شبكة قحطان - مجالس قحطان - منتديات قحطان

شبكة قحطان - مجالس قحطان - منتديات قحطان (https://www.qahtaan.com/vb/index.php)
-   مجلس فرسان قحطان (https://www.qahtaan.com/vb/forumdisplay.php?f=5)
-   -   مقتل ثلاثة الجذعان أبناء الشيخ الفارس محمد بن هندي بن حميد . (https://www.qahtaan.com/vb/showthread.php?t=19028)

أبا الذموم 05-12-2006 05:50 AM

مقتل ثلاثة الجذعان أبناء الشيخ الفارس محمد بن هندي بن حميد .
 
نبدأ الموضوع بالتعريف بأحد شيوخ عتيبه اشتهر بالكرم والشجاعة والوفاء والمرؤه ألا وهو
الشيخ الفارس محمد بن هندي بن حميد .
استلم المشيخه على قبيلة عتيبه بعد موت ابن عمه الشيخ الفارس عقاب بن شبنان بن حميد في معركة ام العصافير بين عتيبه وابن رشيد سنة 1301هـ .
وكما هو معلوم ان الشيخ محمد بن هندي بن حميد له من الاولاد أكثر من عشرة وكلهم شيوخ وفرسان .
وفي هذا الموضوع يسرني أن اكتب عن مقتل أبناءه الثلاثه : [ بنيّه واسمه ذعار وعمر واخر لا يحضرني اسمه ] واللي قتلهم هم قبيلة آل الجرو عبيده في وقعة [ ابا الرخم ] و تسمى [ ابا الرحل ] و أيضاً قتل معهم الفارس الحشيشي من الروسان عتيبه .
من المعروف قبل هذه المعركه بفتره إن الفارس مبارك بن غنيم آل كليفيخ الخنافر ذبحوه عتيبه واللي ذبحه الفارس الحشيشي من قبيلة الروسان من عتيبه ذبحه في إحدى المغازي بين عتيبه والخنافر وكان قبل هذه المعركه الفارس الحشيشي قصير للخنافر وذبحه ثار ٍ لذبح الشيخ عبيد بن تركي بن حميد اللي ذبح على يد الفارس مبارك بن غنيم آل كليفيخ الخنافر
المهم إن الفارس الحشيشي تضيّف عند آل الجرو عند الفارس ضويحي بن عبيد الله بن عريج وهو جالس ٍ عندهم يهايط عليهم العتيبي قام واحد ٍ من فرسان آل الجرو اسمه عجب الا حمر بن شتوي عمه الفارس ضويحي بن عبيد الله بن عريج وقال :[ يالحشيشي كيف تجلس عندنا وأنت ذابح ٍ ولد عمنا مبارك بن غنيم آل كليفيخ الخنافر وذبحته يالحشيشي وأنت قصير ٍ لهم ] قام الحشيشي وقال : [ماهو انا اللي ذبحته ]
المهم كثر الكلام قال الحشيشي:[ ياآل الجرو إن كاني اللي ذبحت مبارك بن غنيم فإن الله يطرحني بينكم و يوليكم ظهري لا أيد ٍ تمنع ولا رجل ٍ ترفع و إن كانكم ظالميني فإن الله يطرحكم بين أيدي ويوليني ظهوركم لا أيد ٍ تمنع ولا رجل ٍ ترفع] قالو ا آمين
وجهزوا الحمده خيلهم وفرسانهم للمغزى على آل الجرو بقيادة الشيخ بنيّه بن محمد بن هندي بن حميد ومعه الفارس الحشيشي من الروسان ومعهم بقية فرسان الحمده وغزوا على آل الجرو وآل الجرو بقيادة الشيخ الفارس جديع بن مقبل والشيخ الفارس ضويحي بن عبيدالله بن عريج و تواجهوا معهم ودارت المعركة وانتهت بانتصار آل الجرو على الحمده وقتل في هذه المعركة أبناء الشيخ محمد بن هندي بن حميد الثلاثة
المهم إن الحشيشي ذبح ذاك اليوم واللي ذبحه الفارس عجب الاحمر بن شتوي من آل الجرو

بعد هذه المعركة قال الشاعر ابن شرهه من آل مهدي عبيده قصيده يمدح آل الجرو فيها بعد المعركه

