أثر اتهام نسب له وهو منه برئ ولم يجد من يقف بجانبه
ولا من ينتخي به، ولم يتذكر سوى ربعه المساردة (والله والنعم )
في مدينة جاش فقال هذه القصيدة وارسلها لهم ولم يكن البعد حائلاً بينه وبينهم.

يا عالم النيات يامنش المطر = يا قاضى الحاجات يا ستار
تكتب لنا عندك نهار الملتقى = غفران وانت الواحد الغفار
بديت بسمك ما بديت بغيره = يوم القلم بحروف قولي سار
يا رب تهديني على قول القدى = ولا تواخذني على الأشعار
من عقب ذا يا راكب اللي لا مشى = لولا الفرامل يمسكنه طار
هاف جديد صاحبه منتخيره = توه ورد تشتاق له الأنظار
باقي على تصميم شد بلاده = شد الخواجه صنعة الكفار
ما قربه راعيه عند السمكري = ولا تغير منه لو مسمار
ما فوقه الا عقربه وسبيره = ولا الرسول سائق بيطار
سواقه اللي شاطر ومجرب = من خلقته ضاري على الأسفار
يمشي مع الدومه مع وقت السحر = والظهر عند أهل الوفا والكار
في جاش يلقى لابة لاجيتهم = لقيت حيل في صحون اكبار
ربعي هل العادات في وقت اللقاء = لاثار قدام الجموع غبار
اعوال مسرد مرهقين اللي طغا = لا رد للفعل القديم اذكار
كلن على وضح النقا يشهد لهم = بالطيب والنخوة وبالمقدار
عاداتهم بالكون لطمات العدى = ولطماتهم للمعتدي دمار
وان قيل هذي ديرة المساردة = كلن من العدوان فر فرار
ربعي مساردة حدود بلادهم = حامينها من ضدهم بالنار
وربعي مساردة اليا ثار الوغى = كلن يقر الهم وهو محتار
وربعي ما ردة كعام العايل = واشوارهم تقضي على الاشوار
وربعي مساردة عذاب المعتدي = يوم المعارك عجهنا طار
وربعي مساردة يحلون العقد = كم طوعوا للحق من غدار
وربعي ترى ضيف الخلا يفرح بهم = والكل منهم يكرم الخطار
لاجيت ربعي فانص بيت الطارف = ما منهم اللي لا نصيته بار
كلن يدور للجماله منهم = والكل من ربعي ذرى للجار
سلم عليهم يا نديبي كلهم = وعطهم علوم وسترد اخبار
واختص ابو ناصر ذرى من لاذبه = سم الحريب وللرفيق استار
يعيش ابو ناصر ويفداه الردي = عند الفلانه ما تناسى الثار
يوم الفلانه شرهبوا فيها العدى = بعيونهم وقف لهم مختار
ما يستحق المدح غير امثاله = اللي لهم بالمرجله مدار
حلحيل حلال الامور الكايده = حلحيل وليا حل ما يندار
يوم ارتكى للنايبات محلها = ما يستمع شور الردي لاثار
خصه بتسليمي مع تحيتي = مكرم ضيوفه والليالي عسار
ثم انص ابو حيبان يوم الفرعه = تلقىمحله في علو الدار
مناحي اللي بالكرم وصايفه = قليلة في حمله الاقطار
تراك لاجيته تبرهج خاطره = ونسيت حتى شطة المشوار
تلقى الدلال الصفر والهيل الذي = يشريه لاما غليت الأسعار
كريم سبلا ما يشح بماله = كفه لضيفه بالكرم مدرار
عز الله ان وصايفه قليله = اقولها سر وأقول جهار
قلته ولاني بطالب المعذرة = الا من الله من الشعار
قولي وأنا اخو معجبه من دونه = ما نيب والله طالب معذار
من لامني في حب ربعي ينكسر = رجليه ويدينه تروح كسار
لا رحم ابو من لامني في حبهم = والنار له في الاخرة قرار
ذكرت ربعي يوم قلت حيلتي = بالسجن ممنوع من الزوار
يوم أن سجنت وصابني حكم القضاء= مظلوم أنا من غير ذنب صار
مظلوم في ما ليس بي له مدخل = والمدعي مالي عليه انصار
مشكاي لله والبشر ما همني = من صار منهم بالحكي ثرثار
أهل النميمة ما حسبت احسابهم = أيضاً ولا عندي لهم وقار
من لا هرج بالوجه يهرج بالقفا = والزور والبهتان للفجار
لاشك انا باصبر على حكم القضاء = والرزق ماشي والفلك دوار
ولابد من عقب الظلام امن السفر = ولابد عقب الليل من نهار
ولابد من عقب الكدر من صافي = ولابد من يسر بعد الاعسار
ولابد من عقب الضياق من الفرج = إن كان ربي طول الأعمار
ولا الحذر ما هو يفك من القدر = والمال ما يغني عن التجار
مال الفتى عما كتب له ملتجي = والأقدار ما تعطي الرجال انذار
ما كتب في عالي جبينك صايبك = اصبر ترى ما يندم الصبار
ختمت قولي بالصلاة على النبي = اعداد ما قد هلت الأمطار

وسلامتكم يالربع

واللي يعرف القصه ياليت لو يوردها لنا هنا