شبكة قحطان - مجالس قحطان - منتديات قحطان

شبكة قحطان - مجالس قحطان - منتديات قحطان (https://www.qahtaan.com/vb/index.php)
-   مجلس آخبار الشعر والشعراء والمسابقات الشعرية (https://www.qahtaan.com/vb/forumdisplay.php?f=33)
-   -   لقاء مع متنبي الشعراء ( الشاعر عبدالله بن شايق ) (https://www.qahtaan.com/vb/showthread.php?t=14444)

ابن بطي السحمه 18-08-2006 01:03 PM

لقاء مع متنبي الشعراء ( الشاعر عبدالله بن شايق )
 
بسم الله الرحمن الرحيم

السلام عليكم ورحمة الله وبركاته...
يسعدنا ان نستضيف في هذا اللقاء الشاعر الكبير عبدالله بن شايق القحطاني
احد شعراء المحاورة المتميزين والملقب بـ (متنبي الشعراء) و ( ملك الموال )
وهو من الشعراء الجيدين في مجال النظم كذلك...
وقد ترك الساحة وهو راضي وقدم للجمهور مايطلبونه فله مواقف مع شعار كبار من المملكة وخارجها وله موالات تعجيزية لجميع الشعار لم يستطيع اي شاعر مجاراته فيها فقد ترك الساحة وهو على عزه وجماهيره تطلبه بكثره وأصحاب السمو الأمراء ومشايخ القبائل
فلنا الفخر أن الشاعر عبدالله من قبيلة قحطان سواء كمل مسيرته الشعرية أم أكتفى بما قدم
وعلى ماأعتقد أنه سوف يعود في الصيفيه لكن الخبر ليس بأكيد..
نبذة عن الشاعر


عبدالله بن شايق الحواصلة العاطفي القحطاني
متوفي والده منذ صغره وله من الاخوان 2 .
وعبدالله كان سابقا يعمل في الدفاع المدني بضرماء
وهم من سكان محافظة ضرماء بالقرب من محافظة المزاحمية
60 كلم شمال غرب الرياض ... كان والده بدوي يشد
ويرحل قبل ان يستقر في قرية ضرماء .
عمره حالياً قرابة 42 سنــة (ليس بالتحديد)
غير متزوج

في الفترة الاخيرة قلت مشاركاته الشعرية
لاسباب غير معروفة ...؟


نرحب بشاعرنا الكبير عبدالله بن شايق
دام البقاء يالمرحب وانت بين الصفـوف
حرك رياحينهـا وان حـرك اورودهـا
ما يرتعد في وجيه القوم غير الضعـوف
وإلا رجـال المواقـف تقـدح زنودهـا

