرا له وشافي

واختم كلامي بالثناء والتحيات
والكل له بالمدايح قول وميقافي

الله يرحمهم ويسكنهم فسيح جناته وصح لسانك ابوسعد وبيض الله وجهك

__________________

الله يرحمهم ويسكنهم فسيح جناته
ابو صقر عزيزي يوجد بعض الملاحظات في الوزن
اخوي ارجو ان لايضايقك ما اقول الشعر وزن وقافيه
انت استهميت بالموضوع والقافيه واهملت نوع ما الوزن

ملاحظه
كيف تعرف ان هناك بعض الاوزان
مهمله لحنها بلحن أو شيله ويظهر الخلل في البيوت اللي فيها خلل
اخوي ارجو من الله ثم منك انك مايجي في خاطرك علي شي بس حبيت ابينلك حتى تتلافا الغلط في قصايدك القادمه
اخوك عبد العزيز محمد القحطاني