ابن عقيل عقيد الدعاجين

[الذويب]

ابن عقيل عقيد الدعاجين و جماعتة غارو على اثنين من الخنافر معهم اختهم عند ابلهم في العمق وهي ديره دون الرين يبون الابل عند ذلك صاحو الثنين على اختهم ترد المقهور حتى ما تهج البل وعند ماقربوا من البل الدعاجين رمو واحد من الخنافر لهو طايح ميت ورموا الاخر لهم كاسرين ايده وهو دون رحوله مبركها بينه وبين القوم فشل ايده المكسورة وحطها على الرحول يعنز بها للبندق واضرب بها ابن عقيل لهو فاقع راسه واضرب الاخر لين انكسر القوم وخلي ابن عقيل طايح و انتهت الغارة ولفيه واحد من ال شريم ال عاطف في الحسا وقصراه دعاجين فيوم سمع السالفة تهيض وقام يغني :
حي الطروش وحي علم لفوبه
حتيش لو يزرون الدعاجين وش عاد
المشرك اللـي لابتـي غدوبــة
حطو حصاة العمـق من تحتــه وساد

[حسين آل حمدان الفهري]

الذويب

السلام عليكم

ابن عقيل ذبحوه المسارده عبيده
والقصيدة اطول من كذا.

اشكرك.

[محمد الحياني]

مشكور الله يعطيك العافية



لاهنت اخوي الغالي

[الذويب]

اخوي حسين اشكرك على اطلاعك ولكن معلوماتك خاطئة ابن عقيل عند الخنافر وعليها شهود وعلوم رجاجيل وتأكد من معلوماتك

[الذويب]

فتى الحوة ويعافيك ولاهنت واتشرف بمشاركتك

[سيل الرفايا]

الذويب مشكور على ماسقت والخنافر ربع(ن) وافين وقوعهم في الحفّ تنومس كافة قحطان

لا خلا ولا عدم ياغناتي

[الذويب]

سيل الرفايا حياك الله وقحطان وكل قبيلة فيها حقها والله يحيك

[حسين آل حمدان الفهري]

الذويب

السلام عليكم

مقتل ابن عقيل ليس بالبعيد نسبياً اذ كان ذلك عام 1333هـ
والذي قتله هو الفارس ابن غنيم من المساردة.

وهناك شطر بيت في القصيدة يقول.

عيال مسرد.............................. ++++ ما باقي الا صقر وشداد.
وانا آسف لنسياني البيت كاملاً
ولكن الشاهد ان الشاعر يقول ان المساردة اخذوا حقهم في هذه الهيه
ولم يبقى من عبيدة الا قبيلة آل الصقر وقبيلة بني شداد . ولعل الشاعر
يريد ان يشحذ همم عبيدة الآخرين للثأر من اعدائهم في ذلك الوقت.


اشكرك

[فارس قحطان]

السلام عليكم ورحمة الله وبركاته

مسيك الله بالخير اخوي الذويب

ابن عقيل اللي ذابحينه المسارده
واللي ذبحه كما تفضل اخوي حسين وقال انه ابن غنيم من المسارده

واما القصيده فقائلها الغربي من من آل العجي من الفهر
وليس واحد من آل شريم من آل عاطف

وقد كان الغربي في الاحساء وجاه واحد من نجد من القحاطين
وعطاه العلوم والا جيران الغربي دعاجين ،، ويوم سيرو عليه في العصر
نشدو الدعاجين الغربي ،، قالو وش العلوم الطرقي اللي عندك
قال لهم انشدوه وخذو العلوم منه ،، وقال لهم سالفة ذبجة ابن عقيل وان المسارده ذابحينه
وقامو الدعاجين من عند الغربي وهم زعلانين
وقال الغربي هذي القصيده :


حي الطروش وحي علم لفوبه=حتيش لو يزرون الدعاجين وش عاد
المشرك اللـي لابتـي غدوبــه =حطو حصاة العمـق من تحتــه وساد
يستاهل اللي حط دغمه *ركوبه = وامه تنوح وحرمته تلبس حداد
ماشافو منه الا بشته وثوبه = واخوه .....................

* الدغمه : فرس لـ آل العجي من الفهر

الشطر الأخير ليس عندي كامل
والقصيده قد تكون اطول من هذه

والهيه هذي صارت في العمق




هذا وفوق كل ذي علمٍ عِلم........