[poem=font="Simplified Arabic,4,crimson,bold,normal" bkcolor="transparent" bkimage="backgrounds/1.gif" border="none,medium,gray" type=2 line=0 align=center use=ex num="0,black"]
قلبي كما الملواح في كف صقار = الطير حشر والهبايب قويه
على بني عمي مدابيس الأشرار = كل أبلج يروي شبا العولقيه
زاعتهم النيه وحسكات الأوبار = صوب المهامل والديار الخليه
وعلى أبالرحل يذكر لنا صار ماصار = كم حد شلفا راح قد هو حنيه
يوم أشتبك عج الرمك دم وغبار = كم عقيد طاح في الجندليه
ياذيب ياللي بين سقمان وضمار = من راس رمح حويل دونك بنيّه
مع الحشيشي قد طوينا به الغار = واللي عطانا أمس لقي مثنويه
وعمر غدا به لابة تكرم الجار = جروية ترد الخطر والمنيه
كله لعينا جل خلفات وعشار = والفاطر اللي جر منها خليه
عيا عليها عزهم للضيف والجار = وحربة جديع حامي الدوبليه
وضويحي اللي له براهين وأذكار = يشهد له التاريخ في كل هيه [/poem]


## للمعلوميّه ثلاثة الجذعان الذي يقصدهم الشيخ الفارس شالح بن هدلان ليس المقصود منهم أبناء الشيخ الفارس محمد بن هندي بن حميد بل هم آخرين من آل حميد الحمده واللي ذبحهم الخنافر وقصيدة شالح بن هدلان بعد المعركة اللي قتل فيها الشيخ الفارس عبيد بن تركي بن حميد على يد الفارس الشجاع مبارك بن غنيم آل كليفيخ الخنافر وقصيدة شالح بن هدلان هي :

[poem=font="Simplified Arabic,4,crimson,bold,normal" bkcolor="transparent" bkimage="backgrounds/1.gif" border="none,medium,gray" type=2 line=0 align=center use=ex num="0,black"]
ضيف الله اشرب ما شربنا مراره= اصبر و كنك شالح ٍ يوم حزن

راح الفديع اللي علينا خساره = وصار القضاء بعبيد حامي ثقلهن

يمنى رمت به ماتجيه الجباره = اللي رمت بعبيد في معتلجهن

من نسل أبوي وضاري ٍ بالشطاره= يصيب رمحه يوم الأرماح يخطن

وعبيد خلّي طايح ٍ في المغاره = عليه عكفان المخالب يحومن

وعاداتنا بالصيد ناخذ خياره = ثلاثة الجذعان غصب ٍ بلا من

ياقاطع الحسنى ترى العلم شاره = لابد دورات الايام يدورن

حريبنا كنّه رقيد الخباره = خطر ٍ عليه لا يتوقظ من الجن

ماني بقصّاد ٍ بليّا نماره = اجدع نطيحي بالسهل وإن تلاقن

من حلّ دار الناس حلّوا دياره = لابد ما تسكن دياره ويغبن

ومن شق ستر الناس شقوا ستاره= ومن ضحك بالثرمان يضحك بلا سن

وإن كان ضيف الله يعسّف مهاره= فمهارنا من عصر نوح ٍ يطيعن

تدنا لصبيان ٍ سواة النماره= شهب ٍ لماضين الفعايل يعنن [/poem]


## وللمعلوميه ثلاثة الجذعان اللي يقصدهم الشاعر عبدالهادي بن شعواء آل سبعان الخنافرفي معركة عقيلان
بين آل مسعود بقيادة الشيخ الفارس جعفر بن منيس بن عبود ومعهم آل الجرو بقيادة الفارس ضويحي بن عبيدالله بن عريج
وبين قبيلة عتيبه بقيادة الشيخ الفارس محمد بن هندي بن حميد ليس المقصود منهم أبناء الشيخ الفارس محمد بن هندي بن حميد بل أيضاً من آل حميد الحمده وابناء عم لهم واللي ذبحهم هم آل مسعود وبعد المعركة قال الشاعر ابن شعواء :
[poem=font="Simplified Arabic,4,crimson,bold,normal" bkcolor="transparent" bkimage="backgrounds/1.gif" border="none,medium,gray" type=2 line=0 align=center use=ex num="0,black"]
حر ٍ شهر من صوب نجد مطاره=نوى المطار وقرّب الفطر الشيب.