بداية عرفنا بنفسك؟
انا والله ابن شايق وابن شايق ولد هادي...ليامنك قدحت الزند والله لقدح ازنادي...
والى منك وردت الموت انا للموت ورادي.....الا واشيب عيني يوم قالوا لي فمان الله.
طيب يابو شنب وش تقول للشعار؟
انا ذا الليل يا شعار في راسي خبر وعلوم...وانا ماجيتكم لأجل اتسلى والهدف مرسوم...
على راسي مقص وتاج للشعر وثلاث نجوووم....واقول الله يديم الستر يا الله سترك الضافي.
[يقال بأنك تحديت جميع الشعار ؟ فبماذا تحديتهم؟]
علموا كل شعار الحجاز ونجد والشرقية
والشمااااال وكل شعار الجنوب
القرار اتخذته وانشدوني ليش يوم اقووووله....لأجل اصارحكم ولاني معتذر..
(( وان قامت الصفين بان القرار ))
ما عاد في اللعب ياشعار حبة خشم....ابرمت جمعٍ يطير الخشم من ضربته
دورولي عميل يعطي الابيات بالكمية
..................شاعر يدخل مع كل الدروب
كلمته تضحك الجمهور لا غنى بها مقبوووولة....ما تقووول الناس ذا شاعر قذر..
(( وانا معه في ليل ولا نهار ))
حنا قبايل نقدر ونعذر ونحشم....واللي حضر يكفي اللي طولت غربته
من من الشعراء يخاف بن شايق؟
ابك انا من خلقتي مالان باسي
شاعر وقلبي على القاسين قاسي
ما انتفض قلبي ولا نزلت راسي
والحقيقة ما نقول آلا الحقيقة
ماذا تقول لبعض الشعراء في الوقت الحالي؟
انت بالتكتكة والشكشكة والشياكة
فاكهة شعر كان الناس فيهم فواكهه
وهلاك الشعر لولا هله وهلاكه
وابن آدم معرض للشقاء والسعادةما حط في الشعر نقطة ضعف غير الضعوف....يقطع جمال(ن)تقرط في عراقيبها
ماذا تقول لمن يستفزك؟
والله مـا نبغـى علـى الشوكـه نسحبكـم
لا شـك هـاذي يابـو تركـي سبايبـكـم
سيفـك لـراسـي وسكيـنـي لحبحبـكـم
يالحـا يومـا حـي يمـلا حـي ياليحانـي
لا تضيعهـا تضيـع ولا تجزيهـا تـجـزا ....... وابن شايق لو تولع جمرتك ما احرقت رزه
والله انها مشكله ياميم عقب القـاف والـزا ....ابن شايق يستفـزك وانـت تبغـى تستفـزه
لوطلب منك تنفيذ ضربة جزاء ترجيحية ماذا تقول؟واي المنتخبات العالمية تشجع؟
ما نضيع هدف ضربة الترجيح.....والبرازيل كل(ن) يشجعـــهــــا
ماهي لعبتك المفضلة بعد كرة القدم؟
حنا لعبنا التنس قبل المضرب والله عطانا كورة نلعبها
اما تعال اهرج بهرج طيب ولا انكتم والبخ ياراعي لبخة

ماذا تقول لحبيبك وبمن تشبهه؟
ياربيع القلب وينك من سنين
توني ماحصلت لدنـيـاطـعــم
ياضنين القلـب ماغيرك ضنين
يكفي انك تو عيني تبتـسـم
عيشتي ذكراك حين بـعد حـين
لا ولـن انـسـاك لا لـن ولـم
اثر في بعض العذاري حورعين
مارأت عـيني بـشر مثلك قسم
فيك من صورة نوال وصابرين
وفيك من صوت الجبل نجوى كرم

اين بن شايق من شعر النظم؟
من ضمن الشعراء واليكم بعضا من ابيات لقصايد في النظم عسى ان تنال على اعجابكم

معاد منها شي بينت مخفيه .. مليت اجامل والدموع افضحتني
غصبن علي ابكي ليا حل طاريه .. تظهر دموع العين ما شاورتني

من يوم دربي خالفه سير دربك .... وغيرت طبعك ونظراااتك وممشااااك
لاتحسبن الزيــن يــازين قربــك ... الزين والله ياريــش العــين فرقااك

حبيبي ترا الخط المباشر عليه ازعاج ... لكن مبغي الا اسمك ورقمك وعنوانك
ولو يجون خلق الله معك فى الطريق افواج ... مايسون عندي رمش عينك وحجانك
عطاك الكريم احلا عيون وخشم وحجاج ... وحمر الشفايا موت والسحر فى لسانك
وجسمن رقيق وارق والين من الديباج ... اتصدق عليك اغار حتى من اخوانك
وخدن عطاه الله بياضن بلااا مكياااج ... وهبته جمال الحور يارب سبحااانك
وترا القلب جوالن جهازه يجيب ابراج ... ثلااثين برج وكلبوها من اسنااانك
والله العظيم انك حبيبي ولا يحتاج ... ولا اقدر على صدك وبعدك وهجرانك
تحمل على شاني لجل موقف الاحراج ... مثل ما تحملت المشاكل على شانك