وبالله التوفيق

[أبا الذموم]

الأخ الذويب أررررررررررررررررررحب تراحيب المطر

اللي ذبح الشيخ الفارس ناصر بن عقيّل وهو من شيوخ الدعاجين هم المسارده اللي منهم ذبحه الفارس حزام بن غنيم ولمقتله قصة كان الناس مدينين وراحوا مع الاخوان يشاركون الملك عبد العزيز الفتوحات وذلك تقريباً مابين سنة 1333هـ ومابين سنة 1334هـ وجاء الاخوان لناصر بن عقيّل وقالوا له : [ ياناصر بن عقيّل ليه ما تديّن معنا يالاخوان وقال مانيب متديّن لين أغزي قحطان ] المهم حصل اللي حصل وذبحوه المسارده في العمق الموجود الآن بالرين
قال فيه الشاعر الغربي من الفهر يوم كان في الحسا وعنده ضيفان من الدعاجين وجاه واحدٍ من نجد وعلمه بذبحة ناصر بن عقيّل وقال الغربي :

حي الطروش وحي علم ٍ لفوبه ######### حتيش لو يزرون الدعاجين وش عاد .

المشرك اللي لا بتي غدوبه ######### حطوا حصاة العمق من تحته وساد .

تقبل تحيات أخوك أبا الذموم.

[عطيب الضرايب]

الاخ الذويب بعد التحيه

مع احترامي لمعرفتك في سالفة مقتل 00 الشيخ ابن اعقيل الدعاجين
فقد جانبك الصواب 00
والصحيح اللي قالوه الشباب لك دون تحديد 100/100
وسلامتكم جميع00

تقبل تحياتي

[مرعي بن دواس الحبابي]

الخنافر والمسارده كلهم عيال الشايب

والي ذبح ابن عقيل ابن غنيم المسردي حسب مانسمع من مجالس قحطان في كل ديرة

اخوكم

حبابي اصل وفصل

[الامبراطور]

السلام عليكم ورحمة الله وبركاته

اخوي الذويب لاهنت وابيض وجه

والربع يقولون انه عند الاد مسرد

والخنافر والمسارده اخوان وربع جعلهم يسلمون جميع

وللكل احترامي وتقديري

[محمد العرجي]

الأخ العزيز ابن عقيل عند المسارده وبتحديد ابن غنيم من ال شري من شيوخ وفرسان المسارده الله يرحم الجميع ابن عقيل وابن غنيم وجميع المسلمين

[علي بن شداد القحطاني]

نقول كما أسلف الكثير من الأخوة وخاصة فارس قحطان وأبالذموم أن ناصر بن عقيل لما قالوا له ليش ما تدين ياناصر فقال ماني بمدين لين أخذ آل المغرا يقصد إبل ابن غنيم ولما غار عليها وقتل غناء عايض الغربي آل العجي وكان كما ذكر قصير للدعاجين بالأحساء وقال حسب الرواية التي عندي ولها بقية :

حي الطروش وحي علم لفوبه=حتيش لو زعل الدعاجين ويشعاد
يانافدا اللي بضحى عيدوا به=حطوا صفاة العمق للمشرك أوساد

وشكرا لأخي صاحب الموضوع

[الحجاج الثقفي]

يازين الركاده والوقاعه ويستحسن ان اي كاتب ماينشر اي موضوع الا ناشدا عنه حتي تكون معلومته صحيحه والخنافر كفو كفو واكبر من ان ينسب لهم شيا ليس لهم وماخذينا حقهم ومزودينا عليه اما ذباح ابن عقيل فهو ابن غنيم من المسارده ومن ال مبارك خاصه واحفاده موجودين وليس من ال شري كما ذكر بعض الاخوان وكلهم عينان في راس ----ملاحظه مهمه المنتداء اصبح مصدر لتاريخنا الماضي والحاضر والمستقبل ان شاء الله لذا امل من الجميع كرما وليس امرا تحري الدقه في سرد بعض الاحداث حتي لايكون هناك لبس في هذا التاريخ المجيد

[خيال الزرقاء]

لاهنت يا الذويب
ولاهانوا الاخوان الذين صححوا معلومة قتل الدعجاني ابن عقيل.
شكرا للجميع

[ناصر السنحاني]

بسم الله الرحمن الرحيم
السلام عليكم ورحمة الله وبركاته



الله يعطيك العافيه
وتقبل مروري


اخوك
ناصر ابن لعور