المساعد الشخصي الرقمي

مشاهدة النسخة كاملة : ديوان الشاعر/حمدبن عبدالرحمن بن علي المغامس (((الوردي)))


راعي الخطامه
02-03-2006, 02:20 AM
http://www.l22l.com/uploads/003c5f55ec.jpg


الوردي هو لقب الشاعر/ حمد بن عبد الرحمن بن علي المغامس من المشارفة من الوهبه من بني تميم
الميلاد /خطامة سدير عام 1371هـ
العمل /مساعد إداري بمجمع الملك سعود بالرياض القسم الابتدائي
سيرته الشعرية /
1ـ عضو لبرنامج البادية والخيمه الشعبيه بإذاعة الرياض
2ـ وصل للعالمية بقصيدة (سلام الله على من شب ناره في ظلام الليل ) حيث مثل بها التراث السعودي في اليابان (طوكيو)
3-حصل على المركز الأول في مهرجان أبها عام 1422هـ لأفضل قصيده سياحية
4ـ له مشاركات عديدة في المجلات والصحف
5ـ من اشهر أمسياته الشعرية:ـ
1- أمسية العيينة
2-أمسية حائل
3- أمسية في فندق الخزامى بالرياض
4- أمسية النبهانيه
5- أمسية عنيزه
6- مهرجان عين دار
7- أمسية الزلفي
8- شارك في المهرجان الكبير في أم رقيبة ((مخيم ابن عثمان))
9- ملتقى البابطين في روضة سدير

المشاركات والأمسيات الخاصة
1-مهرجان الخطامه بسدير أيام العيد
2-شارك في حفل أهالي جلا جل أيام العيد
3-أحيا أمسية آل سعيد
4- المشاركه بقصائد في اجمتاع المشارفه

كذلك صدر مؤخراً ديوان مسموع للشاعر حمد بن عبدالرحمن علي المغامس المشرفي الوهبي التميمي والملقب بالوردي واشتمل على عدد من القصائد في مختلف أغراض الشعر.. والديوان بصوت الاخ/ عبدالعزيز الدويش والشريط موجود الان في جميع التسجيلات الاسلاميه بالرياض ومازال التوزيع مستمر لجميع مناطق المملكه ان شاء الله
http://www.alriyadh.com/2006/01/04/article120417.html

راعي الخطامه
02-03-2006, 02:21 AM
من حرف الشعر ياناس يلدي = يقرى القصايد يحرف في قوافيها
هبت هبوب السماد وجابت البردي = هبوب أقشر سماده ريحته فيها
شعف بها فرها ليه وجت عندي = غصب عليه وأنا يا عمير ما أبغيها
مخزيه ربي كبار السن يوذيها = من قرد حظه تبين لي متحدي
شيطانها اللي بها ما يعرف الوردي = مثله وجنسه تعرقى به علابيها
لو كان رجال يخسى مايجي قدي = مثله علابيه بالرجلين اوطيها
ترى الأسد مايصنف منزلة قردي = اكالت الموز لو جاها يدميها
وقت تغير وبه ما ادري وش نبدي = لكن نجامل خشاش من اجل اهاليها
وللي ملكع يعرف اليوم أنا قصدي = ون سلم راشي مع الأيام اوريها
جرب تحكحك واظن الجرب ما يجدي = كل واحد أقيده بقياد منفردي
لابد زرنيخ به ياعمير نطليها = من لامني قلت له من شان اداويها
الينه للدوى بالحيل بالجلدي = ومن صالحه علته به ما نخليها
ومن حر مايونسه يصرخ ويستجدي = ماحر داوا وللعلات يشفيها
ياكود يشفيه ربي خالق العبدي = ماعاد نخشى على غيره يعاديها

