[frame="5 80"]بسم الله الرحمن الرحيم
اخوي العزيز عبدالمحسن
ارجو ان لك من اسمك الكثير فانت احسنت بدراج السناريوو للقصه ولكن القصه تخللها اضافات اعرف انها من كثر تداول القصه التي غيرت من ملامحهاا الكثير
1: متى وصل الدربيل لمنطقة جزيرة العرب والواضح من القصه انها قديمه لاستخدام السيف في القتال
2: الرجل الجنوبي من صفاته وفعله وسهره على خويه وهو نايم وحرصه الشديد بتصحيته خويه كل ما حس ان فيه خطر عليهم
3: شجاعته في القتال يقول الشمالي( انت من صوب وانا من صوب) هذا يدل انه استطاع انه يرد نصف القبيله لايهم العدد الفارق بين المقتولين في الجانبين
4:رجل ينطح (يقابل) له نص قبيله يغدر برجل من الخلف؟؟؟
5: وهذا المهم
اهل الجنوب عرف عنهم اخلاصهم للخوي واظنك تعرف قصصهم عند الخوي 0
6:راح اسرد لك القصه بختصار وهذا ما اعرفه ولا ادعي اني اعرفها كما وردت ولكن اختلاف الرأي لا يفسد للود قضيه اتمنى ان يتسع صدرك لمداخلتي
7: الشمالي كما سمعت كان على ذلول وليس على فرس ولم يحصل لهم قتال في الطريق
القصه كما اعرفها انا
ورد الشمالي على العد يبي يسقي ذلوله وكان الجنوبي يسقي ابله عليها وطلب منه الشمالي يسقي ذلوله قال ما انت بوراد لين تخلص البل وفعلا صبر الشمالي وخلصت البل وتقدم الشمالي يسقي ذلوله واسقاها
طالع فيه الجنوبي وقال ليش ما زعلت ولا خذيت سلاحك دون مشرب ذلولك
فرد عليه الشمالي بهدوء اهل الشمال
وهنا خانتني الذاكره هل كان رد الشمالي بيت شعر او رد عليه مردود عادي ولكن الرد كان يبين ان اهل الشمال يمتازون بالصبر اكثر من اهل الجنوب
وفعلا مشى الشمالي والجنوبي يفكر في كلامه واخيرا قرر انه يخاويه ويعرف معنى كلامه
لحق الجنوبي بالشمالي وقال يا الاجودي ودي اخاويك قال الشمالي حياك الله وفعلا تخاوو في الطريق
وكانو يمشون وبعد مسراح يوم قال الجنوبي للشمالي انا تعبت من المشي ابي اركب الذلول __ يختبر هل الشمالي بيثيره على نفسه__ وافق الشمالي على ركوب الجنوبي وبعد مسافه قال الجنوبي كلاني الشداد ماعليه وقا نوخ الشمالي الذلول وحط في خرج كان معه تراب وانتم بالكرامه على شان ما يعور خويه واستمرت الرحله ومره ثانيه طلب الجنوبي نفس الطلب الاول يبي يبحث خفاه
واستمرت الرحله حتى وصلو ديار الشمالي ومع مغيب الشمس وكان الحلال مفلي وكل حرمه مقابله حلال زوجها وكان العبد عند حلال الشمالي وصاربين الحرمه والعبد اللي صار كما اوردت في القصه وفعلا صار الحوار بين الشمالي والجنوبي ليش ما تذبح العبد والمره قال لا ماني باكسب العيب والمنقود غيري بيكفيني بس انت اسكت كنتك ما شفت شيء
فعلا وصلوا عند اهلهم ورحبو فيهم وجلس الجنوبي على النار مع ربع الشمالي والشمالي قام لزوجته وقال لها كل شيء انه شافها مع العبد بس اذا هي تبي السلامه تسوي اللي يطلبه منها وافقت الحرمه وقالت ويش تبيني اسوي
قال اذا اجتمعو الجماعه واصتك المجلس فناديني بصوت عالي يافلان انا ابيك تعذرني وتطلقني انا طامح منك
واذا اعتزيت وقلت لك من هو اللي اطيب ومني واشاقكك قولي فلان ويقصد واحد من ربعه عرف عنه الخسه مثل ما في كل القبايل زكاه
وفعلا سوت المره ما طلبه منها زوجها وقال تهبين من هو اللي اطيب مني واخترتيه قالت فلان قال الشمالي يستاهل فلان وطلقها
قالو جماعة الشمالي يافلان مرت فلان طمحت منه لعيناك ويش بتعوضه قال بعوضه عدد من الابل لا اعرف عددها وقيل انها عشرين
تزوج رفيق الشمالي المره والجنوبي يتابع الموقف وهو مستغرب اللي يصير
وبعدها بايام قام الشمالي وخذا العبد وعرضه على الجماعه وفعلا قالت الحرمه لزوجها الجديد يافلان اشتر العبد تراه جيد وفعلا شراه بعدد من الابل
وفي ثاني يوم الزوج الجديد حصل العبد مع المره وقتله وقال الشمالي لخويه شفت ان كلامي على العد صحيح ان اهل الشمال يمتازون عنكم بالصبر
قال الجنوبي صدقت وستاذن من معزبه يبي يرحل قال الشمالي لخويه مانت براحل الا بكره الليله نتعلل وبكره يصير خير
وفي الصباح اخذ الشمالي الابل اللي اخذها في زوجته والعبد واهداها لخويه الجنوبي ورحل الجنوبي
اتمنى اني قد وفقت في سرد القصه واتمنى اذا كان هناك من يعرفها افضل مني ان يصحح معلوماتي ولكمو مني جزيل الشكر [/frame]
اخوك قريشي وخاله سليماني
التعديل الأخير تم بواسطة مسفر بن حسين بن نومه ; 26-03-2006 الساعة 03:15 PM