[poem=font="simplified arabic,5,green,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
يا ذيب ياللي تعلّيت المراقيب=ما جبت لي علم عن ذيبٍ تعداك ?
ذيبٍ يعشيه ناب العز والطيب=زاد بْعلوم المراجل عن مزاياك
لا قلت نشمي على اسْمه تربية ذيب=ذيبٍ ولد ذيب بالافعال شرواك
من يوم روّح بقدرة عالم الغيب=في داخلي كل ليله صيحة عواك
ودي اخاويك لكن فرية الجيب=شوفك يطرّيه لي وادعي بفرقاك
لكن خلك وجاوبني وانا اجيب=اعْواي همّ وحزن وعْواك عشاك
فرقى الحبايب يهزّ القلب تعذيب=ياليتني معك يا نشمي ولا نْعاك
من بعدك اشوف دنيايه مكاذيب=لانّي مكذب خبرك اللي تولاك
ماني مع الناس لآ اودّي ولآ جيب=بالجسم معهم ولكن عقلي هناك
في مجلسك والسوالف دون ترتيب=عفويةٍ ودّها ماتْفارق شفاك
وْقصايدك والرسايل والمكاتيب=وْشاطي بحر ينبع المشتاق لقياك
وْضحكاتك المشرقة بشفاك ماتغيب=وان ضقت محدٍ يشوفه من محياك
ياكثر ما زارني من بعدك الشيب=وْياكثر ما زرتني والحلم ملفاك
لا مرّ طيفك عليّه وضعي صعيب=وارتاح له وان توخّرت آتحراك
والله مانساك مع كثر الاصاحيب=حتى ولو جنّ عقلي منك مانساك
لو القدر فيك تكفيه المطاليب=يا كثرهم فالوطا ياخذهم فداك
ياجعل روحك شذاها العطر والطيب=وْرحمات ربي عن النيران تاقاك[/poem]