حبيبي تراني ما تحمل افراقك يوم ... لكن الخطا خلاني انساك بالمره
لو العين عقبك ماعناها لذيذ النوم ... اجامل وانا كبدي من الشوق محتره
معنك قمر والناس عندي بعدك انجوم ... خذاك الغرور وتحسب الناس مغتره
وانا رجل لي كلمه وراي وخبر وعزوم ... ولا اطرد ورا المقفي ولاامش على الجره
ادوس الخطر وانجا واغوص البحر واعوم ... اخوض البحور السبع واطلع الدره
حبيبي حرام اتروح ذيك الليالي احلوم ... و اذا عيشتك حلوه ترا عيشتي مره

انا احسب حساب الكل ماحب الأستبساط
ـــــــــــــــــــــــــــــ ولا داني اهل الكبر والبخـل والتقنيـط
ولكّن حـظي غـاب عنّي معَ المقـلاط
ـــــــــــــــــــــــــــــ وانا ظالـمه في الأمتحـانات .. بالتفقيـط
فرش لي ذهب .. ثم ورد .. ثم زلّ .. ثم بساط
ـــــــــــــــــــــــــــــ ولا شاف مني غير ... الأهمال والتفريط
اضيع عمل حظي بالأهمـال والأحباط
ـــــــــــــــــــــــــــــ وتأبطت منه .. وقال : ماينفع التأبيط
وخسرت الدبل والفرق كله ثلاث ابناط
ـــــــــــــــــــــــــــــ ولاعاد لي خطّه .. ولا عاد لي تخطيط
ربطني هوى خلّي .. رباطٍ وراه رباط
ـــــــــــــــــــــــــــــ وانا حالفٍ ماجفاه لو راح جفني .. خيط
ولا انساه لين ( طريف ) ينزل بجنب (الغاط)
ـــــــــــــــــــــــــــــ (وبغداد) يصبح في ضواحي ( خميس مشيط )

قبل ما نختم هذا اللقاء بماذا حاب ان تهدي؟



فراق(ن)حل ماله حل حلـه مستحيـل يحـال
بحلت بحالتي ياحيلـت الله يـا قـوي الحيـل
ليا طال الطويل وطالت المدة وصبـري طـال
.طلب ت الله يا لله الفرج عجـل بـلا تأجيـل
تهل الدمع عيني هـل هملولـن مـن الهمـال
ليا هلت هماليله على الـوادي وسـال السيـل
ألا وجول قلبي جول جولن جال ثـم أنجـال
.اجل وش عاد يالمجمول جل مجملك تجميـل
جمالك يا جميل أجمل جمـال مـر بالأجيـال
قهرت الجيل كله يا مليك أجمل جمال الجيـل
تعال آهلا وسهلا يا هلال هـل عقـب هـلال
هلا بك عد حب الهيـل والتسبيـح والتهليـل
أقوله قول قايل صح ماهو قـول قيـل وقـال
مقال اليوم أقوله ماتقـول مثـل قـال وقيـل
ألا يا عاذلي عذلك كفى تعـذل وأنـا عـذال
.أعذلك ياعذولي كف عذلك واتـرك التعذيـل
أبرحـل رحلتيـن مرحلتهـا تتعـب الرحـال
وبحـل بمحـل محتمـل حـلا بـلا ترحيـل
غريب(ن)غربلتني غربتي يا غربـه الغربـال
غليل (ن)غلني غـرو غـلاه الغـل والتغليـل
تزلزل الأرض ويزل القدم من هزه الزلـزال
ولا زلت استزل من الزلل وازعل من التزليل
هدف مجهول أخاف اجهل جهالة جاهل الجهال
أجامل وأتجاهل واجحـد الجهـال والتجهيـل