ثوّر من الصخة تقّطع شراره = يتلاه من برقا أسوات العياسيب .

وعلى عقيلان نوانا بغاره = وعما علينا مدنا من الأقاريب

قلط حشيفان يدور سباره = متعليٍ في نايفات المراقيب .

كانوا علينا والدبش بنت شاره =لاد الكريزي ميبسين المشاريب.

لحقوا قحاطين أسوات النماره =والكل منهم لفها بالعراقيب.

ابشلف ٍ مظاربها أسوات الحجاره = ترعى بها العرّا ويرقى بها الطيب

عاداتنا في الجلب ننقي خياره =ثلاثة الجذعان غصبٍ بلا طيب .

اللي شرد خلّى الحويا ايساره =واللي نصا رنية يدور معازيب .

عز الله إنها حجة ٍ بعتماره =نطاحت الوكحا انجوم المغاييب .

يا مسوي الفنجال كثّر بهاره=وعدّه على عروان وثنّه لابو ذيب.

وعدّه على الشاوي متيه بكاره=ضويحي شوق البني الرعابيب.[/poem]
المقصود من [ عروان ] هو الفارس عروان بن منيشط آل جاهل آل مسعود.
المقصود من [ أبو ذيب] هو الشيخ الفارس جعفر بن منيس بن عبود آل مسعود.
المقصود من [ ضويحي] هو الفارس ضويحي بن عبيدالله بن عريج آل الجرو.
هذا ولكم خالص تحياتي


هذا وتقبلوا مني خالص الشكر والتقدير.

مرعي بن دواس الحبابي 05-12-2006 06:50 AM

رد : مقتل ثلاثة الجذعان أبناء الشيخ الفارس محمد بن هندي بن حميد .
 
الاخ ابالذموم

لاهنت ياذيب


الله يرحمهم برحمته التي وسعت كل شئ

قول وفعل

وعاداتنـا بالصيـد ناخـذ خيـاره
..................ثلاثة الجذعان غصـب ٍ بـلا مـن


اخووووووووووك

الضويري 05-12-2006 09:03 AM

رد : مقتل ثلاثة الجذعان أبناء الشيخ الفارس محمد بن هندي بن حميد .
 
لاهنت اخوي ابالذموم على ايرادك تفاصيل هذه المعارك الخالده وتوضيح ماقد يلتبس على البعض

مره اخرى تقبل مني جزيل الشكر

اخوك عبدالله

ابن عياف 05-12-2006 11:28 AM

رد : مقتل ثلاثة الجذعان أبناء الشيخ الفارس محمد بن هندي بن حميد .
 
ياذيب ياللي بين سقمان وضمار = == من راس رمح حويل دونك بنيّه
مع الحشيشي قد طوينا به الغار = واللي عطانا أمس لقي مثنويه
وعمر غدا به لابة تكرم الجار = === جروية ترد الخطر والمنيه

================================================== ========

وعاداتنا بالصيد ناخذ خياره = ثلاثة الجذعان غصب ٍ بلا من

================================================== ===========


عاداتنا في الجلب ننقي خياره =ثلاثة الجذعان غصبٍ بلا طيب
================================================== =================
الاخ العزيز/ ابالذموم
بيض وجهك وتستاهل البيضاء
يالذيب
اسلوب في الكتابة وتنويه ممتاز
غير مستغرب من مشرف ممتاز

@تركي السنحاني@ 05-12-2006 05:06 PM

رد : مقتل ثلاثة الجذعان أبناء الشيخ الفارس محمد بن هندي بن حميد .
 
الاخ ابا الذموم : لاهنت لاهنت وننتظر جديدك مع تحيات اخوك (( السنحااني ))

فارس قحطان 05-12-2006 06:09 PM

رد : مقتل ثلاثة الجذعان أبناء الشيخ الفارس محمد بن هندي بن حميد .
 
السلام عليكم ورحمة الله وبركاته



لاهنت يا أبا الذموم وبيض الله وجهك

على ايراد هذه القصه وتوثيقها بالقصائد



اخوووك


.

أبا الذموم 06-12-2006 12:21 AM

رد : مقتل ثلاثة الجذعان أبناء الشيخ الفارس محمد بن هندي بن حميد .
 
