الاستاذ الكريم .. مخاوي سهيل

اولاً السلام عليكم ورحمة الله وبركاتة والله يمسيك بالخير والعافيه.

ثانياً أشكرك على المجهود المبذول منك تجاه هذا المنتدى والكل يشهد على ذلك.

ثالثاً لاحظت في ردك على الأخ فارس قحطان بشأن إستفساره عن نادي الفرسان وكان من ضمن ردك ( ربعي في السراة مايعرفون الخيول إلا في التلفزيون) هل قصدك بكلمة ربعك أي اخوياك في النادي مثلاً أم قصدك أهل السراة عموماً.

إذا كان قصدك هو الأول فهذولا أخوياك وأنت ابخص بهم.

أما إذا كان قصدك الثاني فدعني أوضح لك بعض النقاط الله يرضى عليك.

كان يوجد فيه خيول من قبل عشرات السنين في السراة وخصوصاً عند آل معمر وعلى سبيل المثال آل فردان شيوخ آل معمر وكذلك بعض العوائل على سبيل المثال آل ناجي في قرية الزهره آل سليم شيوخ آل الصقر من عبيده وكانت يعسفونها عندهم ويستخدمونها أيام الحروب ولكن ياطويل العمر بعد ماحل الأمن والأمان بدت الناس تنشغل في كسب الرزق وأهملت هذي الخيول إلى أن بادت. وذيك الأيام من هو اللي عنده خيل تعرف أيام فقر وضيقه في العيش. ولكن أتفق معاك في حاجه انها ماكانت منتشره بشكل كبير جداً ولاتنسى إعتماد بعض القرى في السراة على الزراعة هذا ماحدهم على الثيران والبقر لزراعة الأراضي وإن جيت للباديه خاصة صوب الجوف وورى الجوف تشوف النياق وذيك البل الزينه.

وعلى الصعيد الخاص شاركت أكثر من مره في سباقات الخيول في الرياض والطائف وحصلنا على مراكز طيبه.

ورحت زيارات لخارج المملكه لزيارة إسطبلات عالميه.

وكرمنا الأمير سلطان بن محمد بجائزة في إحدى سباقات الخيل.

في السراة عندنا أبشرك كل شي موجود ومستفيدين منه مثل: الطليان والثيران والبقر كانو يستخدمونها بعض القرى من اول وخيول ونياق وكل بهيمه لها فائدتها.

والله الكلام اللي ذكرته فوق ماهو مدح لنفسي لا والله ولكن كنت أبغى أوصلك معلومه للإستشهاد فقط بما كتبته وإني عكست صوره مشرفه عن المعمري العبيدي القحطاني داخل البلد في سباق الخيول وخارج البلد ( مع العلم بأنني ادخل السباقات بإسم مستعار - لحاجة في نفس يعقوب ). وأعتقد إني من ربعك نجاحي هو نجاح لكل قحطاني.

وإن شاءالله راح أنزل موضوع عن الخيول في القريب العاجل.

وأتمنى منك لاتفهمني بشكل خاطئ كل كلامي هنا هو للتوضيح فقط. ولكن إحترامي لك ولقلمك هو الذي دفعني للكتابه ياعزيزي الكريم.

وتقبل أطيب تحياتي..


أخوك / ناصر المعمري

__________________
الباب الاسود !!