فتل و نقض || مضواح بن شتوي وناصر آل مهدي ||

في ليلة يسود عليها الابدااع والجزاله في زواج الشاعر سلطان ابو ديه ال حازب الايام الماضيه اقام الشاعر مضواح بن شتوي والشاعر ناصر آل مهدي هذه المحاوره ولما فيها من الجزاله وقوة الفتل والنقض حبيت أنقلها لكم اتمنى ان أكون قد وفقت في النقل


[poem=font="Simplified Arabic,5,black,bold,normal" bkcolor="transparent" bkimage="" border="none,medium,gray" type=4 line=0 align=center use=ex num="0,black"]

مضواح بن شتوي

يا سلامي عد برقٍ في خياله=هل وبله من مزون العقربيه
والسواني تندرج فوق المحاله = يا كبر حضي يوم إن ناصر هنيه

ناصر آل مهدي

مرحباً بك في محل أهل الشكاله = الرجال أهل السلوم الاوليه
يابن شتوي كل تاجر من رياله = كيف ما قبلت والنيه مطيه

مضواح بن شتوي
لا ترحب بي وانا عندي وكاله = خلها بيني وبينك عالميه
يوم ناصر راح في الديره لحاله = ويش عذره بعد ما فارق خويه

ناصر آل مهدي
الشهر يا صاحبي بين هلاله = والوكاله ما تمشيها عليه
كل رجلٍ يا عميلي حسب فاله=لا تخصص في الامور الداخليه

مضواح بن شتوي
إنشد أصحاب السعادة والعداله = وإن لقيت العلم تلقا قابليه
الجهيمي يمدحونه في حماله = وأنت عندك يا ولد عشرين نيه
ناصر آل مهدي
ابن شتوي يا آل حازب وش طراله = ما درى ان السيف عم الحضرميه
يحسب اني أخوه والا من عياله = والجهيمي واحدٍ كفه صخيه
مضواح بن شتوي
ما طرالي كون شيٍ ينعناله = ذمتي من بعدها منك بريه
الخوي اللي نبي نلقا بداله=محزمه فاضي ولابه بندقيه
ناصر آل مهدي
الجهاله ما تزيد الا جهاله = أبلشونا مدعين العبقريه
لو كتبنا ما عرفت ايش الرساله=دفها توك على هذي وذيه
مضواح بن شتوي
العماني ما يحب الا صلاله = والسعودي ميتٍ بأبها البهيه
ناصر اللي قام يعثى في حلاله=بقي له في جعبته ربع الوقيه
ناصر آل مهدي
العماني لقي له عفشٍ وشاله = والحساوي في الحساء عينه قويه
قدم اليمنى ولا قدم شماله =لا تساومني على ذيك القضيه
مضواح بن شتوي
العماني الله أعلم وش بقااله = شل له حملٍ مثل هضبة طميه
والزميل اللي يعذرب في الزماله = عندنا له مسكتينٍ مخلبيه
ناصر آل مهدي
لا تطول في حبالك بالطواله =ما بقا لك عند شخصي مقدريه
يا عميلٍ ما يعرف الا العماله =والله اني مادريت انك كذيه
مضواح بن شتوي
الزناتي وبن غانم وبن خاله= ترجموها فالحروف الابجديه
وانت يا ناصر يلا له يلا له = جر صوتك بالحون السامريه

ناصر آل مهدي
ناسيٍ مضواح عن ماضيٍ مضاله = بين منفوحه وحي العقربيه
بالنيابه يا حبابي بالاصاله =انت يا مضواح حمال الاسيه
مضواح بن شتوي
انت مثلك واحدٍ عنده بقاله = وان نشدته قال وأبشر بالحذيه
العبيدي شاعرٍ راسه هلاله=شاب والدنيا مثل ماهي هيه
ناصر آل مهدي
التجاره مرجله والا انت عاله = في مسيد الراجحي ماسك زويه
والعبيدي طيعيني خله لحاله=قبل ما تسري وفي جيبك هديه
مضواح بن شتوي
ما نسيها كلمةٍ قد قلتها له = الله اكبر عالجهل والجاهليه
والهديه شالها داخل حثاااله =ويتقلب بين شمس وبين فيه
ناصر آل مهدي
ابن شتوي راسه اكبر من عقاله = والله انا ما نحب العنصريه
والرجل ما يشبعه مخرج خلاله = يا أهل راحه ما نبي دروب الخطيه

مضواح بن شتوي
الله اكبر وش فيك من الخباله = والعقال مقيدٍ ذيك المطيه[/poem]


وفي الختام اراد الشاعر الكبير طويق الجنوب إنها المحاوره فإرتجل هذه البيتين :
[poem=font="Simplified Arabic,5,black,bold,normal" bkcolor="transparent" bkimage="" border="none,medium,gray" type=4 line=0 align=center use=ex num="0,black"]

سعيد ابو ديه
يا اخويانا ما بقا غير الجماله = والزمان بخير والذمه بريه
بيض الله وجيهكم في كل حاله = يا هل الوقفات وعزومٍ قويه[/poem]

__________________
[poem font="Simplified Arabic,5,black,bold,normal" bkcolor="transparent" bkimage="" border="none,medium,gray" type=4 line=0 align=center use=sp num="0,black"]
معوض خير ياحي خدعك من الرجال اشكال= تشوف أشكالها وتحطها ارفع من منازلها
تعلم من زمانك لا تصير من أجهل الجهال= ترى في كل يوم تجيك عبره لا تجاهلها
إذا ربي وهب لك عقل تلقى في الرجال رجال= تعرف اللي يطلع قيمتك واللي ينزلها
ترى من بعض ما يندي الجبين ويحرج الرجال=ليا ساق الميانه في نفوس ما تقبلها
ومهما شفت في صاحبك من نخوه وطيبه فال= ترى بعض السجايا كثرة اللإلحاح يقتلها
[/poem]



تجربة شاعر في الحياااااااااة