[poem=font="Simplified Arabic,5,blue,bold,italic" bkcolor="transparent" bkimage="" border="double,medium,gray" type=4 line=0 align=center use=ex num="0,black"]
أنا الصديق اللـي لياطحـت شالـك=لضامتك دنياك والوقـت بـك مـال
أنا يمينـك شدنـي فـي شمالـك=يمنى بلا يسرى ترى حالهـا حـال
انـا عـزاك وعزوتـك لا جرالـك=من تاعس الدنيا هواجيس واهـوال
ماني من اللي لاغتنى مـا وفالـك=لو لك عليه من الجمايل والأفضـال
وماني صديقك كان وقتـك صفالـك=أنا صديقك لأدبـرت فيـك الاحـوال
خذني عصى موسى إذا كنت هالـك=لمسحلك بحور القهر قول وافعـال
فالك عسى الله يسعد اليـوم فالـك=فالك عقب صوم الدهر عيد شـوال
وبالك يجي في خاطرك يـوم بالـك=انك تغيـب ولاتجيلـي عـل بـال
لا .. لا تفكر انت فـي مثـل ذلـك=إني اتخلى عنك لـو الزمـن طـال
ما اقول انا ياعـم مالـي ومالـك=ماترخص العشره ولا تغني امـوال
اسمع جوابي قبل ما اسمع سؤالـك=خارج حدود التغطيه وارسل ارسـال
على محيـط السالفـه حـط دالـك=أجيك رجلي كان ما جيـت خيـال!
انا لياشـح الزمـن فـي وصالـك=تمدني النخوه على وصلـك حبـال
انا عمـى عيـن العـدو لا نوالـك=انول روحه قبل مـا روحـك تنـال
بينك وبين الشمس شجرة ضلالـك=ماللشجر قيمـه إذا مالـه ضـلال
والليل لـو الليـل مظلـم وحالـك=ترسمني الظلمى على صـدره هـلال
ماني ولد عمك ولا اغلـى عيالـك=خطوى الخوي يسوى بني عم وعيال[/poem]

للشاعر / عبدالمحسن الشاهر

وتقبلوا تحياتي

__________________