هذه القصيده وصلتني من شاعرها وأحببت ان أضعها بين ايديكم بمقدمتها التي قالها شاعرها وتحكي عن نفسلها حيث ان الشاعر تركي بن فرحان بن مشوط لا يمتلك عضويه في هذا الصرح الشامخ خدمته بنقلها لكم كما هي وبمقدمتها :

بسم الله الرحمن الرحيم


أعزائي القراء سواءً من نعرف ومن لانعرف أسعد الله جميع أوقاتكم وعذراً لعدم التواصل معكم بكثره عن طريق المنتديات وذلك بسبب عدم إجادتي التعامل مع الكمبيوتر ، على كل حال هذه القصيده بمناسبة تشريف الشيخ سعود بن سعيد بن دليم وقبوله دعوة الأخ الكبير راشد بن عبدالله بن جابر العنابس بالمنطقه الشرقيه في مدينة الدمام ولما يستحقه الشيخ من التقدير والثناء والمدح اللي ماهو غريبٍ في مثله فمواقفه مشرفه مع جميع قبائل قحطان ولحبي له فالله ومعزتي لهذا الرجل بالذات وبوسلطان يستاهل أكثر من ذلك لذلك كتبت هذه القصيده وقلتها في تلك المناسبه والحمدلله وفقت في إلقائها وها أنا أتواصل معكم أعزائي من خلالها أرجو أن تنال إعجاب واستحسان الجميع :


[poem=font="Simplified Arabic,6,black,bold,normal" bkcolor="transparent" bkimage="" border="none,medium,gray" type=2 line=0 align=center use=sp num="0,black"]

