[poem=font="Simplified Arabic,4,black,bold,normal" bkcolor="transparent" bkimage="" border="double,thick,blue" type=4 line=0 align=center use=ex num="0,black"]
قصيدة رثاء في الشيخ/ سرحان بن فهد ال عيفان القحطاني (رحمة الله)
للشاعر/ هادي بن ناصر ال عيفان القحطاني

يا قلب لا تكثر عليك التفاكير = ارتاح من كثر العنا والعذابي
لا تصير للهاجوس ورد ومصادير = تلعب بك الأفكار والغيب غابي
الغيب يعلم به ولي المقادير = اللي كشف سر الخطا والصوابي
وما قدر المولى على العبد بيصير = ماعنه والله في الحياة اجتنابي
و الاحذار ما تنفع ليا وقف السير = لا دقت الساعة وجف الكتابي
وقول يا ليت الها على القلب تاثير = وقولة لو انه ما تسد الجوابي
لكن هاض القلب وابدى التعابير = من ضيقتن وصط الضلوع المحابي
من فقد من هو ما يحسب الخاسير = عز الله انه راح منا وغابي
اللي سميه في طويل الشناتير = قامت تسمى به عيال الذيابي
سرحان لما هج تالي المضاهير = يثني ليا ما درهمن الركابي
عمي وابوي ولا تحلا به الغير = وانا ومثلي من فراقه مصابي
مرحوم يا شيخ يقود الطوابير = عليه دمع العين غرق ثيابي
خلوه عصر السبت بين المزابير= وغادر من الدنيا لدار الحسابي
يا الله عسى قبره ورود ونواوير = في جنة الفردوس مع الصحابي
لانه من اهل الخير مذكور بالخير = والخير في وجهه عزيز الجنابي
يا ما بكى فقده عيال مشاهير = ويبكونه الأصحاب شيب وشبابي
ويبكونه الظفران من صبح لاعصير = وتبكي عليه مخضبات الخضابي
وتبكيه ذوده دقها والعاشير = وتحن من فقده وطول الغيابي
والمجلس اللي به دلال مباهير = والعود الأزرق عقب فرقاه ذابي
وعسى العوض فيه العيال المناعير = اللي لهم في الجود والطيب بابي
الكل منهم موقفه موقف الزير = عز الرفيق وللعدو سم دابي
والموت حق ولا عن الحق تغيير = ويا الله بحسن الخاتمه والثوابي
وصلاة ربي عد ما غرد الطير = على محمد عد ما انشى السحابي[/poem]

__________________
تفرقت أنا وياه فرقاء بلا مرجاع *** كما يفارق الميت من الحي لا راحي