المعذره قلت لك باجي ولاجيتك
 

المعذره قلت لك باجي ولا جيتك
عندي من أشغال وقتي مايعذرني

فالخيره اخترتك وبالبد بديتك
والوقت لاخترت عيّا لايخيرني

ياليتك اتشوف كيف الوضع ياليتك
عشان ماعاد تنشد ويش غيرني

ولاّ أنت غالي ويوم أغليتك أغليتك
والغالي امن البطا والهجر يحسرني

وغلاي عندك لو انّي ماتقصيتك
يبين لا جيت تنهاني وتامرني

والبعد مهما تمادى ماتناسيتك
ذكراك من وين ماسارت تسيرني

لو ان بيتي مهو بمجاور البيتك
امن الغلا والله ان كنك مجاورني

واذا تباطيتني ولاّ تباطيتك
عسى الله يصبرك والله يصبرني

ترني على الحب الاول يوم حبيتك
لو ماهو ابشرط اقول ان ترني ..وترني

رد : المعذره قلت لك باجي ولاجيتك
 

ارحب ياسمي تراحيب المطر

وصح لسانك واعتلا شانك وبيض الله وجهك

شاعر جزل وقصايدك كفو وانت كفو

سجلني متابع لكل جديدك

يكفيك شهادة الزلامي ياكحيلان

تقبل ودي وتقديري

رد : المعذره قلت لك باجي ولاجيتك
 

صح الله لسانك يا ابو محمد .. وانت شاعر جزل وقصايدك رائعة جداا

واتمنى لك التوفيق والسداد

رد : المعذره قلت لك باجي ولاجيتك
 

صح لسانك وبيض الله وجهك مبدع كما عهدناكيا شاعرنا , تحياتي وتقديري

رد : المعذره قلت لك باجي ولاجيتك
 

أرحب يا عبيدي

والله قد أبطينا منك ومن قصيدك

اللي والله له مكانه خاصة

صح لسانك يا سمي