الشعر ذا الليل له فُلك ومدار = إتجاهه صوب شيخً له وقار
أنحت بيوته ولي فيه اختيار =أبني القيفان وانحت في صخر
أجذب افكارالشعر وابه ارتقي = أتخير من حروفه وانتقي
كل كلمه بالمعرفه تفرقي =عقد لول وجوهرالماس ودرر
الشوارد جبتها واخترتها =منتقيها والسوالف درتها
جرتها من كل نقدٍ جرتها =لي عليها إقتدار ولي صبر
أقطف زهورالورود اليانعات=والله ماجيب الهروج المايلات
أطلق لساني على شيٍ ثبات = من فضل ربي وله حمد وشكر
أتجنب كل منقود وزلل=أصرف الدولار مابصرف هلل
يوم بعض الناس جعله للشلل=يدخل اسواق المصارف وايخسر
أتجنب كل هزله وابتدع =السمينه جبتها نظم وبدع
درة الياقوت نازعها نزع=أبذل المجهود واغرف من بحر
من صميم القلب والمعنى شريف=من شعورٍ داخل القلب النظيف
جبتها والبن له خرمه وكيف=كيف روس اهل الشهامه والظفر
دلة الرسلان والبن محموس=سقتها في مجلس خفاف النفوس
المقهوي واقف وغيره جلوس=والمجالس عز ودروس وعبر
كب من لايستفيد ولاجلس=مع رجال العرف وطوال النفس
أقتنص منهم نوادر والتمس = كلمةٍ تنفعه في يومٍ غبر
قاله اللي ينثني عند اللزوم =في بحورالعرف سباح اويعوم
أتعب المعنى ويطرحني واقوم = والبعير لحملته قام ايهدر
من هجوسٍ فالوجود لها وجود =ماتقلط غير هرجٍ له شهود
السعد ذا الليل في جية سعود = جيته كنها المزون ام المطر
بالنيابه عن رفيقٍ له مجال = في علوم المرجله بين الرجال
مرحبا عن راشدٍ ذرب الفعال= في محلٍ جود راعيه استمر
أبن عمي شاقني فعله وزاد= شاش راسي من علومه واستزاد
فرحة الظيفان ذباح الجياد =وان لفاه الظيف يبشر بالسفر
عند ربعي يوم كلٍ له وقار =ربعي اهل العز والماقف شنار
أثني الترحيب بطوال العمار=وانت ياابن دليم في وسط الصدر
أحمدالله لابتي عند اللزوم =هم هل الطالات وافين السلوم
سور حدان البلد من روس قوم=عطرنا فالحرب بارود وذفر
جدنا سنحان ويامٍ حدنا =وسدنا ما احدٍ يبيح سدنا
لوتروح علوم ترجع عندنا =والعنابس جمعهم يجلى الكدر
حن هل النظرات وبعاد الشبوح =والشرايع عندنا ماهي تروح
حن عما العادي مشيدة الصروح = حن هل الردات في يوم القشر
نارد حياض المنايا ما نهاب =نطرق ابواب المراجل باب باب
وان قنب ذيبٍ تجاوبه الذياب=تشهد الوقعات وحروب القهر
عقب ذا يامرحبا باللي لفا =بالظيوف اهل المعزه والوفا
مرحبا منا ليا حد الشفا =بالعموم ومن بمجلسنا حظر
مرحبا ترحيبةٍ مخٍ وراس =مرحبا ترحيبةٍ تجلى العماس
كنها الفنجال والصافي يقاس =مايصب الا من دلالٍ صفر
مرحبا وعداد من صلى وصام =عد من هلل وكبر واستقام
عد مافر الفكر ولا استهام = عد حبات السنابل والثمر
كلمتي بتلوقني والوقها =والجواهر في وسط صندوقها
لازم اوف الرجال حقوقها =كل رجلٍ له مقام وله قدر
ذكر ابوسلطان برق مشتعل = والحقايق مايفبركها الزعل
ماجحد شيختك ياكون الثعل =أنت صقرٍ في سما العليا شهر
آل ابولعثه شيوخٍ لقحطان =أبشر بربعك معك في كل شان
حن سيوفك فالقسا ولا الليان =حن دروع الجنب ورماح الخطر
وانت راس المجد تاريخك بياض = شهدلك ياشيخ حكام الرياض
برق عرفٍ لاح نوره ثم ناض = جنبنا اللي فالملاقى من حجر
من سلايل عودٍ الله يرحمه =شيخنا شيخ الشمل ومقدمه
السعد فاله وباسمه وسهمه = يشهدون الناس بدوان وحظر
ياعقيد القوم من دون العقيد = نفتخر بك بين الاجناب ونزيد
ياصحيح الفكر والشور السديد =شيخنا اللي فالمواقف معتبر
ياعريب الجد والساس العريب =ياصليب الراس والراي الصليب
مزبن الخايف وفكاك الطليب = مدرك الصعبات في عسر ويسر
دون ربعك واقفٍ في كل حال = شجرةٍ فيها الذرى وابها الظلال
تنثني دون المواقيف الثقال = يوم غيرك غايب وماله عذر
المدايح ماتبي غير اهلها = وانت ناموس المدوح وجملها
سلةٍ متنومسٍ من سلها =سدها في حدها موتٍ حمر
المدايح مننك وعندك واليك = شيخنا اللي فالمواقف نرتجيك
أشهد ان المدح في غيرك ركيك =مدحة ابن دليم مافيها فخر
قلتها والمدح فيكم مايضيع= سيفنا البتار والحد الوريع
اللسان الذرب والسد المنيع = لامسك صفه يشوقون النظر
سيرتك عطره على خُلقٍ نبيل = شيختك فطره ولاتبغى دليل
منزلك عالي ولك شبرٍ طويل = واشهد انك بين خلق الله صقر
مدحتي ماهي غريبه فالشيوخ = الجبال الشم والراس الشموخ
قصر عزٍ مرتفع ما هو بكوخ = بيت عزٍ ذاع صيته واشتهر
الكلام امن اولا ماهو جديد = شيخةٍ متسلسله مثل الحديد
كل تيدٍ وارثٍ من راس تيد = والجبال تدوم مادام الدهر
شمخ النيبان في حقك قليل= يوم غيرك شيخته برزات ليل
بيرقٍ مشهور فرسانٍ وخيل = والشيوخ ترد لك علم و خبر
والعذر لو كان جا فيها قصور = أبني بيوت المعزه والقصور
اجتهادٍ والفلك فيني يدور = لين جبت الراس وفقار الظهر
أربك الشعار لا جاو ابعدي =ومن تقدم قام حظه وايعدي
مزنةٍ غرا تهل وترعدي= متعة السمار في ليل السمر
رحلة الدنيا إيابٍ ثم ذهاب =الرحيل الغصب والمرجع تراب
كل خلق الله تجهز للحساب = يالله اني طالبك عفو وستر
ختمها صلوا على محمد شفيع= أمته والخلق في يوم ٍ مريع
النبي المرسل اشرفنا جميع = والشرف ينحاز له بطن وظهر[/poem]
تركي بن فرحان بن مشوط العنابس القحطاني

شكرا ً لك أخي أحمد والله يحيك في مجلس عذب الكلام .

وكذلك شكرا ً للشاعر على إجتهاده وأبو سلطان الشيخ :سعود يستحق المدح وكفؤ له .

خالص شكري للجميع...........................

__________________

صح الله لسان القايل


والناقل


قصيدة رائعه


وانا كنت ممن حضر في ذلك اللقاء

الذي كان مميز عند الاخ راشد بن عبدالله صاحب الايادي النديه


وكانت قصيدة رائعه


اختيار موفق


ولاهنت

لاهنت لا عدمناك

__________________