سلام الله على ذيب السرايا ذيب بن هدلان

السلام عليكم

الشهر مبارك عليكم

هذه قصيدتها نظمتها بعدما طلب مني المشاركة
في كتاب الشيخ الفارس شالح بن هدلان

وأترككم مع القصيدة


[poem=font="Simplified Arabic,4,black,normal,normal" bkcolor="transparent" bkimage="backgrounds/1.gif" border="double,4,skyblue" type=0 line=0 align=center use=ex num="0,black"]
يقــول الـضـيغــمي غانم بـدا بالقاف والألحان = يصـــوغه صــوغة الصايغ لتيجانٍ يسويها
يطـوّعهـا على الممشى ويازنـها على الميزان = ويرفعها مرافــــــيع السحـــابه في علاويها
ولا منّه بدا في عالي الضــلــعــان بـنـيـه زان = تونّس خاطــــره وألفـــت مـــواويله يغنيها
يعــدّلها كـمـا تعــديل رامـي صـــيد في خــدّان = يزيد جفــــال فـــرقٍ شافت المخباط حاديها
تلاويني هــواجيسي وألاويـها بعـض الأحــيان = وشــد الطـارد المطــرود شد القوس باريها
ويومه شاش قام وحاش ناقيها على استحسان = ويقطف من زمـــاليق الــورود اللي منقيها
خذا خصم الجواب وشـاقه المضمون والعنوان = ولا كل البـروق تشــوق للدعــوى محاميها
بعــد ما جــاني المرسـول هيضـني وأنا شفقان = نشـــارك في ثــنـا قـــــومٍ قديماتٍ حسانيها
مـادام القــول في شـالح وشـبله قاهـر العدوان = تعنزت بركــون الكـــــــون وأيقنـت بتعليها
اصارع ضيقة الفرقا وأعايش سـيرة الشجعان = تعـــدّا اللـوم خيـرة قـوم حاضرها بماضيها
زمـان فات فيه المـوت وطّى هــامة السلطـان = تفاهق قادة جيوشٍ خذلــها شـــور غازيها
بغى يكسب مديح بكـثر ما يغزي على العربان = يحوش من الغنــايم والخـلايق ما يراعيها
ولكن الليالي ما توافــق رغــــبة الإنســـــــان = توطــيه الليـــالي مــن عواليها لواطــيهـا
وســبتها ســلايل عــــود لازورٍ ولا بهتـــــان = تزود بفعــلها وانســابها تطلـــــق يمانيها
سـلام الله على ذيب الســرايا ذيب إبن هدلان = تنومســــنا فعــــوله بأول الدنيــــا وتاليها
عساه بجنة الفردوس ولاّ جنــــة الرضـــوان = عوضنا في فراقه شوفة أحفــاده وطاريها
وشالح في زمانه ركّب الشوكه على النيشان = بنى مجـــد ٍ يحير كاتب القصــــة وراويها
رحل يومه زعل سنّد وجندل فـــارس العتبان = لاجل جاره ومقدارة جاب الصفرا يلاحيها
قلعها ذيب راس الطــيب بأول غــزوةٍ له بان = طلع نجمــــه وغيّب باقي نجـــومٍ يباريها
وقـبـلـه الفديع مجــندل الفرســـان والشيخان = سليل المجد ما ردّه رمــد عينه وقـــاذيها
يبيع الروح في حوم الوغى ويشبّع السرحان = يساند شــــــالح ويدفع عن الحلة بلاويها
ألا يا مــال فرقــا العين والله زادت الأحـــزان = بعد روّح عقــيد القـــوم فارسها وحاميها
رحل شــالح بتاريــخ ومجـــده ثابت الأركـان = بنى بيت المعزّة والشجاعة ورث أهاليها
والا منّه قصد شــالح حفظـــنا بيته المـــليان = حلاة الشعر قول وفعل صدقٍ في معانيها
نماري به على الأجناب والعدوان والفرسان = وقـــومٍ تكسب النعمين كل النـاس تغليها
هــذا قــولي لمرســولي وقبله طلبة الرحمن = طــراة القـــول ذكر الله بدايتها ومنهيها
وصــلوا عـدّ ما غنّا الحمـام بعالي الأغصان = هذا صــدق الجواب وباقي الدنيا لواليها [/poem]