شبكة قحطان - مجالس قحطان - منتديات قحطان - الشاعر / شعيل بن ثقل بن بلعان الهاجري من ال جدي

لقيت لي بيت مشيد ومرفوع
عليه من بيت البداوة تهايا

بيت الشعر بيت من الصوف مصنوع
معروف صنع يدين بيض الصبايا

من أولا في البر به كل منفـوع
يبنى ويطوى في ظهور المطايا

نزال رحال ومبني ومشلوع
وفي ربعته رسم الرجال الدهايا

وان جاء هشال عليهم طرف جوع
يلقون تقدير وعدة مزايا

حشمه وقولت مرحبا سلم وطبوع
وهيل بن في دلال عذايا

وكبش سمين يذبحه طايل البوع
وليا قطع راسه يجيب الشوايا

يضحك احجاجه لا كبا كل منزوع
صميدع بالطيب ما ينتنايا

له مجلس ما بين سامع ومسموع
وسوالف تروى الكبود الظمايا

مدهال خطار ومسايير وربوع
ويمدهم من مد جزل العطايا

والبيت من حوله دواوير ونجوع
وسهل وجبال وطرش ورعايا

ف خايع عشبه كما الزرع مزروع
متخالف نوار عشب الشغايا

ممطور من وبل الوسامي ومرجوع
سيل على سيل افياضه ملايا

فيه الزبيدي يصدع الأرض بطلوع
فوقه غصون العشب مثل الحنايا

يذكر ويعناله من البعد منجوع
وتسمن به البل عقب ما هي عرايا

يفرح اصدور البدو والشف مجموع
وهذي طرات العمر قبل المنايا

وتشوف فيه البل مشاعيف ورتوع
خلف ومعاشير وجذع ولقايا

و اليوم أرى بيت الشعر شبه ممنوع
كنه مقاطع من جميع النحايا

بيت الشعر بالحبل مثني ومربوع
وعصر المدينه حذف به ورايا

بدل ببيت فيه للناس مطموع
قصر يشادي نايفات الحجايا

يبنى على خطة مهندس ومشروع
ويجلب ويشرى من خيار الشرايا

ودار الزمان وبدل الشكل والنوع
والرزق طب من البحر في القرايا

وقت الرخا عساه بالخير متبوع
في جاه من يعلم خفي الخفايا

والبر حبه في داخل القلب مطبوع
وبيت الشعر باقي لحبه بقايا

وختامها صلوا بتسليم وخشوع
على النبي صفوة جميع البرايا