يقول من عدى على راس عالي

من قصائد الشاعر المرحوم محمد بن الاحمد السديري

[poem=font="Simplified Arabic,4,black,normal,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
يقول من عدى على راس عالي = رجم طويلٍ يدهله كل قرناس
في راس مرجومٍ عسير المنالي = تلعب به الأرياح مع كل نسناس
في مهمهٍ قفرٍ من الناس خالي = يشتاق له من حس بالقلب هوجاس
قعدت في راسه وحيدٍ لحالي = براس الطويل ملابقه تقل حراس
متذكرٍ في مرقبي وش غدالي = وصفقت بالكفين ياسٍ على ياس
أخذت أعد ايامها والليالي = دنيا تقلب ما عرفنا لها قياس
كم فرقت مابين غالي وغالي = لوشفت منها ربح ترجع للأفلاس
ياما هفا به من رجالٍ مدالي = ماكنهم ركبوا على قب الأفراس
ولا قلطوهن للكمين الموالي = ولاصار فوق ظهورهن قطف الأنفاس
ولا رددوا صم الرمك للتوالي = كلٍ يبي من زايد الفعل نوماس
من بينهم سمر القنا والسلالي = مثل البروق برايح ليلة ادماس
يقطعك دنيا مالها أول وتالي = لو اضحكت للغبن تقرع بالأجراس
المستريح اللي من العقل خالي = ماهوب بلجات الهواجيس غطاس
ما هوب مثلي مشكلاته جلالي = ازريت اسجلهن بحبرٍ وقرطاس
حملي ثقيل وشايله باحتمالي = واصبر على مر الليالي والأتعاس
وارسي كما ترسي رواس الجبالي = ولا يشتكي ضلعٍ عليه القدم داس
يا بجاد شب النار وادن الدلالي = واحمس لنا يا بجاد ما يقعد الراس
ودقه بنجرٍ يا ظريف العيالي = يجذب لنا ربعٍ على أكوار جلاس
وزله إلى منه رقد كل سالي = وخله يفوح وقنّن الهيل بقياس
وصبه ومدّه ياكريم السبالي = يبعد همومي يوم اشمه بالأنفاس
فنجال يغدى ما تصور ببالي = وروابع تضرب بها اخماس واسداس
لاخاب ظني بالرفيق الموالي = مالي مشاريه على نايد الناس
لعل قصرٍ مايجي له اظلالي = ينهّد من عالي مبانيه للساس
لاصار ماهو مدهلٍ للرجالي = وملجا لمن هو يشكي الظيم والباس
بحسناك يا منشي حقوق الخيالي = ياخالق أجناس ويا مفني أجناس
تجعل مقره دارس العهد بالي = صحصاح دودٍ دارسٍ مابه اوناس
البوم في تالي الهدامه يلالي = جزاك يا قصر الخنا وكر الأدناس
متى تربع دارنا والمفالي = وتخضّر فياض عقب ما هي يبّاس
نشوف فيها الديدحان متوالي = مثل الرعاف بخصر مدقوق الالعاس
وينثر علي البيدا سوات الزوالي = يشرق حماره شرقت الصبغ بالكاس
وتكبر دفوف معبسات الشمالي = ويبني عليهنّ الشحم مثل الأطعاس[/poem]




وسلامتكم

__________________

لا اله إلا أنت سبحانك إني كنت من الظالمين