وهذه ابيات من احدى روائعه
ألاجواد واجـد والمراجـل لهـا كسـاب
لكن واعد العشـرة ليـا صـرت جمالـي
يطير الشـرار وكـل نـارٍ لهـا شبـاب
ومن ولع النيران يصبـر علـى الصالـي
تجارب حياتي معجـزة وادروب أصعـاب
ولقيت الرجال انـواع والـوان وشكالـي
صديق الشدايد ما خذا منك علـم وجـاب
وسيع الصدر يضحـك ولا هـو بزعالـي
صديـق الشدايـد لا ينافـق ولا يغتـاب
يدلـه غريـب الـدار ويزيـن الجـالـي
وصديق الرخى عقاب ومصادقـه عقـاب
شجاع الحكي والمـدح بالقيـل والقالـي
وصديق الرخى ما غير صورة ولبس ثياب
يا ليته يبرقـع مالـه شمـاغ وعقالـي
وعنـدي نصيحـه جـد ماقلتهـا لعـاب
أقول الصحيح ونايـم القلـب يصحالـي
ترا خوة أهل الطيـب يالطيبيـن أطبـاب
يطيـب السقيـم وخـوة الاش سـلالـي
تغانم شبابك يا بيض الوجه دامك شـاب
ترى البدر لو يطلع قمـر عـود أهلالـي
فلا تهجر المسجد وخلـك ورى المحـراب
ترى روضة المسجد لهـا منـزلٍ عالـي
ولا تترك اللي يزهمـك خايـفٍ مرتـاب
ترى الذل ما نجـى الثعـل بـا لتحيالـي
ولا لندى غير الفدى لـو تـروح أرقـاب
ومن ضاع شوره يا خذ الشـور ويمالـي
ومن با شـرك بالعـذر لاتلحقـه بعتـاب
ولا تشوف نفسك شيخ والنـاس عمالـي
ولا تهين نفسك لو تجي بين ضرس وناب
وهيبتك لا تنقـص ولـو ربـع مثقالـي
وبنت الردي لا يعجبـك زينهـا الجـذاب
تراهـا كمـا المخيـال خيـل وتخيالـي
ولو شفت حمر خدودها وثمـان أعـذاب
لا بدك تمنى ليـت مـا جالـك أعيالـي
ولدها لا ياشاف النقـى والملاقـى هـاب
ذليـلٍ بخيـلٍ فيـه خفخـاف وجفـالـي
أخذ بنت قرمٍ طيـبٍ ساسهـا مـا عـاب
تنومسك بنت الشبـل ويجيلـك أشبالـي
أعيال الذياب تصير مثل الذيـاب أذيـاب
وعيال الثعالـب مثلهـا زهـر الاذيالـي
وفرخ الصقر مثله وفرخ الغـراب غـراب
وبوم الخـراب ايقابـل العـش ويلالـي
الي صار راسك فوق يا طيـب الا نسـاب
فـلا ينحنـي لقـدام رجليـن ونعـالـي
لكن الله اللي يكتب الـرزق يـا خطـاب
هو اللي يفك البـاب ويقـص الا قفالـي
ولا يهمـل الا واحـدٍِ عايـفٍ الاشبـاب
ولا ضيع أحقوق البشر غيـر الا همالـي
وترى للقصايد كيف والكيف لـه شـراب
وانا ما مشرب الا كيف راسـي بفنجالـي
ولا طاوع الجاهـل ولا جامـل النصـاب
أقـدم يميـن الحـق واحـط معـذالـي
ولا ني بو الله طيبن له مـع مـن طـاب
ومن طاب لي برخص له الحال والمالـي
أكذب وانا خابـر واجامـل وانـا كـذاب
سنين مضت هـي صـدق والا يورالـي
تلخبط جهاز المخ وانهـارت الاعصـاب
وفورت دمـي وارتفـع ضغطـه العالـي
لكن في رجى اللي من رجى رحمته ماخاب
هو الواحـد العالـي وهـو ربناالوالـي
وهو الخالق الرازق وهو المعطي الوهاب
لـه الملـك كلـه والكمايـل والاكمالـي
رئوفٍ رئيـفٍ رحمتـه تنقـذ المنصـاب
يغيث الديـار الممحلـه عقـب المحالـي
شديد العقاب ويعتق المذنب اللـي تـاب
عسى مـا يوخذنـا بسيـات الاعمالـي
كما قالـه الله فصبـروا يأولـي الالبـاب
ترى الصبر زين وكلمـة الحـق تنقالـي
واصلي واسلم عد مـا تنبـت الاعشـاب
وما لاح بـراقٍ سـرى يشعـل أشعالـي
على المصطفى اللي وحد الدين والاحزاب
شفيع أمتـه يـوم الهوايـل والاهوالـي

