[poem=font="Simplified Arabic,4,black,normal,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
يا سموم القيظ والا يا الرياح الموسمية =ذعذعي صلف الهبايب وان جنت روحي عناها

الطموح الجامح اللي كل ما فيها خطية =جادلٍ تلت عروق القلب واشقت من بغاها

عرضتني للمضامي والشتا والمهمهية =بيحت دمع المحاجر والعيون أفنيت ماها

علمتني كيف أسامر ليلها والشمس حية =وعلمتني كيف أميز طيبها ساعة رداها

كيف أقول إن الردية ما لها غير الردية =والرجال ان طق عود عود تبعد في مداها

وعلمتني كيف أسافر للحروف الأبجدية =كيف أخلي هالقصايد تطرب اللي من قراها

كنت أجيها والليالي سرمدية سرمدية =لا عوى ذيب الحنايا صحت وينك يا دفاها

كنت أجيلك وانتخي بك مثل مزنة عقربية =يوم كل البيد صاحت واستغاثت من ضماها

كان ياما كان كنا عاشق واحلى صبية =في بيوت الطين نلعب والندا غطى سماها

والله إني ما تهقوى لو عطيت الفيصلية =في فراق الطامح اللي بيحت خافي خفاها

ولو ركبت البنز الأسود في طريق الشانزليزيه =يعلم الله ما يساوي بسمةٍ بازهى شفاها

ولو سكنت البيت الأبيض أو قصور الفاخرية =مسكني بين الرموش السود والكحلة غطاها

ولو ملكت أغلى سهوم البورصات العالمية =راس مالي ضحكة اللي كل ما فيني فداها

كل همي يوم أشوفك واحضن ايديك بيديه =قبلةٍ كل المشاعر تهتني ساعة لقاها

ان بغيتيني فأنا لك عاشق جزل العطية =من عرفت العلم وايدي ماتوقف عن عطاها

شاعر ياخذ جزيل القول ويخلي دنية =عارف إن الموت حق والبشر تاخذ جزاها

صيرميٍ ما يهاب الموت وعزومة قوية =يستبيح الدم والموت الحمر فدوة رضاها

والله إني والله إني فيك مجهول الهوية =يا الهنوف اللي تلوف الجوف واشقاني هواها[/poem]__________________

__________________