[poem=font="Simplified Arabic,6,black,bold,normal" bkcolor="transparent" bkimage="" border="none,medium,gray" type=4 line=0 align=center use=ex num="0,black"]


الهرج في بعض المواقيف منقود = يرخص مقام الرجل لو كان غالي
والصمت في بعض المواقيف محمود = يحفظ لك حقوقك من اول وتالي
والجمر يكشف قيمة وريحة العود = والضيق يكشف لك نوايا الرجالي
وللحق كلمه تفرق البيض والسود = إبليس كاتمها حرام وحلالي
والحجه اللي مالها ساس وشهود = شجره ولا فيها الثّمر والضلالي
والعيب من سيفه على خوه محدود = ويفرح ليا مالت عليه الليالي
والبخل بخل الوجه لا جاتك أوفود = ماهو ببخل الزاد ولاّ الريالي
ومن ينظر إلنقص السواليف والزود = يتعب ورا طرّاد قيلٍ وقالي
والصدق حبله فالمواقيف ممدود = والكذب حبله فالمواقيف بالي
والغيظ برقه كره والشرهه رعود = وماهوب يمطر غير حقد وجدالي
والصبر زينٍ يلحقك كل مطرود = ولا بد عقب المرّ عذبٍ وحالي
وفعل الجميل أن راح لابده يعود = وترفرف أعلامه بروس الجبالي
بعض العرب حاضر لكنْ ماله أوجود = وبعض العرب غايب ونوره يلالي
جاتك بلا مقصود ولاّ بمقصود = قدمتها لك مثل كيف الدلالي[/poem]