في الختام نشكر شاعرنا عبدالله بن شايق ونتمنى له التوفيق وان يعود مجددا الى ساحة المحاورة
فنحن في غاية الشوق الى عودته...ونتمنى ان يحوز اللقاء على رضاكم وينال على اعجابكم....

مرعي بن دواس الحبابي 18-08-2006 01:13 PM

رد : لقاء مع متنبي الشعراء ( الشاعر عبدالله بن شايق )
 
الاخ ابن بطي السحمه

يامال الجنه الله يرحم والديك يابن بطي جبت بعض من شعر ومحاورات عبدالله وياليت تزود الزوار ببعض المحاورات

نتمنى لابن الشايق التوفيق واسمح لي اضيف بعض محاورات ابن شايق


مع الرياحي

احسب ان الجبل حرة واثر ضلع البقوم بقوم@@@ وانا في نجد ولا في الجنوب افخر بقحطاني

وله مع العير
حنا قحطان الي من البعد جوكم

العام مع شعب العصو حدروكم

يوم الجهل ويش امكم وايش ابوكم

والي يقول الحق ماهو بغلطان


وله مع المورقي

يالعتيبي نسيت علومنا لوليه

يوم قحطان جوكم من ورى ابها البهيه

واحشرو روق مع برقا بنجد العذيه

والحقيقه ترى مانبي الا الحقيقه

اوكلك وواكل خاونك خوابير @@ افضل اموت بعز ماموت ذلي

مع العير

العام جدك نحى عن ديرته وانحى

حول مع العتش والي ماصحا يصحا

والله مايمديك تنسى ديرتك صبحا

والعير دايم يدوره ويلقاها


والله انك يالمطيري ماتعيد الكره @@@ وان غدرتو في جمل خذنا القضى وطباني


مع زيد بن سمي


ياطيب زيد ابن سلمي لا لقى الملعبه

لاشك علم شنبي ضيع علوم شنبه

الدرس في المدرسه والكتب في المكتبه

يامطيري اوحيتني ولا انت ما اوحيتني

بيض الله وجيه اهل المقام الرفيع @@@ دلها والدروب البيض نندلها


ومع شاعر مطيري يقلل من ابن شايق والقرقاح والقرقاح غير موجو


تحدى يالمطيري وانت لاهذي ولا ذيه

وانا والشاعر القرقاح نجمين سماويه

تطاوع بالرضى ولاتطيع الامر جبريه

وهذى الليل ياشعار ياطوله على الساري

ياهلا مرحبا بك والمعرفه قديمه @@@ وانت لك حبه قبل امس عمك طحنها


مع فلاح الحنان


الجنوب ونجد مرباع قحطان

في الزمن هذلى وفي ذاك الزمان

ذا مكاني يوم كله له مكان

قدم المحماس في بطن الجحيم

ميرادكم هداج والوارد صدر @@@ظليمه اهل الظلم تهدم بيتها


مع سعيد بن رحمه المري


تكفون تكفون ياساس العرب ياقحطان

يامحزمي وقتنى الحاضر وذاك الزمان

عدوكم لا لقاكم جات عشره ثمان

عبد الله اوحاك وانت اضنك اوحيتني

كلنا زند واحد عند خشم الفتيله @@@ يوم بعض البنادق ثورة في خباها


مع الرياحي

انا وقفت بموقفي وانت خابر

وقف وفاء وقفة فهد دون جابر

والفرق فرق الحي واهل المقابر

