تحيه للجميع

قصيدة رثاء في الشيخ/مترك رحمه الله




[poem=font="Traditional Arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
،، ،، ،، ،،


يالله ياجابر عزا كل منضام=ياواحدٍ ماترجي الناس غيره
ياعالم غيب الليالي والايام=ياجابرٍ كسر العظام الكسيره
انت الذي حكمك علا كل الاحكام=وماتحكمه نرضاه شره وخيره
اجبر عزا اللي يسهر الليل مانام=يونس على المعلوق مثل السعيره
اللي غدا ليله تفاكير واحلام=وعينه تحاير بالدموع الغزيره
يكنى مايونس في ضميره من الام=وانت الذي تعلم بما في ضميره
اللي فقد له شيخ ماهوب ينلام=لوينقضي عمره وعينه سهيره
خسارة ماهيب تحسب بالارقام=ولايعوّضها فلوس وذخيره
لو العمر واستغفر الله ينسام=سمناه في يومٍ تقّطع غثيره
مصيبة كبرت على الخاص والعام=مصيبة سارت على كل سيره
وتناقلوها اهل الصحافه والاعلام=وتعالموا فيها شعوب الجزيره
والمملكه عزّوه شعبٍ وحكام=وقحطان عزّو فيه من كل ديره
حتى ولو صابت هل الشرق والشام=لكنّها على عبيده كبيره
في فقدهم زيزومهم عوق الاخصام=لاجاء من الحف الموالي نذيره
شيخٍ ماهي شيخة ملايين واختام=يابعد من ينطح وجيه المغيره
حكيم راي وفي المهمات جزّام=الوقت يشهد والمواقف شهيره
لافاق حجم المشكله كل الاحجام=وتباصروا فيها الوجيه السفيره
وقل الحكى والراي في فتل وابرام=والراي عوّد في النهايه لاميره
واحتاج حل المشكله عزم واقدام=يديرها اللي كل رايٍ يديره
شيخ ينومسنا مقامه لياقام=واستدرك الموقف بحزم وبصيره
من خلقته مأخلف تعاليم الاسلام=خوف من اللي عالمٍ بالسريره
هومنقذ المسجون من حكم الاعدام=وملجا لمن قصّر زمانه مسيره
هونجدة الملهوف هو ريف الايتام=عون الضعيف اللي يدينه قصيره
يالله عسى مثواه في جنان الانعام=ياواحد ماخاب من يستجيره
وعسى العوض في اللي لنا درع واحزام=طالت عمار مكمّلين المسيره
ويديم عز اللي لنا عز ووسام=مادام حيٍ ماعلينا قصيره
والموت حق وموعد الحي قدّام =والحي لابدّه يواجه مصيره
واختامها صلوا على سيد الانام =اللي هدانا للدروب المنيره
اعداد ماهبّت ذعاذيع الانسام=واعداد ما غنّى حمام الجديره.



الشاعر/ابن حبشــــان[/poem]