راعي الخطامه
02-03-2006, 02:22 AM
الناس في ذا الوقت اشكال والوان = والحر يعرف مقصدي بالاشاره
وقت مضى والرجل للطيب عنوان = لا جاه ضيف قلطه شب ناره
فيهم طبايع حضر مع طبع بدوان = درب المراجل عارفين مساره
وفيهم ترابط كلهم ربع واخوان = عن طاعة الله ما شغلهم تجاره
الشعر لو تقراه في كل ديوان = يحرص على الطيب ويرفع وقاره
يوم الجهل والناس قوم وعدوان = فعل الفتى معروف في كل غاره
ما تستوي بأفعالها طيور حوران = كم واحد زاد الحمل حمل جاره
واليوم صار العلم بيدين نسوان = بعض الرجال اليوم نقص وخساره
مدهال للنسوان وقت الزياره = لو حط وسط البيت مجلس وصيوان
من له قرابه بالمره صار موان = ياخذ ويعطي علم حسب اختياره
نسوان خلت بعض الازاج عوران = ينظر يمين ولا يناظر يساره
وختامها طالبك يارب الاموان = تهدي رجال غيرتها الحضارة

راعي الخطامه
02-03-2006, 02:23 AM
بالمجالس لا تسب ولاتذمي = ومن يقصر في لزومك سد بابه
ومن فعل بعض الاوادم فار دمي = سهمته فلان مني ولد عمي
عنصري والدين ما يحسب حسابه = كم قريب لك فزعته لك ما تتمي
وان بدا لك لازم ما ينغزى به = والمودة ما تحددها القرابة
جاهل وماسون من دون علمي = منافق يوم رفيق ويوم خصمي
ضاري بعلم الردى باول شبابه = وده ان الربع دايم في طلابه
ما يميز بين لا وبين قرمي = ومن عنا له قال لي ويش جابه
للقرابة والربع ما شال همي = النعم لله مثله ما حظى به
مارد مجهول ناشف ما يجمي = مابه الاحنظل مغطي ترابه
مثله وشر واسلمه غير سلمي = مثل جو يخدعك منظر سرابه
غير راعي المصلحة له ما يخدمي = جنس هذا يالربع ايش امغابه
شاعر شعره يخص ولا يعمي = حيث شعره لا نشر كل درا به
فيه من هو جيد وقوي عزمي = فيه نخوة للربع زايد ذرابه
مع رفيقه جيد بالحيل نشمي = لا عناله قال له يا مرحبا به
يرتكي له دايم لساقته يحمي = ذيب ماخذ قسمته بين الذيابه
راجح بالعقل عنده زود حلمي = بالمحاضر لا حضر خصمه يهابه
بالمراجل فايز ماهوب دقمي = محصل مطلبه الى منه سعى به
ياخذ ويعطي معك ماهوب حرمي = غير ذا بين الربع فيه الحبابه
مخلص للود يبني ما يهدمي = هو عمار المجلس اليا من لغى به
جلسة وياه تجلي كل غمي = تفقده بالحيل في حالة غيابه
وان حضر له مادبه لازم يعزمي = الكرم والجود طبع ضرى به

راعي الخطامه
02-03-2006, 02:24 AM
هذي القصيده قالها الشاعر في حفيده حمد بن خالد بن حمد عبدالرحمن المغامس عند سفره الى الولايات المتحده الامريكيه مع والده خالد بدوره لمده عام


سافر حمد ياشين بيتي بلياه = ما يدري ان جده ذرف دمعتيني
يفز قلبي كلما اوحيت طرياه = يوم السفر ماذاقت النوم عيني
اسمع صدى صوته ليا قال ياباه = بالحلم تالي الليل دايم يجيني
اول ليا منا بغيناه نلقاه = واليوم حال البعد بينه وبيني
يابو حمد عطوه أي شي يبغاه = وزيدوا عليه بعطفكم والحنيني
متعود جده ليا صاح وداه = صوب البقالة ما بغى مشتريني
لا من بكى ذا الحين انا ما اسمع بكاه = وعينه تدور لي يبكي يبيني
متعود لاصاح اجي واتراضاه = اضحك معه وادور به دورتيني
بالجيب نمشي خاطره ما كسرناه = واللي يبيهم كلهم راكبيني
ياليت خالد ماخذه معه خلاه = وبشوفته صبح ومسى مهتنيني
ديروا عليه البال يالله ياقاه = يا علكم في هالسفر غانميني
عشرة شهور وذى شهر ما رجيناه = نصبر بها والله لعبدة يعيني
وان زادت المدة عنينا وزرناه = في طائرة بوينج له قاصديني
يالله ياللي كل خلقه ترجاه = ترد عيالي كلهم سالميني
وختامها صلو على من تبعناه = سيد البشر هو خاتم المرسليني