والذل في بعض المواقف شجاعه

ياقشر زقم الببغاء ممغوط @@@ والفاطر القشرى حظينيه


مع المورقي


جوك الجحادر مع عبيده سوى

وعطوك جرح مالقوله دوى

والذيب الاسحم فوق راسك عوى

سبحان موفيها وديانها


حنا الرجل ابنا الرجل ابنا الرجال وانته عتيبي بس حاكمك بقمي@@@ غمض بعينك جعل عينك للرمد والي عقد روس الحبال يحلها

مع عواض الشهيب العتيبي


انشد شيوخ القبايل دل ياغادي

محد تجيه الهدايا مثل ابن هادي

يازين في نجد محداري ومسنادي

وان كان مالله رحمنا يالله الخيره


القحص الاربع عندنا والا انت ماحصلت شاه @@@ الله يردك في الجبال السود يافلاحها



مع صياف الحربي

ابشر بما يرضيك والليل بادي

انت هوى بالي وغايه مرادي

يابن نحيت ابشر بقوم ابن هادي

والصبر زين وكل مطرود ملحوق

اسمع كلام جرير يالاصمعي @@@ عطنى كلام الصدق لاتجهله


مع المورقي


الا بجلس في حصاتي وانا ناوي وناوي


اذبح الجذعان وابن عقيل والشواوي


واذبح ابن فهيد واذبح شلويح العطاوي

ولوعها نار والنار من شبابها



وهذي مع شاعر عتيبي ما اذكر منهو


الجحدري ذيب في العتبان يلقى عشاه @@@ وذيابكم عام لول طاحت سنونها


ياطيب عود تجونه تدفعون الزكاة @@@ انتم تسوقون والعالم يسوقنها

مع مساعد السبيعي


قال العلياني وزوده زودنا

حنا الجحادر والحباب عضودنا

في الحرب والله ماطفا بارودنا

والسيف يذخر لين تاتي حزته



وله الكثير ولاكن في وقت لاحق



ولك جزيل الشكر




اخوك


حبابي اصل وفصل

علي بن مسفرالحبابي 18-08-2006 01:32 PM

رد : لقاء مع متنبي الشعراء ( الشاعر عبدالله بن شايق )
 
[frame="3 80"]
ابن بطي السحمه

اررررررررررررررررررررررحب والله يحييك

وياسلام عليك الحقيقه جهد تشكر عليه يالغالي

بيض الله وجهك علي نقل وانتقاء رؤائع ابن شائق

موضوع مميز من شخص مميز لاهنت لاهنت لاهنت
[/frame]

سعد القحطاني 18-08-2006 01:48 PM

رد : لقاء مع متنبي الشعراء ( الشاعر عبدالله بن شايق )
 
ابن بطي السحيمي

لاهنت على إختصار هذا اللقاء الذي اجراه التاريخ مع الشاعر العملاق الشاعر العلم / عبدالله بن شايق الشاعر الذي خدم ساحه الشعر وطورها وأسس مناهج لايزال زملائه يستفيدون منها وبدون شك ستبقى مراجع للأجيال القادمه وستبقى مابقي الشعر

بيض الله وجهه وطول الله عمره

وبيض الله وجهك على نقل هذا اللقاء الجميل لاعدمناك

تحيات اخوك

ابن بطي السحمه 18-08-2006 02:14 PM

رد : لقاء مع متنبي الشعراء ( الشاعر عبدالله بن شايق )
 
سلمهم جميع......

