بين النساء بالشكل تلقى بديله
 

[poem=font="Simplified Arabic,4,black,bold,normal" bkcolor="transparent" bkimage="" border="none,medium,gray" type=2 line=0 align=center use=ex num="0,black"]






الشعـر ولّـع فـي خفوقـي فتيلـه=باقصى معاليق الحشا تشعل اشعـال
ماكـل بيـتٍ نسمـعـه نهتويـلـه=بعض البيـوت يمـر ماكنـه انقـال
ان ماكسبـت الشـارده والجزيـلـه=مالي مع اهل العرف مخرج ومدخـال
الهـرج واجـد والفـوايـد قليـلـه =وقت الصمايل تختلف بعض الاقـوال
قـولٍ بليـا فعـل وش ترتجـي لـه=ضربٍ من التظليل وازعاج واجـدال
احـدٍ يحصـل مـن كلامـه فشيلـه=واحدٍ تشيلـه كلمتـه فـوق ماطـال
اللـي يبـي درب الخنـا والرذيلـه=يطلق عنان النفس ويعاشـر انـذال
على طريـق الغـي يلقـى زميلـه=والكل منهم لاسـود الفعـل يحتـال
واللي يبـا العليـا يـروم الطويلـه=يسعى لهـا ويثبـت اقـوال بفعـال
يمشي على درب الشرف والفضيلـه=ماينحني لو فيه كـف الدهـر مـال
يسعـى لكسـب الغانمـه والجميلـه=ويحط له فـي ماكـر العـز منـزال
اللي يبي قطف الزهـر ينحنـي لـه=ماتكفـي النيـه لتحقيـق الآمــال
نيل المنى لابـد لـه مـن وسيلـه=بالصبـر والمجهـود يتغيـر الحـال
من غاص في غب البحور المهيلـه=لابد يصبر لين ياقـف علـى الجـال
لاصرت في غربه يبـي لـك دليلـه=بس البلا لاصار فـي مخـك هبـال
مايقنعـك شـرح العميـل لعميـلـه=يبلش بك اللي مقصده ينصح الضـال
الحـر فـي دربـه يخـاوي مثيلـه=والبـوم مالـه بالمراقيـب مدهـال
ممشى الهبيل بجنـب نـاسٍ هبيلـه=لو يعرفون الـدرب مافيهـم الـدال
العاقل ان ماجاك حـاول تجـي لـه=احذر تماشي فـي مماشيـك جهـال
تـرى الخـوي لازم خويـه يشيلـه=واحـد مـن الاثنيـن لابـد ينشـال
النفـس تهـوى كـل بـرقٍ تخيلـه=لاهملتها ترميك في وسـط الاهـوال
احذر تطاوعهـا بمـا تشتهـي لـه=اضغط عليها لين ترضـى بالاحـوال
تـرى القناعـه للنفـوس العليـلـه=تحصين حتى عن مرض جمع الاموال
اد الصـلاه الواجـبـه والنفيـلـه=صم وتـزك وحـج ياطيـب الفـال
احرص على الارحام واللـي تعيلـه=وامك وابوك اجزل لهم كـل مكيـال
والجـار لـه حـقٍ حـرامٍ تزيـلـه=وفه حقوقـه واعـذره كـل ماعـال
البخـل رسـمٍ بالوجيـه البخيـلـه=يبيـن لاجـا صاحبـه يدفـع ريـال
والبيض يكفي مـن هواهـن حليلـه=تحفظك في غيبتـك وتربـي اجيـال
بين النسـاء بالشكـل تلقـى بديلـه=فرقٍ بسيـط وجوهـر الشكـل لازال
الفـرق يظهـر بالصفـات النبيلـه=بالعقل والاخـلاق ماهـو بـالازوال
احرص على بنت الرجـال الاصيلـه=السالمه من هرجـة القيـل والقـال
اسئل عن المنزال قبـل تعنـي لـه=ماكل شجره ينوجـد تحتهـا ظـلال
ماكـل وادي لـو تسايـل مسيـلـه=تطلع بوادر بذرتـه عقـب ماسـال
وقت الرخا يطلع لـك الفيـن حيلـه=تلقى الخوي والجار والعـم والخـال
ووقت الشدايـد تنصـدم بالحصيلـه=يطلع لك النصـاب والنـذل والـذال
تلقى خـويٍ شهـم يسـوى قبيلـه=والا الدويني منظـره بـس تمثـال
الطيب ميـزه والفعـول تهـدي لـه=ماكل من يلبس مـن الشمـغ رجـال
قافٍ دعانـي مابغيـت ارتكـي لـه=فجر بجوفي من عنى الوقت زلـزال
حاولـت ابيـن زبدتـه وتحليـلـه=في نص ساعه سقته اقفاي واقبـال
قلته وقلبـي فـوق صلـو المليلـه=وارتاح بالي يوم روضـت الامثـال
وصلاة ربـي عـد وبـل المخيلـه=على الصدوق الصادق بكـل ماقـال [/poem]

رد : بين النساء بالشكل تلقى بديله
 

رد : بين النساء بالشكل تلقى بديله
 

اشكرك على المرور

رد : بين النساء بالشكل تلقى بديله
 

شكرا لك اخو شهد

على ايرادك لهذه القصيده

تقبل تحياتي

رد : بين النساء بالشكل تلقى بديله
 

الله لا يهينك على المرور