[poem=font="Simplified Arabic,5,black,bold,normal" bkcolor="transparent" bkimage="" border="none,medium,gray" type=4 line=0 align=center use=ex num="0,black"]
مد النظر كم تبصر اشكال واجناس=وفيها كمال ابداع ماشي يخلٌه
وبيده تعالى افراح خلقه والاتعاس=والكل يرجي رحمته خاضع ٍ لٌه
والخير خير الله هنا ساير الناس=وعيش السعد ماظن عاقل يملٌه
الوضع في تونس وفي مصر محتاس=ومده طويله لين يآخذ محلٌه
وتجرعت في ليبيا المر بالكاس=وعقيدهم زود على الطيب بلٌه
ولا عاد وقت ٍ بين هم ٍ ووسواس=يوم الفتن ومزونها مستهلٌه
ولاجات بالطلبه ولا جاك عساس=كود بسيوف ٍ مرهفات ٍ مجلٌه
عبدالعزيز اللي ملكها على ساس=ولم الشتات بدولة ٍ مستقلٌه
حدد معالمها على قب الافراس=وعزُز حبيب الله وغاض المضلٌه
ومن بعده املوك المعزه ونوماس=نوماس للدوله وللشعب كلٌه
وفي ظل ابو متعب تزاهت بالالباس=وياجعل ماقدم لها شافع ٍ لٌه
اهدى لها المرجان واللول والماس=على ثراها ينثره كل حلٌه
عون الضعيف اللي برا حاله الياس=وعماة عين اللي دروبه مخلٌه
جمايله غبة بحر ماله اقياس=وفزعته تبري كل جرح ٍ وعلٌه
وسيرته تاريخ ٍ يخلد ونبراس=لاهل المعزه والشرف والجبلٌه
ولاباس منصاها ملكنا ولا باس=بعد النجوم المرقبات المطلٌه
وعداد ماسامر دجا الليل جلاس=وعداد مايشتاق خل ٍ لخلٌه
اقولها من قلب وشعور واحساس=ومن ناظر ٍ شوفه ترا مايملٌه
وجعل السحاب اللي تقدمه نسناس=مجدول غيثه فوق قصر يفلٌه
ويسلم لنا سلطان جوده قطع ياس=حلم العديم اللي حياته مملٌه
ونايف وللنايف من الطير قرناس=ومن حومته هيبته حتى بظلٌه
وانا صبي قحطان والعز له ساس=وقحطان فاللازم نجوم ٍ مهلٌه
وكل القبايل مالحق عزها افلاس=وفيها الوفا والطيب دقه وجلٌه
ولاجا النهار اللي به الضيم والباس=والدرب عيا كل غاوي يدلٌه
دون الوطن حنا عساكر وحراس=وصف ٍ تكاتف ماشكى من مذلٌه
تمت صلاة الله على صفوة الناس=نبينا اللي ملته خير ملٌه[/poem]