راعي الخطامه
02-03-2006, 02:26 AM
دور على خبير للأخيار طمام = من لابه معروف عالي مقامه
متخرج بالطيب للربع حشام = مهيوب عند الناس ماهو فدامه
تلقاه في وقت به عناد وخصام = من غرته نفسه كرب له خطامه
عن صاحبه ما صد خلاه ينظام = خلاه في هم يكدر منامه
رجل ليا منه برك للحمل قام = ذرب يعرف المرجله والشهامه
دايم عشر مابه وساويس واوهام = ترتاح في مجلسه وتلقى كرامه
نفسه عزيزة عن هروج القفا شام = رجل يحسب حساب لاية ملامه
ذليل مع ربعه وللخصم لطام = ماهوب سهل من تهقواه ضامه
الطيب فايز به على مر الايام = يعرف مواجيبه ويعرف نظامه
جزل ولا عنده حساب للاقيام = ماجاز له بالسوق شافه وسامه
روضة المسجد مع الصف قدام = في وقت الفرايض حاضر قبل امامه
والفجر ما خلاه في مرقده نام = انفاتته ما يهتني في منامه
الرجل بامر الله تكون بالارحام = احد يجي مكسب والاخر ندامه
احد تحسبه متبع دين الاسلام = وطبعه يخالف دينه مع كلامه
ياما توهقنا مع انذال وخمام = منهم نبي مخلاص ويا السلامه
فيمه ضعيف النفس تبل ونمام = سهمته بين الناس نقل النمامه
نقص ليا جالجد ماهوب جزام = عند النوايب ما تشيله عظامه
طيب ليا من صار مكشات وخيام = والمسألة ساعة صدر وابتسامه
ليت الردى يوسم على الوجه بوسام = حتى نعرفه لا لمحنا العلامة
ماننخدع بالشكل مع كبار الاجسام = نحسبه رجال ولابه غشامه
تمت وصلوا عد ما صايم صام = على نبي الله لشعري ختامه

راعي الخطامه
02-03-2006, 02:27 AM
من قدرك قدره بالك تخليه = الدين عن قل الترابط نهانا
من وجب الدعوه نعزه ونغليه = ما نتركه بعدين لا من دعانا
نمشي مثل ممشاه لازم نجاريه = نعطيه قدره مثل ماهو عطانا
مثله نرحب به ليا جا نحييه = خلى ارتباطه جالنا من غلانا
حيثه رفيق ما نبيعه ونشريه = نحرص عليه ولا بغانا لقانا
نحرص على شوفه ودايم نداريه = ونقول له ارحب ليا من لفانا
ناخذ علومه كل ما حل طاريه = ماننشغل عن واحد ما نسانا
واللي يجافينا ترانا نجافيه = ما همنا لو راح عنا وجفانا
ماله حقوق عندنا مع مشاريه = حتيش لو قفا ولا عاد جانا
هذا رفيق المصلحة ما ندانيه = نقص علنا كلنا وارفقانا
ناقص مراجل ما وقف دون عانيه = يسمع كلام وينقله من ورانا
نفسه عليله والحسد واضح فيه = من شوفته ياضح لنا ما خفانا
والقصد واضح بينات معانيه = لو نطلبه فزعه حشا ما شفانا