أشكر كل من رد على موضوعي

ولمحبي عبدالله بن شايق لقد نزلت لكم عشر قصائد في المجالس الصوتي على الرابط الاتي :
http://www.qahtaan.com/vb/showthread...033#post141033

ولكم خلص تحياتي
وترقبو كل جديد

جبل بن زيد 18-08-2006 02:51 PM

رد : لقاء مع متنبي الشعراء ( الشاعر عبدالله بن شايق )
 
ابن بطي السحيمي

لاهنت على إختصار هذا اللقاء الذي اجراه
التاريخ مع الشاعر العملاق الشاعر العلم /
عبدالله بن شايق الشاعر الذي خدم ساحه
الشعر وطورها وأسس مناهج لايزال زملائه
يستفيدون منها وبدون شك ستبقى مراجع
للأجيال القادمه وستبقى مابقي الشعر

بيض الله وجهه على نقل هذا اللقاء الجميل لاعدمناك

تقبل وافر الاحترام والتحية

مشعوفان 18-08-2006 03:45 PM

رد : لقاء مع متنبي الشعراء ( الشاعر عبدالله بن شايق )
 
شاعر غني عن التعريف

تسلم يبن بطي على نقل اللقاء


لكل خالص الشكر

ابو خلوووود 18-08-2006 04:46 PM

رد : لقاء مع متنبي الشعراء ( الشاعر عبدالله بن شايق )
 
ماذا تقول لمن يستفزك؟

والله مـا نبغـى علـى الشوكـه نسحبكـم
لا شـك هـاذي يابـو تركـي سبايبـكـم
سيفـك لـراسـي وسكيـنـي لحبحبـكـم
يالحـا يومـا حـي يمـلا حـي ياليحانـي
لا تضيعهـا تضيـع ولا تجزيهـا تـجـزا ....... وابن شايق لو تولع جمرتك ما احرقت رزه
والله انها مشكله ياميم عقب القـاف والـزا ....ابن شايق يستفـزك وانـت تبغـى تستفـزه

صح لسانه ,وعرف كيف ياكل من كتف خصمه ..


عزيزي ابن بطي السحمه ,لاهنت على هذه المشاركة وتسلم ,وعندي لك طلب انك تدلني على المحاورة اللي جرت
بينه وبين الشاعر الآخر وجاب ابن شايق الموال هذا..

ابن بطي السحمه 20-08-2006 12:10 PM

رد : لقاء مع متنبي الشعراء ( الشاعر عبدالله بن شايق )
 
السلام عليكم ورحمة الله وبركاته
اشكركم جميع على الردود الطيبه وابن شايق شاعر كبير غني عن كل تعريف الله يرده للساحه

يابو خلود

اطلبك على العين والراس بس ماهي موجوده عند ذلحين بس قرين ان شا الله بنزلها بمقطع صوت والي عند القصيده من اعوا ل الشايب لايبخل علينا فيها

ولكم خاص تحياتي

مفلح الشواطي 20-08-2006 03:43 PM

رد : لقاء مع متنبي الشعراء ( الشاعر عبدالله بن شايق )
 
شكرا لابن بطي على هذا اللقاء وبودي أن تشير الى المصدر لأنني سبق أن قرأت هذا اللقاء بنصه في أحد المنتديات وشكرا لحبابي أصل وفصل على التوثيق الرائع 0


الساعة الآن 02:30 PM

Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir
جميع الحقوق الأدبيه والفكرية محفوظة لشبكة قحطان وعلى من يقتبس من الموقع الأشارة الى المصدر
وجميع المواضيع والمشاركات المطروحه في المجالس لاتمثل على وجه الأساس رأي ووجهة نظر الموقع أو أفراد قبيلة قحطان إنما تمثل وجهة نظر كاتبها .

Copyright ©2003 - 2011, www.qahtaan.com