[poem=font="Simplified Arabic,6,black,normal,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
أبدا بذكر اللي عليه إتكالي=الواحد المعبود خلاق الأكوان
سبحانه الوالي على كل والي=إلهنا اللي خالق الإنس والجان
ومانعبد الا هو عزيز الجلالي=ومن ظل عن هدي النبي صار خسران
والله يثبتنا على كل حالي=بالصدق والإيمان بالله والإحسان
وكلً بيلقى ما زرع في الليالي=وما يضيع شيً وكل شيً بميزان
والعمر يفنا وما يبي له جدالي=جيلً بعد جيلً على مر الأزمان
وتبقى فعول أهل الفعول الجزالي= أهل الوفى والطيب ذربين الأيمان
اللي مواقفهم تهز الجبالي = لا قيل منهم قلت أنا رجال قحطان
تعرف ليامن صك جالَ بجالي = وترسي إلى منه غشى الجو دخان
ويروون حدب مرهفات السلالي=لاجا نهارً فيه زوغات الأذهان
مواقفً شرق وجنوب وشمالي=يشهد لنا بن حميد والشيخ راكان
حنا الحسب حنا النسب لا مجالي = وحنا العرب وأصل العرب شاننا شان
وحنا الوفى فينا من أول وتالي = ولا نخون العهد لو كان ما كان
والجار له حقً علينا وغالي = مانشبع ونروا وبه جار جوعان
من عهدنا الأول وحتى الزوالي = مانهين الأنفس ورث من ورث جدان
نرقة سنود وحظنا دوم عالي = من عهد ابن هادي إلى وقتنا الآن
وماجات ابن هادي بزود احتيالي = لكن حكم في نجد بالسيف شامان
شيخ قحان اللي يشيل الثقالي = شيخً معه خمسين شيخً وفرسان
والنعم فيكم يازحول الرجالي = اللي فعايلهم على الطيب نيشان
تحت النجوم وفوق روس العوالي= مثبته ماهيب تشرا بالأثمان
فعلً عليه شهود وأثبت مقالي = وألقى على قولي دلايل وبرهان
وأشوش وأرمي غترتي والعقالي = لامن ذكرت أفعالكم يال هدلان
لا جا نهارً فيه حرب وقتالي = كم راس شيخ طاح من فوق الأمتان
وأخص أنا شالح كريم السبالي = من يمدحه وافي ولاهوب غلطان
شيخً ليا شبت يفك التوالي = ولاكبرت القاله فلاهوب بحلان
رفيقهم يشرب قراحً زلالي = ويلقى الوفى والطيب من قلب ولسان
وعدوهم يوطى بروس النعالي = كم شيخ قومً داسه الذيب سرحان
وإلى من تعلوا فوق قبً عوالي= شاشوا وهاشوا واهتدى كل شيطان
فرسان خيل ولا يجيهم إجفالي = لاصاح صياح الوغى وحن ذيدان
تارد حياظ الموت مثل الجمالي = اللي تزاحم صوب عد ومقطان
والمجد لأهل المجد سهل المنالي = والطيب ما ياتي على غير سيسان
وشالح وأخوه بنجد مضرب مثالي = ياطيب أخوتهم شويخً وشجعان
هذا الفديع اللي لشالح ظلالي = هذي المحبه والوفى بين الأخوان
خادم لأخوه أبشر ولابه سؤالي = حامي الحمى والراس عالي ولا هان
ويقول أنا دونك بمالي وحالي = يقولها في خاطره سر وإعلان
وضحى بنفسه يوم صار إجتوالي = حول معى شالح وهو شبه عميان
وفك الضعن ثم غاب نور الهلالي = ومات الفديع وشالحً عاش بأحزان
وخذا القضى مبارك عريب الخوالي = في عبيد عز الخيل حماي الأضعان
ثمً ظهر في نجد ذيب العيالي = وما ضاق شالح يوم وجه السعد بان
أول مغازي الذيب ريف الهزالي = كسب الأصيله لأجل شايبه صفطان
بالسيف الأملح بين حرً وصالي = ثم ساقها لأبوه طربً وفرحان
هديةً للشيخ جزل الفعالي = وكلً بغاها مير عيا كحيلان
حتى الملوك مرخصين الريالي= كلً بصفرا شالحً صار طمعان
ومن دونها شالح وللحمل شالي = يقول مرخص لو زعل كل زعلان
هذي على الدنيا شريدة حلالي = هدوً من اللي لا ركب صهوة حصان
روحه بكفه فارسً ما يبالي = أفتك ذوه من جيوشً مسيان
ويموت دون معبسات الشمالي = لاجا نهارً فيه داين وديان
ويم الخطر ذوده يسوقه شمالي=راسه شجاع ويابسً مابعد لان
وليا إعتزا كن وسط راسه هبالي = يشهد ابن هندي بقوله لعتبان
لامن لقيتوا الذود وسط المفالي = ثمً سمعتوا عزوة طيور حوران
لاقيل ابن دراج ياهملالي = منتم لذود القوم ربعً وخلان
انجوا بالأنفس يالسيوف الصقالي = يكفي علينا فلان وفلان وفلان
اللي فعايلهم عراضً طوالي= شيوخً وشجعانً ولاهم برديان
لكن لقينا الذيب شبل الشبالي = اللي تعشى كل شيخً وسلطان
هذي فعول الذيب لا جاء مجالي = اللي كسب والنعم في كل ميدان
وهذي حقايق ثابته لا محالي = وتاريخهم ما ينكره كون حيوان
وياكم وياكم كم وياكم طرالي = شيوخً فعايلهم جزيلات وسمان
والنعم في كل القبايل يقالي = وكلً على سلمه ولاهوب ندمان
والحمد للرحمن محصي الرمالي = اللي جعلنا أخوان في كل الأوطان
والأمن شرقً لين حد الزوالي = ومن عرعرً وطريف إلى حد نجران
تحت حكم منهم مشوا بالعالي= آل سعود مطوعة كل فسقان
اللي لهم بالقلب حب وجلالي = واللي حكموا بالشرع سنه وقرآن
وبرق الشعر لا لاح جوي صفالي = أسبح بحر وأجيب لولو ومرجان
شعري ورثته ما شريته بمالي = وما يطير طير العز من دون جنحان
والشعر يعرف فيه مرً وحالي = وأرجوا السموحه كان بالهرج نقصان
تمت وصلوا عد وبل الخيالي = على النبي الهاشمي نسل عدنان[/poem]