هذه القصيدة ستصبح قضية ومحل إهتمام من مختلف التوجهات
قصيدة الشيخ عائض القرني وسينشدها محمد عبده
[poem=font="Simplified Arabic,5,black,bold,normal" bkcolor="transparent" bkimage="" border="none,medium,gray" type=2 line=0 align=center use=ex num="0,black"]
لا إله إلا الله ابدى بها حق وصوابْ =كلمةٍ من عالم الغيب ربَّك جابها
لا إله إلا الله فضّاضة الصخر الصّلابْ =أحمد المختار للخلد يسبقنا بها
ولا إله إلا الله الريح تشهد والسحابْ =والجبال الراسية كلها وهضابها
ولا إله إلا الله أكبر سؤال أعظم جوابْ =الرعود أصواتها والبروق أثوابها
ولا إله إلا الله القاهر الفرد المهابْ =جابر العثرات معطي الكنوز أصحابها
ولا إله إلا الله أول كلام أصدق متابْ =الحكم في سرها والهدى باهدابها
ولا إله إلا الله تخضع لها كل الرّقابْ =حظ والله من حملها وجا يسعى بها
ولا إله إلا الله ترجح بميزان الثوابْ =بالسما والأرض باحجارها واترابها
ولا إله إلا الله حصن من الشرك الكذابْ =ما تمس النار من جاه في جلبابها
ولا إله إلا الله ذخر الولي يوم الحسابْ =يوم تدنو الشمس والكرب بعض أسبابها
ولا إله إلا الله أجمل خبر وأكمل نصابْ =تشرح الخاطر وهي مفزعٍ لذنا بها
ولا إله إلا الله ننسج بها حسن الثيابْ =هي نشيد المجد والنور من محرابها
ولا إله إلا الله فك الرّهَن عتق الرقابْ =طهرة للخلق باحسابها وانسابها
ولا إله إلا الله يفتح لها سبعين بابْ =كل بابٍ فاح من عودها واطيابها
ولا إله إلا الله لو نزلت في الصخر ذابْ =هي سلاح الجند وسيوفها واحرابها
ولا إله إلا الله خذها معك وقت الذهابْ =جنّة الفردوس وين انت يا طلاّبها؟
يا الله يا غفار سهّل لنا كل الصعابْ =فكّنا من كربة مظلمٍ سردابها
ما لنا غيرك ملاذٍ ولا دونك حجابْ =يرتجيك الخلق عدوانها واحبابها
فالق الإصباح باني السما مرسي الهضابْ =عالم الأسرار هازم جميع أحزابها
محيي الميت مبيد الجيوش أهل الخرابْ =كاسر الجبار جابر كسير أطنابها
مغني المحتاج مشبع هل المخلب ونابْ =مروي الظامي مفرّج جميع اكرابها
حي يا قيوم أنا باسألك بام الكتابْ =حاجةٍ في كامن القلب وانت ادرى بها
اعفّ عنا يا مجير النبي من العذابْ =واعف عن أمة محمد فهو وصّى بها
أنا عبدك وانت بالخير تبدا والثوابْ =رحمتك تسبق عذابك تبشرنا بها
اسألك باسمك ووجهي لمجدك في الترابْ =الملوك بجندها سلّمت بارقابها
انت يا رحمن من رحمتك كشف العذابْ =التجينا بك وغيرك نصب حجابها
السلاطين المهابه هباب في هبابْ =كلهم في قبضتك لو علت باشنابها
ما عليه من البشر لو بنت فوق السحابْ =دود فقرٍ يحطم الموت ركن اقبابها
نسألك باسمايك الغر، والوصف المهابْ =بالفواتح والخواتيم كم نقرا بها
نسألك بأحرف كتابٍ إيْ والله من كتابْ =بالسور إيجازها باهرٍ واسهابها
بالطوال السبع في شرحها فصل الخطابْ =وسورة الإخلاص يا ربنا عذنا بها
ونسألك بالاسم الأعظم وبه كشف المصابْ =وآية الكرسي وكم قلبٍ اتهجّى بها
تغفر الزلّه وتفتح لنا للخلد بابْ =واحمنا من نارك الموقده واعقابها
والله إني بالخجل مثل محموم مصابْ =جيت بالتقصير والذنب نفسي عابها
لكن إن العبد لا ما رجع بعد الغيابْ =يغتفر له شردته بعد طول اغيابها
من أنا حتى امدحه من تراب في ترابْ =جوده الواسع رفعني على مرقابها
اتوسل بالشهادة وهي راس الزهابْ =واعترف باذنوب عبدٍ وأنا كسّابها
من شكر والا كفر ما يزيد الملك نابْ =الله مستغني عن الكل هو وهابها
الخليقة في موازين تقديره ذبابْ =والله ما تنقص من الملك وزن اذبابها
كلهم ريشة بعوضه على نسمة هبابْ =الله كم من جمجمة حنّطت باترابها
دمّر الاملاك واكنوزها صارت نهابْ =زلزل الباغين حط الفنا قصّابها
الله كم فرعون حطّه على راس الحرابْ =الله كم جبّار دق الوتد باطنابها
الله كم من راس طاغوت جرّته الكلابْ =الله كم من دولة جت ولا يُدرى بها
الله كم من قايدٍ في البرايا ما يُهابْ =صار زاد الدود سلاّبها وهّابها
لا تقل هذا عظيمٍ وذا حضرة جنابْ =العظيم الله يكفي البشر ما صابها
كل ما تبصر من الباشوات أهل القبابْ =مثل دود القز سم الفنا باثيابها
من غباهم علّم الدفن قابيل الغرابْ =وانتزى الهدهد لبلقيس في محرابها
وسد مأرب في سبا جدّ فاره في الخرابْ =ونامسه في راس نمرود سال العابها
شف ثمود البغي ماتوا بناقه في شرابْ =وغار ثورٍ بالحمامه يرد اعرابها
وقوم نوحٍ كالضفادع بطوفانٍ عبابْ =وصار قوم شعيب مثل الجيف باشعابها
كلهم عبد الطمع يا ذيابٍ في ثيابْ =كشّرت بانيابها واحتمى مخلابها
لا ترجّاهم تراهم سراب في سرابْ =فوض أمرك للمهيمن يفتّح بابها
وش بقي من مال قارون وأصحاب العيابْ =زرْ مقابرهم ترى البوم قد غنّى بها[/poem]