المساعد الشخصي الرقمي

مشاهدة النسخة كاملة : مساجلات شعرية


إبن الأروق
28-11-2004, 12:17 PM
السلام عليكم ورحمة الله وبركاته

أخواني وأخواتي أعضاء منتديات قبيلة قحطان

أود أن أشارك بهذه المساجلات التي حصلت بيني وبين بعض الشعراء في أحد المنتديات قبل أقل من يومين .


و من كم يوم نزل واحد موضوع شعري يتحدى فيه ، حيث قال :

تحدي بالقوافي


بقدم للي تحدى من القصيد احلاه=وافاخر في قصيدن ما تعايابه
انا شعري يجيني كيف ما هواه=يطاوعني أمر ولا ترشي اكتابه
على كيفي ارتب بيتي و أشعاه=وألاعب حرف وأدخل بيت من بابه
صحيح الشعر له مذهب طويل مداه=ولكن قوي باس و أدراابه
وعلى ماقلت اعرف السم و دوااه=وأعرف أرد لك بيتك مع أسبابه
فالحين خلك بطرف السيف و احذاه=وشلك على مايات لعاابه
بحورنا يا الحر زرقا و مملاه=ومثلك يجوز يغط في ترابه
ان سالت عني فنا غر في صباه=ذيب وحش يعيش في غاااااابه
تراني ولد شاعرن ما وصلت اسمااه=اصيغ له شعري و اموت واحيابه

وسلمتوا

الشاعر ...............


فرددت عليه ب :


السلام عليكم

والله قصيده روعه

اسمح لي يالمغترب بهذي الرديه السريعه



أحد(ن) يهوى القصيد وأحد(ن) يتمحلاه=وأحد(ن) يفاخر به كيف ما جابه
جانا من المغترب قصيد(ن) زين ما ازهاه=يطاوعه الطاروق على ما اشتهى به
جزل(ن) قصيده .. يازينه وزين مبناه=ويا مغزر بحور الشعر ومكثر غبابه
ويا مبعد جمة البير ويا مطول رشاه=وخطر(ن) وروده على المبتدي يغدا به
وإن كان تطري يالمغترب السيف فحذراه=لا يصيبك منه مصفوح والا يصيبك ذبابه
وخل عنك التحدي وخل عنك الذيب وعواه=حنا هل القصيد وحنا اللي طربنا به
يا طول ليل المعني وياطول مسراه=ويا طول ماهو عايش(ن) في عذابه
ونعم(ن) بك يال.... أقولها دون مماراه=ياللي دون رفيقه ومخشره في زهابه
وأختمها بخير ما تختم به الأفواه=صلوا على النبي وترضوا على أصحابه

وسلامتكم


عندها بين لي بأن قصيدته كانت ردا سيرده على أحد الناس الذين تكلموا عليه بكلام ، وليست تحديا بمعنى الكلمة ، ولكن أوضح بأنه كان يريد أن يرى ردودنا على قصيدته ويأخذ رأينا فيها .

وهنا أتت شاعرة وأضافت هذه القصيدة ، وهي على النحو التالي :



انا برسل بما معناه أو مغزاه=قوافي قد تميت القلب وتحيابه
وانا إن قلت قولي كان له مبداه=ولاارجع به ولو به قص لرقابه
بعد ما خاطـَرت فكري ظنون اشلاه=نبشت حروفك الأولى والكتابه
وقلت شفيه هذا وليش ما سواه=تجاهلني وانا أول من طرق بابه
يروح ويرجع ولا زال اهو يسلاه=مقالي بالرغم ما شيّ قد عابه
وهذا يوم شعره بفخر ما سواه=عيل يا كيف إذا هو فقاع ما جابه!!
احيد الزين غير الزين ما ينصاه=ولا ظني كشف قولي لكم نابه
ترى أصل الرجل ماهو بما دعواه=لزومْ يسبّق افعاله للكتابه
وهذا ختام قولي .. وارجع وإقراه=وعذر ٍ .. قلت شي الغير ما يابه


فرددت عليها بالأبيات التالية :



