****((بنت بدوي))****

[poem=font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=1 align=center use=ex num="0,black"]
الصيف قرب والربيع اوشك يروح=وآخيل برق غربي المملكة لاح
له عدة ايامٍ على الطايف يلوح = ان قام حظ البرق حظ المطر طاح
وصوت الرعد جرعٍ ولا هو بمبحوح=جوٍّ خيالي لا بعد جا ولا راح
والسيل جاله مع رذاذ الحيا فوح=في وادي كنهّ مثل وادي نساح
صفيت مشاريبه وغنا لها الدوح=والطير جاله في خضيراه ملواح
عن موية المنهل يكفيك قرطوح=وعن جرة الزامل حمامه ليا ناح
وبو جديل يجاوب النوح بالنوح=هاضه هديلٍ فوق الاغصان صداح
في صحصحٍ يفرق على كل صحصوح=مطراح عشبه فوق شبرين مطراح
الربلّ ميدة والخزامى له سطوح=والروض من نبت النفل لابس وشاح
مدهل مغاتير ومجاهيم ووضوح =يوميلها الراعي بعجرا ومسباح
يا شاشة التلفاز بثي وبوضوح=بثي الحوية في تراث ابن شلاح
ديرة حبيبٍ شوفه يزيد فالروح=هو راس مالي والفوايد والارباح
ابو جديلٍ فوق الامتان بحبوح=يلعب بذيله ويتمرجح تمرجاح
كنه سواد الليل في عتمة الضوح=يلفح على وجهه لياهبت رياح
وبو عيونٍ رمشها كنه سفوح=ليسلهمت كنها مساهيم ورماح
وبو جبين وبو حواجب وسنطوح=وبو خدودٍ ريّه تقول تفاح
سبحانك الله وانت قدوس سبوح=موية شفايفها كما الشهد لاساح
وان لبست الجلاب والصدر مفتوح=شفت النهود اللي على الصدر طفاح
اردوفها تنزح عن الخاصر نزوح=كن بينها غارات وحروب وكفاح
طويلةٍ مليانه بعيدة شبوح=وان اقبلت ولا ادبرت طيبها فاح
وان عزمت لحفلٍ به شيال وطروح=ماهمها من كان في قصر الافراح
وجهٍ قبل والكحل فالعين ملموح=يوم بعضهم وجهه تقول تمساح
مملوح تدرون ايش معناة مملوح=يعني الحلا فالنسبة يفوق الاملاح
ومطعومه السمن الطبيعي على الدوح= مافيه كيماوي من انتاج فلاح
نومه على بزٍ على القاع مبطوح=وله مع شروق الشمس سجه ومسراح
يطوف وينفس عن همومه الزوح=وان شاف هشالٍ على شايبه صاح
يا بوي جانا ضيف جوح الجمر جوح=طوح بصوت النجر يابوي طواح
شهل له بنفجال والفال منطوح=انت الكريم اللي على الحيل ذباح
بنت بدويٍّ بالجمالات ممدوح=وضحى وبوها حضرة الشيخ وضاح
من سبها قلبي على طول مجروح=ما فاد في طبه طبيبٍ وجراح
من سبها قمت افضح السر وابوح=اقول باح السد وتقول ماباح
لا راكز عوده ولا هو بمسدوح=وكل اناء بالذي فيه نضاح
موضوع حبي له على الخلق مطروح=ما عاد يبغاله تفاسير وايضاح
اعلنت فيه اعلان واذنت فالصوح=والقلب في حبه على خف وجناح
في حبها سموني اهل الهوى بوح=يعني خبل لكن على رقم سفاح
وفي حبها بصبر صبر سيدي نوح=وفي حبها حبي معه سبعة ارواح
قصت على قلبي تراخيص وفسوح=وتبحبحت بين الحنايا تبحباح
يابنت انا راسي صليبٍ وطحطوح=عندي على باب الصعاطير مفتاح
ماني بملقوفٍ ولا ني بسلتوح=ولا اتسمع في قناوات الاصلاح
ابوي لاعنده يجي الهرج ويروح=عبدالله بن شفلوت كساب الامداح
فالمعرفة بنيت له شموخ وصروح =ومقدم بني عمه لما صايحٍ صاح
صبيان مندي يوم ذابح ومذبوح=يوم الحفيف يصبح الحف صباح
ان انتصح ولاّ فلا هو بمنصوح=كم واحدٍ صوّب وكم واحدٍ ذاح
يشهد ولد حارث ويشهد ولد روح=واثبت كلامٍ قلت واعدل سلاح
يازين امنحني الثقه وانت ممنوح=لعبت بي زقره قطار مفساح
لانته بمسموح ولاني بمسموح=لو تنتقل خرير في جنب الاسياح
عندي طموح ماهي باية طموح= ابغى اربح المليون ياجرج قرداح
فرصة ولا باخلي الفرصه تروح= ماني بمعطي فرصة العمر سداح
تبي الصراحه كل مشروح مبروح=حبيتك وقلبي لك ارتاح وارتاح
فان قلت مالك فالعواذيل مصلوح=ارزح تراني بعض الاحيان رزاح
وان قلت حاسب وافتهم زين يالوح=امزح تراني بعض الاحيان مزاح
ماتصلح العشرة بلا غيض ومزوح=والسالفة ماتصلح بدون ملاح
فانا اشهد انك خلي الروح بالروح =جاك الكلام وخل ماجا وماراح


الشاعر/ سعد بن شفلوت






[/poem]