بسم الله الرحمن الرحيم

والصلاة والسلام على سيد الانبياء والمرسلين وعلى اله وصحبه اجمعين وبعد

هذه قصيدة جديدة للشاعر الشيخ / حامد بن علي بن مايقه ال حثيث في قبيلة الحباب والجحادر وقحطان كافة وذلك

لاجتماعهم المشرف خلال حفل القبيلة في قطر بمناسبة اليوم الوطني :


[poem=font="Simplified Arabic,5,black,bold,normal" bkcolor="transparent" bkimage="" border="groove,medium,chocolate" type=1 line=0 align=center use=ex num="0,black"]
يا الله المطلوب يا منشي السحاب=يا عظيم الشان يا الرب الرحوم
دلنا للمنطق اللي ما يعاب=واهدنا للي يجنبنا الوهوم
يا الله اني طالبك خطوا حقاب=مدلهم وفي مقاديمه ركوم
في مقاديمه بروق في رباب=مقبلات ومسبلات في غيوم
ممطرات ما تغيرها المهاب=والحريثي عقبها يصبح يعوم
في قنوفه مثل قرطاب الدباب=عند ما قبل علينا بالهجوم
واكتسحنا مقدمه مثل الضباب=وامتلت منه الملازم والحزوم
موتت فيه الافاعي والدواب=والطواهش ما بقى فيها سلوم
والفحل جدد هديره للضراب=سمنت البل والغنم تاتي بتوم
جعلني ما اذوق حزن ابو شهاب=محزمي لا دبروا بعض الرخوم
عين حر وفيه كفين العقاب=وان تحرك طار منه كل بوم
وان تكفل ما يحاسب للحساب=زادنا عنده نسانيس العجوم
اطمحي له يا مكثرة الخضاب=واصفقي له بالمعاصم والكموم
المراجل ما تخزن بالعياب=بالمبادي عيدها حر السموم
والفلوس اللي نجمع للذهاب=والنفوس اللي نغذي ما تدوم
والحياة اختامها مثل السراب=نصفهم بين الحوادث والدعوم
والتواضع للرجال اجمل ثياب=والبلا بين التكبر والرموم
والحقوق لها حلوق ما تغاب=بالمحاضر ما يغطيها الوجوم
والعوارف ما يطبون المطاب=ما يطيعون النقيلي والنموم
النقيلي سوسة في راس ناب=يقمع المداح ويزيد الذموم
فيه ناس شغلهم نيبان داب=يجعلون السم في جوف الزهوم
فرقونا بالنمايم والكذاب=يشترونه من حلال اللي يسوم
يا سلام الله على روس الحباب=المناعير الصناديد القروم
والتحية للكبار وللشباب=وللصغار وللفخايذ بالعموم
جعل قلب ما يفز لهم يصاب=بالتشنج والتجلط والهموم
الحباب اللي يهدون الصعاب=والحباب اهل العوايد والسلوم
والحباب اللي يعنون الركاب=يوم صلفات المغازي والعلوم
والحباب اللي يعشون الذياب=باللحم يوم المصوب ما يقوم
والحباب اللي يعدون الخراب=للمعادي يوم شقاق الهدوم
والحباب حدودهم روس الهضاب=يوم بن مهمل مسويها رسوم
موحشات و دونها قطع الرقاب=من ورا المجبى وشرق من سروم
والشريفي دونها مثل الحجاب=بالسرايا الدهم والحرب الدهوم
والعلوم اللي مخلفها جراب=مثل وهاج الكواكب والنجوم
والحباب اللي يقولون الصواب=والكذاب اللي يسطر ما يدوم
بالمعارك ما يخلون المصاب=ينقلونه ويتحدون الخصوم
خنجر مسنونة ولها نصاب=راسها بين الخناصر والبهوم
والجحادر ربعنا من كل باب=سيفنا اللي ما يحصل به ثلوم
الزحول اللي يسوقون الحراب=يشبعون بها الطيور اللي تحوم
مجدهم حتى ولو شاب الغراب=ينحكى به كل ليل وكل يوم
متعبين الهجن والخيل العراب=بالحروب حرابهم ماهي تصوم
لو يوزع مجدهم فوق التراب=صار في وجه الثرى مثل الوسوم
الجحادر كوكب فيه التهاب=من نظر له ما تبقى فيه نوم
يا عيال العبدلي عندي خطاب=بارسله صوب المناعير الدسوم
من صدوق ما يبي فيها ثواب=دهن عود وينثره فوق الخشوم
اقبلوها يا عزيزين الجناب=واذكروها يا قويين العزوم
ريضوها عندكم عدة وجاب=وافحصوها بالمعاني والرقوم
من غلاكم ما يكدرها عتاب=جوهر فيه الزبرجد والكروم
وقحطان اللي عليهم الانتساب=درعنا اللي نلبسه وقت اللزوم
شمسنا اللي في سمانا ما تغاب=ملتجانا من مصايب كل قوم
والتواريخ القديمة في كتاب=عندهم ساس المشيخة والختوم
وزعوها يا المناعير الطياب=من ورا تثليث لى ضلع البقوم [/poem]