المساعد الشخصي الرقمي

مشاهدة النسخة كاملة : الشاعر / محمد الدحيمي


سعد الشواطي
13-07-2009, 12:44 PM
السلام عليكم ورحمه الله وبركاته




غربة بلا عنوان



يعين الله يادنيا تسـوق ايّامهـا الأحــزان
. يعين الله .. وانتي مثل قفـل ٍ ضـاع مفتاحه


يعين الله ... وجروحي لها في كلّ وقتٍ شـان
كذوب اللي يقول ان الزمن بيـداوي جراحه


سقى الله يوم انا يمـّه غرير ٍ يزعج الجيران
سقى الله يوم انا طفلٍ يصج البيت بصياحه


سقى الله يوم كان اقصى طموحي .. لعبة الدنّان
نهاية يومي المغرب ... واخاف الليل واشباحه


سقى الله يوم انا البس بشت ابوي وثوبه القيطان
واقلد كلّ شيٍ فيه .. حكيه .. جدّه .. مزاحه


واشيل المسبحه مثله ليا هوجس وهو سرحان
بيشعر ...واحسب ان اللي عطاه الشعر مسباحه


سقى الله يوم كان آخر وصولي .. راعي الدكّان
براءة طفل ماتحسب صروف الوقت .. ذبّاحه


سقى الله ضيقتي لا شفت (ساره) تمدح الورعان
طفل بعيون طفله لو تذّمه .. قال مدّاحــــــــــه


سقى الله بيتـنا ذاك البسيط مشقق الجدران
شجـاع ٍ يهزم الغدراء ... بقنديله ومصباحه


تكحِّلنا القناعه .. لا طمع .. لا هم .. لا حرمـان
واذا جاء الليل تكفينا ... ثلاث اخوان .. طرّاحه


جميع الذكريات اللي غدت في قفرة النسـيان
. يحـاكي حلوها عبره ... بموق العين سبّاحه

خذتني غربـةٍ عنوانها ... غربه بلا عنوان
ابي عقب التعب راحه ... لقى فيني التعب راحه


رجعت اليوم مثل اللي رجع عقب القنص خسران
غدا طيره وجاء يسحب سلـوقيه وملواحـه


قصيده مابَعَد مرّت ببال (مسـاعد وضيـدان)
هواجـيس ابدويٍ هايـم ٍ في عشق فـلاحه


وروح ٍ تايبـه كانت تبي لذنوبـها غفـران
خطـاي انّي كتمت اسرارها بعيـون بواحه


تقولين المطر ماهـوب ... يمّـه دايمٍ هتان
اجل معذور قلبٍ في همومه ضاعت افراحه

انا يمـّه غلطت ولاني اول واحـدٍ غلطان
ابونا آدم من الجنه خرج باسباب ... تفاحه


خذلك الوقت فيني .. ماخذلتك ياأعـز انسان
. وش الدبره ؟ وحظي صار.. قفل ٍ ضاع مفتاحه

سفر بن مبارك
13-07-2009, 01:59 PM
الله الله فطرة الطفوله أطلال الماضي جمال الحياة وبساطتها الحنين للواقع الذي يتوقع الشاعر أنه أجمل

شيء مر في حياته كم نحن سعيدين جدا عندما نتذكر الماضي الجميل الله من شاعر مبدع ورائع الله

دره ع هذا الخيال الواسع أخي سعد أنت رائع وصاحب ذوق بارك الله فيك ع هذا الإختيار الموفق

خالص شكري لك أخوك ..........

أبو معتز
13-07-2009, 10:03 PM
ارحب يا سعد

لاهنت على الاختيار والذوق الرفيع

تقبل تقديري

ابراهيم آل بي حبيب الرفيدي
15-07-2009, 12:09 PM
صح لسانك ولسان الشاعر محمد الدحيمي


مشاركاتك ياسعد دائما مميزه


لك جزيل الشكر

وتقبل التحية

مرعي ابن لعور
15-07-2009, 08:16 PM
من اجمل المواضيع والقصايد
ولاتحرمنا من مواضيعك الوافيه وتقبل تحياتي

سعد الشواطي
16-07-2009, 01:02 PM
سفر بن مبارك

أبو معتز

ابراهيم الرفيدي

مرعي بن لعور


شكرا على مروركم الجميل

تحياتي لكم