بسم الله الرحمن الرحيم


صلوا على الرسول ... اللهم صلي وسلم عليه



يازين سوالف الغضي ف أوّل صباه=ويازين سواليفه إليا اكتمل شبابه
حيّ ذاك الكلام وحيّ الّلي حكاه=وحيّ القعيد الّلي ينومس أصحابه
ما يندرى ياعرب الزّين وش جاه=علمه لفاني على غير ما هقا به
علمٍ قريته الصّبح ف أوّل ضياه=منْه الوضوح مختلط مع ضبابه
ما امْدى القلم يكتبْ والفكر ما امْداه=وما امْداني افهم كيف يبغي جوابه
أنا ما ادّيت له يوم الّلي عليه أدّاه=والظّاهر إن عنده كلْ شيْء بحسابه
وإن كان يطري التّجاهل ما قصدناه=عزّ الله إنها غفلة من إبليس واسبابه
والفخر..حنّا أهل الفخر والمحاماه=والاّ غيرنا ونعم ما انْتهزّا به
وإن كان يطري الزّين..ملزوم ننْصاه=دامه نايفٍ يخالط القمة سحابه
وإن كان الزّين يطري الفعل بأنهاه=حنّا اللي ماضيٍ فعلْنا ينْحكا به
نتبعْ لنا شيخٍ تخالف سراياه=على كسْب النواميس متْعب ركابه
كم وكم حريبٍ لنا قد عقرْناه=وكم شيخ قومٍ نرميه عشاً للذيابه
وكم من واحدٍ قد عرقْنا كلاه=وحنّا له مثل العلقم في شرابه
وياكم من واحدٍ رفينا خطاياه=وياكم من واحدٍ حملْنا أتْعابه
نفزع إليا الغضي رمى غطاياه=نثْني عنده والموت مادرينا به
كله لعينا الّلي مفرّقه ثناياه=الّلي بفعلْنا يماري في خطابه
وناب قولك يازين ترانا كشفناه=المحاوره هي أول طرْق أبوابه
يازين خلّك أمير حلةٍ في مشتاه=ذرب اليمين وعالمخطي سهلٍ جنابه
واقْبل العذر منّي ياغرٍ في نماه=إقبله صافيْ ماطِرْقت إلْحونه ربابه
ولكْ الحشمة من أوّل الشّرْق لأقْصاه=ولكْ الرّضْوَة يا حاضرٍ في غيابه
ومايمشي السّيل في غير مجْراه=وما يخْطي العبد ما خِط في كْتابه
وسلامتكم




هذا ماحصل منذ يومين


وسلامتكم

خالد آل مطرف العاطفي
28-11-2004, 05:25 PM
ارحب ياابن الأروق
وش ذا العلوم اثرك والله مانت بسيط صح السانك والله ملايين ياخي وينك من اول معناته فيه غير ذا القصايد قصائد اروع
ياابومحمد .. بس الصحيح انت يوم مارديت على المره غشيم والا تغيشم ..اخاف انك اللي مخطط ياابن الأروق ..
على العموم الحمدلله ان منتدانا جعل القائمين عليه يسلمون مافيه نسوان يرادون الرجاجيل والا كان علوم ياابن الأروق ..
الربع يتزرقون المحاورات ولو يجي حولهم احد ٍ طارو به سما ..

اخوك
خالد

ابن عاصم
28-11-2004, 07:35 PM
اشهدددددددد انك يابن الاروق مانت بسهل والله ابياتك قوووووويه ومخبي ذا الموهبه منا

اتحفنا بجديدك نفداك

ترى نتظر منك قصيده لا وش قصيده الا قصايد


ابن الاروق جعل عمرك سنين


اخوووووووووووك

ابن عاااااااااااااصم

عبدالرحمن
28-11-2004, 11:23 PM
مشكور أخوي على هذا الطرح الجميل

أوفقك على هذا السلام الذي يخص الأعضاء ذكور لاإناث لاني اتوقع المتوجدين في شبكة قحطان من الاعضاء هم مثلك

وشرواك من صبيان قحطان



أخوك عبدالرحمن

إبن الأروق
30-11-2004, 07:17 AM
هههههههههههههههههههه

الله يحييك ياخالد

أحسن الظن بارك الله فيك ، مغير مداعبات وسوالف بس !!

ومنتداكم مبارك إن شاءالله

واللي في جعبتي راح أنزله على أقصاد !!


لاهنت على مرورك الكريم

إبن الأروق
30-11-2004, 07:20 AM
جعلها كلها على طاعة الله ومن يقرا

وأشكرك أخي الكريم ابن عاصم على ردك الطيب ودعائك

لاهنت على مرورك الجميل ، وابشروا بها بس بالاقساط !!

شكرا مرة اخرى

إبن الأروق
30-11-2004, 07:22 AM
اهلا بالاخ عبدالرحمن

لاهنت على مرورك الطيب وردك الجميل

ادري انهم كلهم رياجيل اللي يشاركون من الاعضاء ، ولكن فيه اعضاء مايشاركون من النساء

فالحاصل اني عميت جميع اللي يطلع على الموضوع ، والكل له حشمة وقدر من المشاهدين


شكرا لك على غيرتك على هذا الصرح