شبكة قحطان - مجالس قحطان - منتديات قحطان

شبكة قحطان - مجالس قحطان - منتديات قحطان (https://www.qahtaan.com/vb/index.php)
-   مجلس الديار و قصص وسوالف من الماضي (https://www.qahtaan.com/vb/forumdisplay.php?f=3)
-   -   صفاء القلوب وطيب النية .... قصة وقصيدة لأبن كدم تعبر عن إستجابة الدعاء (https://www.qahtaan.com/vb/showthread.php?t=2240)

أبن كدم 01-03-2005 06:07 AM

صفاء القلوب وطيب النية .... قصة وقصيدة لأبن كدم تعبر عن إستجابة الدعاء
 
بسم الله الرحمن الرحيم

السلام عليكم ورحمة الله وبركاته وبعد :
بعد غيبتي الطويلة أتأسف لكل من شعر بغيابي ووالله إن غيبتي كانت من ظروفي يشهد الله . وإليكم هذي القصة والقصيدة التي فيها بعض الغرابه شوي لكن يشهد الله إن هذا اللي سمعته من الشايب الله يرحمه الأولي ما يكذبون لو على قطع الرقاب ما أبي أطول في الشرح إليكم القصة والقصيدة وهي إهداء مني إلى عموم قبيلة قحطان .
القصة حدثت قبل مايقارب 130 سنة أول أقل أو أكثر الله اللي يعلم ولكنها قريبه من هذا العدد
كان جدي عليه رحمة الله اللي هو الشيخ الشاعر محمد أبن ناصر أبن كدم في سفر من دياره في الجنوب مسافر لنجد على ذلول كانت معه ويذكر إن البعير هذا كان شرود ولا يطاوع أحد مهما كان إلا هو عليه رحمة الله يقولون إن البعير إذا شاف الشايب نزل راسه له وإذا شاف أحد غيره ما يطاوع له مهما كان المهم زبدة الهرج إنه سافر على ذلوله ويوم قدهو في نص المسافة بين نجد والجنوب لقى الأرض مجدبه ما جاها مطر من فترة طويله والعد إللي كان ناوي يرتوي منه ويسقي ذلوله منه لقاه فاضي ولا فيه إلا طلبة الله وهو قدله ثلاثة أيام يسير ما ذاق الماء والبعير قد هلك ما عاد يقوى المسير وقد هو يقوده قود . أستسلم للموت والأمر الواقع وطلع في راس رجم قريب من العد وبدع هذي القصيدة

[poem=font="Andalus,4,red,normal,normal" bkcolor="transparent" bkimage="" border="groove,4,gray" type=0 line=0 align=center use=ex num="0,black"]
قـــال أبن ناصر يوم شرف وغـنى=والقلب والله ينــــــهبه ســــعير
في ديرة خلو وقطع من العــــــرب=والماء قليل والذلـــــــــول بعير
يرغي لما اني نهزته بالعصـــــــــا=وعقب الحــــــيادة كاده المسير
حطيت أنا القربة ثمان مـــن الشهر=حساب الليــــــالي والنهار نسير
يالله لا ترضي بنا عين شــــــــامت=ولا تحـــــرق بي فؤاد حبــــــيب
يقوله إلي صلب جده عبـــــــــيده=طياب القبـــــــــايل والبلاد طريب
ركب على البابور في غبة الــــبحر=فيه النـــــــــصارى والعذاب كثير
واللي من العربة تلوج حكــــــــاها=مثل اللحــــــا لواجته فـــــــــطير
ترهم ولا لاما رفـــــــــــــيق حاقر=جده قــريب والفــــؤاد بعـــــــيد
أبو كلمة لمن جات ليا كنــــــــــها=أمحق من المخطر على القــصدير
ما طال من بنيه عسى الله يطـــيحه=ويا جعل حبله بين الحــبال قصير
وياجعله عمى ويقوده اللي يكرهه=ويا جعل قبره مـــــثل غور البير
كنه يوصيني لجمع المرجـــــــــــله=و أنا بطــــــــــبعي قانع وبصير
لا جمعت الأسعار في السوق قلٌبت=ما تســــــتوي سمرا وحب شعير
ولا يستوي الفلفل وهيل من الحبش=ولا يســــــتوي خام وثوب حرير
كل على جده وحوزه وجــــــــانبه=ولا الذهب بيــــطبع معا القصدير
ما قدمت يمناك فمدحه لحــــــــيتك=وعقب يميــــــــــــن مدها قصير
[/poem]طبعا القصيدة مبنيه على السمع وليس على الكتابة لأن بعض القصايد وأغلبها خاصة قصايد الشيبان الأولين لما تكتبها ما تجي معك أغلب الكلمات وبعضها مشدد وبعض الحروف يكون ساكن فلا بد من سماع القصيدة قبل قرآتها .
المهم بعد ما إنتهى من قصيدته الله يرحمه صلى ركعتين وطلب ربي وألح في دعاءه ويقول بعد ما أنتهى من الدعاء بفترة قصيره أقبلت عليه غيمة ماهي بكبيره يقول والله يا عوالي أني أشوف حدود ظل الغيمه حولي على الجبل إللي هو فيه يقول يوم أستقرت الغيمه أمطرت بإذن الله لين سيلت الأرض وأمتلى العد بعدها يقول شرب وأسقى ذلوله وأمرح في مكانه ثلاثة أيام وكمل مشواره لنجد ..
هذي القصه كامله والقصيده وزي ما قلت في بداية كلامي هذا والله اللي سمعته منه شوفوا العبره كيف وشوفوا قدرة الله سبحانه وتعالى وسرعت إستجابته للدعوه فسبحان الله العلي العظيم وإلى اللقاء في قصة وقصيدة قريبا إنشاء الله .
أخــــــــوكم / أبن كــــــدم

فارس قحطان 01-03-2005 11:00 AM

لاهنت يابن كدم
ومن طول الغيبات جاب الغنايم

بيض الله وجهك على هذي السالفه والله يرحم الشاعر ابن كدم
وهذي القصه فيها تتجلى استجابة الله للعبد اذا اصابته مصيبه
وتضرع الى الله
فان الله يجيب الدعاء

شكرا لك على هذي السالفه
ولا عاد تطول علينا
ترى مانسمح لك

خالد ابن علي 01-03-2005 12:21 PM

مشكور يابن كدم على هذه السالفه ,, والله الله في المزيد .

