أأأأأرحب ياذيب تراحيب المطر

مشكور وما قصرت على الرد على الابيات وكنت اتمنى اشوف الأفضل وعدم تكرار بعض قافية العجز

وبالنسبة لقافية العجز في البدع فهي الواو الساكنة المفتوح ماقبلها وليست الواو الساكنة المضموم ماقبلها كم في عدو .. بدو .. قدو .. وهذا مايعتبر منك قصور

وحبيت اقول لك ثلاثة معاني إهدااااء مني لك

والأولة ..

شاعر وترضخ لي صعيبات الأوزان ... ياكيف ماترضخ وأنا من عبيدة

حنا عدود الشعر من ماضي أزمان ... أهل الشعر وأهل الصفات الحميدة

.. ولا على القاريء زود

والثانية ...

طبيت في سلمنا وماجور @ وبشر عسى مابه اخلافي

حزنك بدا يكشف المستور @ وشوفتك ياذيب تنعافي

ترمي كلام (ن) بدون اشعور @ ولا همك اللوم والقافي

وأعرف ترا ذا الزمان ايدور @ وماحلبك مثقل اكتافي

إن جيت أنا الصاحب المخبور @ وإن رحت مابه تحسافي

مبصر ولاني بحقر العور @ وأرقا على كل مشرافي

ويازين ستر الله المستور @ ونعيش في ظله الضافي

اليوم دنيا وبعدها اقبور @ ومن ظلمة القبر ياكافي

والعرض في يومها المنشور @ وسبحان من يظهر الخافي


والثالثة ....


مادمت تقصاني لا والله تسمع .. والخيره فيما اختارها عالم الغيــب

هذا أقتناعي في فؤادي تربـــــع .. ولا لك ورا أفكاره حقوق ومطاليب

إن جاز لك مضمون فكره تنفع .. حصيلته ناتج دروس وتجاريـــب

فكم راس من صكات بقعا تكمع .. وآلمه شيبه تو بدري على الشيب

وكم لآش من بين النعايم تربع .. وكم قرم عاش امع الزرا عيشة الذيب

العايب إن شاف المعيبه تشجع .. والكفو مايقبل على نفسه العيب

وحي الطبيعه لعنبو من تطبع .. إن دام له يومين ثالثهم ايخيــب

وش لي بوجهن كل يوم ايتنوع .. وعن المراجل له كفوفن معاطيب

صدري من معاتب جنابك تشبع .. ايس مدايح كلبوها عذاريــب

ولا صار ماعندك هروجن تشجع .. ترا الصكات ابرك من الهرج ياذيب

عن العتب واللوم حاول ترفع .. وليا بغيت أزهم وتلقاني امجيب

عيني لونها لكل عثره تتبع .. كان أجفلوا بعض العرب والاصاحيب

أأدخل على الله وارتجي وآآتشفع .. عن الشماته يقصر ابعيد وقريب

لا واهني من في جنانه تمتع .. ولا واعذاب اللي شوته اللواهيب



وسلامتك .و.سعدت بمعرفتك ياذيب وأعيد وأكرر ثق ثقه تامة أن الشعر أصيل ومن منبع تخصص اللغة العربية ولو تبيها على الفصحى جيناك بالفصحى .. لاهنت على مرورك العذب وسلمت ولاندمت