شبكة قحطان - مجالس قحطان - منتديات قحطان - للي يجهل القياده في الرمله يتفضل

- مجلس الباديه والرحلات (https://www.qahtaan.com/vb/forumdisplay.php?f=23)

- - للي يجهل القياده في الرمله يتفضل (https://www.qahtaan.com/vb/showthread.php?t=13667)

للي يجهل القياده في الرمله يتفضل

السلام عليكم ورحمة الله وبركاته :
شاهدت مجلس الصيد والرحلات البريه ووجدت انه يفتقد هذا الموضوع وحبيت اني اوضح لكم بعض الامور المهمه في القياده في الرمله (الطعوس) وارجو ان يكون موضوعي جميل وان لا اطيل عليكم .

اولا :
ان كان موترك جيب حاول ان يكون ضغط الاكفرات ( الهوا) 20
وان كان موترك هايلكس ولا ددسن يكون الضغط 15

في حال دخولك الرمله حاول انك تمشي على درب سياره قد مشت من قبل لانك بتحس سهوله في مشي السياره وان كان سيارتك جيب فلا تشغل الدبل على طول شغله ان كان نشبت . وبعد حاول ان عداد الضغط (الكمبريشن) مايزيد عن ثلاثه لجل تاخذ السياره راحتها وما تحفر .

ثانيا :
في حال طلوعك للطعس للسيارات دفع ثنائي من الصعب جدا ان يكون طلوعك عمودي فلذلك حاول انك تطلعه بميلان وتكون تعشيقتك في الثالث ورجلك ثابته على البنزين لا تزيد ولا تنقص الا في الضروره مثل تعترضك سياره لا سمح الله ، وفي حال النزول يكون بشكل عمودي ورجلك لاتقرب الفرامل حاول انك تهدي بالترس وترفع رجلك من الكلتش شوي شوي لان اذا مسكت فرامل يمكن ان تميل السياره وتروغ وتتقلب لا سمح الله ، اما بالنسبه لاصحاب الجيوب فيتخذ هذه الطريقه بدل مايشغل الدبل ويتعب دفرنسه وفحماته .

ثالثا :
في حال نشبة سيارتك (غرزت) للي معهم سيارات فيها صندوق افضل انه يحتا ط قبل لا يطعس ويمرله عماره توها تنبني وياخذ منها ( مربوعتين ) خشبتين من حق العماير وما تكون طوال يعني متر كفايه يضعها تحت الكفرات اللي غرزت ويدوس شوي شوي الين تطلع واذا طلعت يا سنايدي عشق اثنين وامش ، اما اصحاب الصوالين فحظهم بالدبل .

رابعا :
اذا خذتك الفزعه وشفت احد مغرز . ان كان سيارتك دفعها ثنائي فانزل الله لايهينك ودف معه، واما ان كانت جيب فدف السياره مانفع اسحبها وانتبه لا تخلي الواير او الحبل ممهول وتنتق السياره لانها توجع دفرنس سيارتك ، وهذا البلا يجي واجد في دفرنسات النيسان دايما تتعب من النتق.

اخيرا .......... اعذروني يا اخواني ان كان طال شرحي وعساكم ما تشوفون شر .ارجو لكم الاستفاده والسلام عليكم ورحمة الله وبركاته.

لاهنت ووافي وماقصرت وبيض الله وجهك على كل حال

السلام عليكم ورحمة الله وبركاته
الله لايهينك معلومات طيبه كانت تجهلني
وخوك مامعه الا دباب
شاكر لك على المشاركه وتقبل فائق احترامي

بن فالح

شكراً لك اخي الكريم على هذا المشاركة معلومة يستفاد منهاقناصين الرمله.

شكراً لك اخي الكريم على هذا المشاركة

اللي يجهل القياده في الرمله وهو لحاله أزين له أنه ما يغامر إلا لحاجه ضروريه لأنه خطره بشكل محد يتوقعها خصوصاً إذا كانت المنطقه الرمليه غير مئهوله بالسكان والماره

وإذا لزم الأمر يتزود بالماء والوقود الكافي والأحتياطات اللازمه الوارده في الموضوع

مثل عيار الهواء منفاخ هواء أكثر من سبير أحتياطي

شكراً لك يالدحماني على الموضوع

شكراً لك اخي الكريم على هذا المشاركة