لا هنت ياعز الخيل
كفو والله بصبيان قحطان .... خيالنا عن ثمانين خيال
وانا الصراحه قيمت الموضوع على انه خمس نجوم
وفيه بعض التفاصيل في المعركه ماكتبها السديري الله يرحمه وذلك لحكمة منه ربما
والقصه الصحيحه والكامله سمعناها من شيبان راوينها بالتفصيل عن ابوانهم عن جدانهم ... اللي كان مع الملك وعرف وش صار في معسكر الملك
واللي كان مع جيش ابن سعود وامتنع عن القتال .. وكان يبي ينذر شالح غير انه جودوه واحبسوه في خيمه
وفيه بعض اللي طراهم شالح في قصيدته ارادوا الانتقام لذبحة شيخ من شيوخهم ووزوا الملك .... فقال الملك اخبر شالح بن هدلان في ذا المكان اللي تبون تغيرون عليه .... فقال له واحد من العداة لشالح ... لا مهو بشالح ياطويل العمر
فامرهم الملك باخذ الزكاه ... وكانت النص تقريبا ... فراحوا ذولا وكانوا يعرفون اطيب ابل شالح عنده ... واعزلوها متعمدين الاهانه
وصارت القصه المعروفه عن الحوار اللي صار بن شالح وولده ذيب ووش اتفقوا عليه
فراح ذيب ورجع البل غصب ... ورجعوا العداة وهم كانوا من اكثر الاخوان .... وقالوا للملك ترا البل طلعت لشالح وعيا يؤدي
فنهرهم الملك وقال .. ماني بقايل لكم لكونها ابل ابن هدلان .. المهم قيد مافيه رجعه وبتصير فضيحه على الملك لو رجع بذا الطريقه
فقال اخذوا البل كلها غصب
وبعدين صار اللي صار
وفيه واحد من بني عن ذيب سموه المعترض .. لانه ذيب قال له انا خلني لكبار القوم ( لاعاد ليله .. مثل عنتر ومثل ناصر بن عمر .. اول مايبدأ يالشيوخ ) وانت اعترض اللي بيجيني من الباقين
وقام المعترض .. والله اني ناسي اسمه لكن الشيبا عارفينه .. ولمنه جا الربيع وخيمنا مع الشيبا ان شاء الله جبت لكم اسمه .. الا اذا فيه واحد يعرفه الحين يقول .. المهم قام المعترض وثعا في الباقين .. وتواجه اثناء المعركه مع ابن اجلوي .. مهو بالمذبوح لا اللي حكم الشرقيه .. وصوبه وطرحه من حصانه وجا يبي يذبحه .. فقال ابن اجلوي والله ان منعتني .. اني لجازيك خير الا مني حكمت .. فتركه المعترض ......... ودارت السنين وصار على المعترض او احد اهله حد او قصاص .. والله مادري .. المهم ذكر ابن جلوي في السالفه .. وعفا عنه
انا تكلمت عن المعترض لانه سالفة ذيب البزران عارفينها مايحتاج اعيدها
ويقولون حصان ذيب ياما راح وياما جا .. وكله بصيد .. يفل الجمع اهمته ... مغوار مايعرف الذل
وعلى طاري الذل .. واحد من جماعتنا يقال له خالي الجوف .. الى سمعهم يطرون كلمة الذل .. صاح فيهم .. لعنبوكم الذل ويش هو الذل ويش هو .. ابي احد يعلمني ويش هو الذل ........ من زود النعاره ..... وهو اللي ذبح ابن فرزه واحد من اشهر عقدا آل مره
وباقي التفاصيل يوم شدوا من ليلتهم واشيا كثيره مافيه لزوم لذكرها
ارجو اني ماطولت عليكم
اخوكم
إبن الأروق