راعي الخطامه
02-03-2006, 02:28 AM
مزايين الابل بام رقيبه


يم المزايين جيت اشوف المغاتير = والشعل ويا الصفر هن والمجاهيم
يا زينهن يا سيف لا مرن عصير = يمشن ورى الركبي بربيع المواسيم
مع كل خلفه ماشيه حاشي صغير = وارقابهن مرقمه بالتواسيم
والسقس يتبعهن وهو مهدي السير = قدمه فحل بيديه قيد بملازيم
يا حلو مظهرهن وهنه مناثير = في جو غايم لطفه رش من غيم
نقوه منقيها رجال مناعير = خويهم لله ما يعرف الضيم
غز لراعيهن ولا هن مخاسير = في محكم القرآن ذكر بتعظيم
وقت مضى مافيه أم الجنازير = هن جيشنا برجالهن الصواريم
يا ما قطعت هي من بعيد المشاوير = عراض المواطي تلطم الخد تلطيم
لا من تمطاها رجال مغاوير = بسيوفهم والشلف شدو المحازيم
لو كنت بسكاكا ونيتك خرخير = تمشي ولا تحتاج زيت وبنزين
ما بينهن فاطر ولابه معاشير = كحلن نواظرهن ولاهن مقاطيم
وعقب الفجر توي مسبح بتكبير = لا فطرت اعس الخد بعالي المراجيم
في قدرة الخالق ندير التفاكير = وندعيه لانفسنا بحسن الخواتيم
ولتميم ربعي جيت ضمن المسايير = القى الوناسة والمعزة وتكريم
في صيهد بين الوجيه المسافير = عند الحلال مريح البال ومقيم
والنجر يلعلع تقل صوت المزامير = في مخيم اللي ينطحون الملازيم
فنجال ودلة والسطول المزابير = حليب ابكار راعيه دون تطعيم
مرباعهن والعشب ما تاكل شعير= عشب من الوسمي وقد عله الديم
اسلومهم للضيف حشمة وتقدير = مايشغلك بالهرج والسين والجيم
يذبح الحشو ويا الهرافا مشاهير = = هل المواقف منفذين الغراريم
وبعد النتايج هي وفرز التقارير = سلم لهم مشعل ظروف مخاتيم
صاحب سمو نعرفه كلنا امير= جمال فطره باخص حيل وفهيم
الله عطاه الراي وصرفه وتدبير = من آل سعود وله معزه وتحشيم
ابوه من حام الجزيرة كما الطير = بسيف سنين الحد ما به تثاليم

راعي الخطامه
02-03-2006, 02:28 AM
بقدوم ابو تركي دفعنا التباشير = انقد بشرع الله كل المظاليم
قبله قبايل دينها ضعيف وتغير = كل بنا المرقاب باعلى الخواشيم
فعله نعرفه ما يبيله تفاسير = يجزاه رب يغفر الذنب ورحيم
خلف لنا حكامنا ها المغاوير = دستورهم واضح ولا فيه تعتيم
ابن مغامس مجتهد بالتعابير = ابيات شعر قالها لكم بتنظيم
شاعر ولا ينظم شعر دون تبرير = الوردي المعروف بسدير ابو دحيم
ونودع الاخيار بلقيا على خير = في موعد بالطيب ولا بتحريم
ونمشي بشاص به سلوقي مع طير = وصقار متدرب على القنص وفهيم
مشيك على زيت المكينة مع القير = لا من دعسته سرعته تسبق الريم
بالنفد نمشي هب طلوع وتحدير = زود على رفعه مزود بترهيم
مركب له من عراض التواوير = يشمخ براس الطعس من دون تنسيم
مجهز بماجلان وكنود له اسبير = مفصل على المطلوب ضمن التصاميم
معي ولد قحطان شوق الغنادير = من عيال مفلح للمعادي مكاعيم
راعي سنا اليا لفينا خطاطير = ثور برشاشه تحية وتسليم
وقرص الجمر سواه لي دون قصدير = سواه راس من الرجال الشغاميم
ونلقى القيري ما ندور عصافير = لا لعلعن بذنك سواة التناغيم
وايضا الزبيدي مزمر دون تحفير = نهديه ما ينباع لو مننا سيم
مسقيه رب البيت ما شرب من بير = بالقاع من كبره تحسبه مراسيم
ولا منقضى المقناص عودت لسدير = لاهل المراجل من سنين مقاديم
أهل المواقف بالليالي المعاسير = ومن يمدح الاهيار لاشك ماليم
زحول الرجال مخرجين الدنانير = اشهد لهم من دون حيف وتضخيم
وختامها بالعذر عن كل تقصير = ماحد كمل من دون نقد وتعاليم
وصلوا على منهو دعانا بتحذير = تعداد وبل طاح ومشى المرازيم
عن يوم ابي ناقف سويه طوابير = ياعلنها بها اليوم نطلع غوانيم
في يوم ما به تاجر ولابه فقير = نرجي رضى جزل العطيات وكريم

