[poem=font="Simplified Arabic,6,black,normal,normal" bkcolor="transparent" bkimage="" border="none,4,gray" type=1 line=1 align=center use=ex num="0,black"]
يالله ياللي عالم بكل الاحوال= يامن له العالم عبيدٍ تطيعه
ياخالق اجيالٍ ويامفني اجيال= ياباسطٍ سبع ٍ وسبع ٍ رفيعه
يارب جاني بغربتي مثل زلزال= كن الحنايا من اثرها شليعه
قالوا توفى جدك وبكره يشال= قلت الله اكبر من عظيم الفجيعه
يارب ثبتنا لامن جات الاهوال= ويارب لطفك من خطايا الجزيعه
ماحتالت الدمعه ولا جسمي احتال =هليت دمعي للي حبه طبيعه
لاحدٍ يلوم الدمع لا صار همال= بعض المواقف في اثرها فضيعه
نبكيك ياشيخ ٍ رقى النايفة وطال= ياللي مكانك دايم ٍ في الطليعه
ياجد تبكيك العرب حضر ورحال= وتبكي الصبيخه والعزا بالرفيعه
تبكي الذي فعوله سمينات وجزال= بدَا خويه لو حلاله يبيعه
لاقال شي ٍ برهنه لك بالافعال= صادق ولا يعرف طريق الخديعه
ماسكَر ابوابه ولا لدَها اقفال= يامتعبٍ ناس ٍ تقلد صنيعه
زال العمر لكنَه الذكر مازال= طِيبٍ بقت كل المنابر تذيعه
نسل الشيوخ اللي زحازيح وابطال= روس ٍ تقداح للملاقى شجيعه
لا مات شيخ ٍارتكى عقبة رجال= زحولٍ تسابق للمراجل سريعه
اخوان رثعا اللي رقا طيبها وجال= ربع ٍلهم في الطيب نهج وشريعه
ويالله يامنزل تبراك والانفال= ويامنزل عمَى ومنزل تبيعه
ترحم لنا شيخا عن الدين مامال= ماحاد لاشايب ولا في ربيعه
رجِحَ موازينه لا جا وزن الاعمال= واجعل نبيك بالقيامه شفيعه
وختامها صلوا عدد وابل سال= على نبي ٍ مرسلٍ للوسيعه[/poem]