[poem=font="Simplified Arabic,5,black,bold,normal" bkcolor="transparent" bkimage="" border="none,medium,gray" type=4 line=0 align=center use=ex num="0,black"]




الصبح بين فز يامكثر النوم =قم وأسمع النصاح وأفهم كلامه

قدامك التجار والسوق مزحوم =دور حلال الرزق واترك حرامه

مأنت بعلى بعض الطواريق ملزوم =لاصار قسمك من شعيل سنامه

ومن عادة الأحرار ما تكثر الحوم =تقبل على الصيده بعزم وصرامه

الفوت لامن فات ما ينفع اللوم =ما ينفعك لامنك سقت الغرامه

غيرك شرا وأفلح بها وأنته تسوم =ماتدري إن الموت تقرب سهامه

ومانته مخلد قبلك الفرس والروم =ولت حضارتها وصارت عدامه

فيالحر خل مسامر الليل للبوم =ليل الدجى شفه وغاية مرامه

وسط البحر دوم وهو يجهل العوم =ويبغى السلامه وين يلقى السلامه

يضحك معك ساعه وساعات مهموم =ما يدري إن همه سبايب غرامه

يحب له بنت لها عشرة رقوم =وصار القعود اللي بيدها خطامه

وراحت حياته كلها حلوم في حلوم =وقلبه على الصحوه يفضل منامه

ما يمسي إلا بأغنيه لأم كلثوم =وليا أصطبح يصبح براغب علامه

عشان بنت بيتها صار مهدوم =مابه ولا شخص من الناس سامه

معها شهاده جامعيه ودبلوم =لكن شرفها كيف تبني هدامه

دام الحيا والصدق في البنت معدوم =ولا همها نقد العرب والملامه

تصير مثل الكاس لا صار مشروم =على يدا راعيه يلقى حطامه

وعن مثلها الرجال يعتز ويشوم =ما يقبل بها من براسه قرامه

يقبل بها رخمة معه قطعه رخوم =لاعندهم شيمه ولابه كرامه

تخاشروا فيها وصاروا لها خدوم = وكل دفن راسه سواة النعامه

وصارت كما أرض فوقها عدة خصوم = كل عليها قام يبني خيامه

ياكبر كبر الفرق بين أمس واليوم = فعايل الشجعان صارت رخامه؟

من أول اللي في اللقا ينطح القوم = وفي ساعة الهدات يكرب حزامه

عينه على الأعراض ما تكثر السوم =تحداه عن كحل العيون الشهامه

واليوم عين الرجل كن وسطها زوم =تصور ليا مرت أم اللثامه

صوره بدقة وحدة المايكروكروم =أشد من تدقيق عين الحمامه

واللي لا مرت يلتفت كنه ملطوم =سموه رديان الروابع هلامه

مرحوم يامن غرك إبليس مرحوم =ما من ورا النسوان غير الندامه

حتى ولو تسعى لهم دايم الدوم =عليك بيشحون بالإبتسامه

فدام العسل ياواسع العرف مسموم =لا تاكله وارمه بوسط القمامه

لانيب لا غادي ولانيب موهوم =شاعر ووصف ما يشوفه أمامه

وأظن بإن القصد واضح ومفهوم =ولا يجهل إلا من براسه غشامه

لأن الرجال أنواع وأشكال وقسوم =وكل حسب عرفه يحدد مقامه

هذي بيوت كنها عقد منظوم =جت من ضمير لايع الوقت ظامه

مشاكل حطت على كبدي وسوم =وحروب هم مثل حرب الرغامه

ولاصار بين الناس معطى ومحروم =وبأمر الولي يهل مزن الغمامه

فــ(سعود) يدري بإن ماجاه مقسوم =من واحد سواه وأنشز عظامه

رب خلق شمس وقمر وأرض ونجوم =والكل منها ماشي في نظامه

هذي علومي يوم كل له علوم =لعل راع النوم يقطع منامه

وإن كان ود النايم يكمل النوم =فأنا بري منه يوم القيامه[/poem]

وسلااااااامتكم

__________________

سبحانك اللهم وبحمدك أشهد أن لا إله إلا أنت أستغفرك وأتوب إليك