اقتباس:

المشاركة الأصلية كتبت بواسطة الفهاد
الاخ/ابالذموم ـ ـ السلام عليكم ورحمه الله وبركاته

ذكرت ان ثلاث الجذعان فيهم ثلاث جذعان اخرين وهاذي اول مره اسمعه منك( فارجو التاكد)

الغزيه كانت بقياده ابن هندي وجماعه المقطه والشاهد قصيده ابن شعوه الخنفري
(غارو علينا والدبش بنتشاره#### الاد الكريزي ميبسين المشاريب) **وحشيفان المقصود هو حشيفان بن رهيط المقاطي
ـ وهذا يناقض كلامك يوم تقول على ابن هندي و( برقا)

في هذا المغزا اصيب كلا من ذعار ونايف اصابهم ضويح الجروي واجهز عليهم جديع(وسالفته طويله)
ابن هندي عياله اثنين فقط الي عند قحطان والثالث ابن عم لهم قتل قبلهم بفتره( وصارو يعرفون بثلاث الجذعان)
وكانو ورعان صغار يغامرون في القتال وذبحتهم لم تهم ابن هندي شي لانهم ماجالهم افعال ــ بس المصيبه عندما
وصل خبر جديع لابن هندي وعزم ابن هندي على اخذ الثار وقتل جديع

فهاد الحشيشي كان جار لشالح ويعرف ابن غنيم زين وعندمل رحل من عندهم اتجه ال حميد واخبرهم بقاتل عبيد
وعزمو على المغزا وقتل ضيف الله اخو مبارك وقتل الحشيشي مبارك

الاخ/ ابالذموم هداك الله افهم منك ان الحشيشي كان جار ابن غنيم وظهر الحشيشى من بيته وقتل جاره ابن غنيم
وين الخنافره عن الحشيشي حتى يقتلوه تاكد من روايتك الله يعافيك
وارجو ان يكون التفاهم باحترام

والسلام


الاخ الفهاد أرررررررررررررررحب يالعتيبي
لا زلت في ضلالك القديم والعناد ولا زلت متمسك بجهلك وكذبك على الناس ونقاشي معك في جميع المواضيع السابقة مثل موضوع : [ قحطان وعتيبه و] موضوع : [مغزى عتيبه على الخنافر ومقتل الشيخ الفارس عبيد بن تركي بن حميد ] وفي هذين الموضوعين نقاشك معي في من الافتراءات والدجل ما الله به عليم ياأخي العزيز ليه أنت كذا هل عندك عقده او مشكله من قبيلة قحطان وتحاول إنك تزعزع الثقه في هذا المنتدى وفي اعضائه بأنك تقوم بتكذيب الكتاب وليعلم الله بصدق كلامي وصحته .

برد عليك بعدة نقاط :
1) قصيدة شالح بن هدلان قيلت بعد المغزى اللي مات فيه عبيد بن تركي بن حميد واللي ذبحه مبارك بن غنيم آل كليفيخ الخنافر وفي هذا المغزى كان قايد عتيبه هو عبيد بن تركي بن حميد وقصيدة شالح بن هدلان يمدح فيها مبارك بن غنيم واللي يأكد كلامي قصيدة العفار ضيف الله بن تركي بن حميد [ أخو عبيد ] بعد أن علم بمقتل اخوه عبيد يقول العفار :
[poem=font="Simplified Arabic,4,crimson,bold,normal" bkcolor="transparent" bkimage="backgrounds/1.gif" border="none,medium,gray" type=2 line=0 align=center use=ex num="0,black"]
ياشيخ ما تامر عليهم بغاره = كود الجروح اللي على القلب يبرن [/poem]
وهذه القصيده يسندها العفارضيف الله بن تركي بن حميد على خاله الشيح محمد بن هندي بن حميد ومعناها انهم ما حضروا للوقعة !!!!!!!!
2) مقتل أبناء الشيخ محمد بن هندي بن حميد كانوا ثار في مقتل مبارك بن غنيم آل كليفيخ الخنافر بعد إن ذبحه الحشيشي.
3) قصيدة ابن شعواء الخنفري قالها بعد وقعة عقيلان بين آل مسعود بقيادة الشيخ جعفر بن منيس بن عبود ومعهم آل الجرو بقيادة الشيخ ضويحي بن عبيدالله بن عريج ضد عتيبه ومعهم سبيع وللمعلوميه هذه الوقعة لم يشارك فيه الشيخ جديع بن مقبل .
4) الشيخ جديع بن مقبل آل الجرو يوم ذبحوه عتيبه وهو مجدور ومريض بالجدري وجالس ٍ في الغار وجوه عتيبه وذبحوه وهو مجدور واللي يأكد كلامي قصيدة الشيخ جديع بن مقبل يوم كان مجدور وحاطينه ربعه في غار يقول :
[poem=font="Simplified Arabic,4,crimson,bold,normal" bkcolor="transparent" bkimage="backgrounds/1.gif" border="none,medium,gray" type=2 line=0 align=center use=ex num="0,black"]
يأهل الركاب اللي عصير ٍ مراويح = ماترحمون اللي بكبده صوالي
ما ترقبون اللي جراله سواميح = بقي عليه من أربعينه ليالي
محيز ٍ براس رجم ٍ من الريح = جديع حامي الخيل عز التوالي
دنيا كفى الله شرها والسواميح = ياما خذت من طيبين العيالي
غارت على فرسان نجد الذوابيح = كسابة الطالات في كل حالي
مر ٍ تماسيهم ومر ٍ مصابيح = وامرار تاخذ طيبين الرجالي [/poem]