راعي الخطامه
02-03-2006, 02:30 AM
سلام الله على من شب ناره في ظلام الليل = على مجمار جنب الروض فيه دلال مركبه
على خد رفيع منزله جنب طريق السيل = ذبح له هرفي علقه في شنكار سحبيه
الى منه طلع بالنفد كنه فوق نهر النيل = رياض خضر من فضل الولى بالسيل ممليه
معه نقوة رجال ما تعرف القول ويالقيل = وخيمة جنبها جيب علاماته خليجيه
وعند عدة القنص من شوزل الى دربيل = يعس الخد والوديان يقنص كل عصريه
على يمناه ابن عناز من قوم تعسف الخيل = فهد ولد العقيلي خوته بالحيل نشريه
ومن قحطان ابوخالد وسيف مذبحين الحيل = وابوتركي وعايض من بني مفلح وفهديه
يقوله شاعر شعره عدال ولا يجيه الميل = من آهل سدير شاعر يعتز عزوة تميمه

راعي الخطامه
02-03-2006, 02:31 AM
أبتدي باسم الولي رب خلقنا = خلق خلقه وخلقه يعبدونه
نبذل المجهود كله ما ذخرنا = والشعر لأهل الوفا يستاهلونه
وانظم بيوت قوية ما اتانا = اشكر بها واحد بي تعرفونه
منسبه معروف وحنا ما جهلنا = مشرفي تميمي ما تاصلونه
من سلالة شيخ به ياما فخرنا = عن حقوق الله ما جته المهونة
يوم شفته قلت ذا فينا ومنا = وحده اللي كلكم تعرفونه
الإمام اللي عن البدعة عدلنا = منهجه بين المناهج تدرسونه
بعد ربي له فضل فيه اعترفنا = مثله وشرواه فضله تفهمونه
ذي شهادة حق وحنا ما جحدنا = ومن يقول الحق قوله تقبلونه
وصالح آل الشيخ هو محقق طلبنا = مثل ضلع طويق للي يزبنونه
يوم جينا مكتبه عنده دخلنا = قال تم للي حضرتوا تطلبونه
مثل هذا بالحمية ما خبرنا = اشهد انه للوفا رمز ونمونه
مثله وشرواه بيحقق املنا = للوفا سباق ماهم يسبقونه
شيخنا قيدو منا مهما مدحنا = مثله الشعار غصب يمدحونه
للصخا والجود صحونه تثنا = حاتم الطائي وذا له نمونه
تحتها السفره وفيها ما تمنى = العرب من جاد فعله يذكرونه
والمباخر جمرها عوده عمسنا = ينتقون الزين وفيها يجدعونه
ربعي آل الشيخ والله واجهتنا = من يجاريهم حشا بي يتعبونه
بالشعر لامثالهم مهما قصدنا = فعلهم كايد ونقصر غصب دونه
حظنا اللي قدنا لمثله عرفنا = بمجلس الاخيار يوم هم يكرمونه
ساعة مبروكة فيها حضرنا = مع وجيه رجال من جا يقدرونه
والختم صلوا على خاتم رسلنا = عد ما نور برق هلت مزونه
المصطفى اللي لدعوته حنا استجبنا = مرسله ربي لخلقه يعبدونه

محمد التميمي
02-03-2006, 05:14 PM
صح لسان القايل ولا هان الناقل

راعي الخطامه
09-03-2006, 01:39 AM
صح لسان القايل ولا هان الناقل

لاهنت ياولد العم وشاكر ومقدر لك مرورك يالغالي