ملحف الرفيدي 01-03-2005 02:54 PM

الله لا يهينك يا بن كدم ويعظم أجرك على السالفة الرائعة

ولد النايب 01-03-2005 03:43 PM

=
=
=
=
قصة وقصيدة تشكر على كتابتها
ولدي بعض الاستفسارات لو سمحت

1- القصيده مختلفه في بعض القوافي ولا اعتقد ان شاعر
محنك يرضى بهذا الخلل.

2- انت تقول في موضوع سابق عن جدك وهو الشاعر ابن كدم
انه توفي عام 1412هـ وعمره عند الوفاة 125 سنه.


طيب يعني تاريخ الميلاد عام 1287 هـ قبل فتح الرياض بحوالي 32 سنه .
تقول ان القصيده قيلت قبل 130 سنه قد تزيد وقد تنقص (يعني تزيد سنه سنتين ممكن خمس)
لانها لو كانت تزيد او تنقص عشر سنوات كان بتكتب قبل 120 سنه او 140 سنه)

الاستفسار هو قبل 130 سنه يعني 1426-130=1296هـ

يعني قال القصيد عام 1296هـ وهو من مواليد 1287هـ أي عمره تسع سنوات
ومسافر من نجد للجنوب لحاله وقبل توحيد المملكة بل قبل فتح الرياض .


عزيزي ابن كدم

مثل هذه القصائد والقصص مطلوبه ولكن لابد من التحقق مما يقول الكاتب
خاصة عند الكلام عن ناس لهم سمعتهم ومن عوائل وقبائل معروفة .
يمكنك احرص منا على تراث جدك وهذا لايمنع انك تتأكد من شيبانك.
ولا تنشر الا الشي المعقول اما مثل هذه المشاركة فأعتقد انها ضدك وليست
في صالحك.



وشكراً

أبن كدم 02-03-2005 12:29 AM

مشكورين يا شباب الله يعطيكم العافيه على الردود وبالنسبة للي أبدو ملاحظات فمشكورين كذلك مشكورين على الملاحظات بالنسبة للتواريخ يا ولد النايب ليست ذات أهمية بجانب قصة وقصيدة زي هاذي القصة والقصة المذكوره وما علينا إلا الإجتهاد في طلب وظبط التاريخ وبالنسبة للأبيات اللي تقول فهذي القصيدة زي ما قلت في الكلام المكتوب تحت القصيدة لأنها قصيدة سمعية وليست كتابية وبعدين لا تنسى ان شاعرنا عليه رحمةالله كان في موقف لا يساعده ..!

أبن كدم 02-03-2005 12:35 AM

وبالنسبة لعمر الشايب الله يرحمة يا ولد النايب ماهو بـ125 سنه بالظبط يمكن يزيد ويمكن ينقص هذا إجتهاد وتخمين ومقارنة عمره مع ناس يقارب له في السن أكبر منه أو أصغر بفارق سنين بسيطة أمثال الشايب علي ابن مريع ابو دبيل عليه رحمة الله فقط لا غير ولا يوجد أي تاريخ من تواريخ شيبان وشعراء البادية صحيح 100% كلها تخمين وإجتهاد.

ولد النايب 02-03-2005 11:14 AM

ابن كدم

شكراً على سعة الصدر

اولاً الرساله اللي وصلتني على الخاص مافيها شي خاص وهي تصلح هنا مع الموضوع
ولكن على شانك ارسلتها في الخاص ماني بناشرها هنا.
ثانياً القصيدة مهماً كان لازم تكون قافيتها وحده حتى للي ما يعرف الشعر فكيف تقول
سمعية وليست كتابية . ردك غير منطقي ، كل شعرنا الشعبي سمعي ومتناقل بواسطة الرواة
وقصيد جدك لا يختلف عن غيره. الزبدة اذا ما انت متأكد من قصيد جدك لا تنشره الا بعد التأكد
حتى لا تتشوه الصوره اللي الناس يسمعون عنه _ رحمه الله _

.وبعدين ترى ابو دبيل اللي تتكلم عليه اسمه مريع وليس علي .

العلي 03-03-2005 11:03 AM

اخي العزيز بن كدم شكرا لك ولكن الشاعر جدك رحمه الله مثل مانسمع من الشيبان اسنانه بانه شاعرواكيدانك ماتجيدالشعرانت
اعرض القصيده على شاعر قبل النشر وشكرعلى اجتهادك

العبرود 03-03-2005 03:15 PM

ابن كدم ... ولد النايب .. الإختلاف لايفسد للود قضيه ..
ورحمة الله على صاحب القضيه ..
وشكرا ..
العبرود


الساعة الآن 12:36 PM

Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir
جميع الحقوق الأدبيه والفكرية محفوظة لشبكة قحطان وعلى من يقتبس من الموقع الأشارة الى المصدر
وجميع المواضيع والمشاركات المطروحه في المجالس لاتمثل على وجه الأساس رأي ووجهة نظر الموقع أو أفراد قبيلة قحطان إنما تمثل وجهة نظر كاتبها .

Copyright ©2003 - 2011, www.qahtaan.com