وللمعلوميه بعد ذبحة الجذعان الثلاثة ابناء محمد بن هندي بن حميد قام جديع بن مقبل وربطهم بحبال وخلاّ الابل والخيل تسحبهم وتسحب جثثهم وقام ضويحي بن عبيدالله بن عريج وهو لم يرضى بفعلة جديع وقال لربعه من اللي منكم بيقوم يدفن عوال ابن هندي وله ذي الابل المهم وصل الكلام لمحمد بن هندي بن حميد وأزعجه تصرف جديع بن مقبل واعجبه تصرف ضويحي وقال لفرسان لا احد يتعرض لضويحي أبي راس جديع وبس .
المهم ما قدروا في جديع الا يوم مرض بالجدري وذبحوه عتيبه وهو مجدور .

هذا ولك مني جزيل الشكر .

ابوتركي العبيدي 06-12-2006 01:39 AM

رد : مقتل ثلاثة الجذعان أبناء الشيخ الفارس محمد بن هندي بن حميد .
 
ابا الذموم ارحب ملاييييييييييييييييييييييييييييييين وتسلم يمينك على النقل ولاتلوم الفهاد على رده ماينلام من ما جاهم لكن عطه جوه وانا اخوك لين يسمح

محمد بن مشبب البشري 06-12-2006 01:46 AM

رد : مقتل ثلاثة الجذعان أبناء الشيخ الفارس محمد بن هندي بن حميد .
 
لا هنت يا ابيض الوجه

مرعي بن دواس الحبابي 06-12-2006 07:05 AM

رد : مقتل ثلاثة الجذعان أبناء الشيخ الفارس محمد بن هندي بن حميد .
 
اقتباس:

المشاركة الأصلية كتبت بواسطة الفهاد
مقتل عبيد كانت الغزيه بقياده ابن هندي هذا ما سمعت من ال حميد شخصيا

اما كلمه ان جديع عجزنا عنه فقول قتلا شيوخ اطيب منه وجديع فارس من عرض ال جرو


(عيال ابن هندي ورعان ماقادو ولاغزيه بس انت على شان ان قحطان قتلوهم حطيتهم انهم قادو الغزيه)


بالنسبه لـ جعفر بن عبود من قتله



خيال الشرفا وان بن هندي





الاخ الفهاد

الحرب بين القبايل ماهي بشرب ماء....
مايغزي الافارس سوى شايب والا شباب
تقلل من الجذعان الثلاثه يوم ذبحوهم قحطان وهم عيال شيخ مايحتاجون مدح
والذبح واجد لاكن هم خيار وذكروهم في القصيد من طيبهم

وعاداتنـا بالصيـد ناخـذ خيـاره
..................ثلاثة الجذعان غصـب ٍ بـلا مـن


الساعة الآن 10:45 AM

Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir
جميع الحقوق الأدبيه والفكرية محفوظة لشبكة قحطان وعلى من يقتبس من الموقع الأشارة الى المصدر
وجميع المواضيع والمشاركات المطروحه في المجالس لاتمثل على وجه الأساس رأي ووجهة نظر الموقع أو أفراد قبيلة قحطان إنما تمثل وجهة نظر كاتبها .

Copyright ©2003 - 2011, www.qahtaan.com