قصة ابن قرمله القحطاني ابو اثنين السبيعي ابن وقيان الدوسري

[عادل علي الجرابيع]

من القصص الرائعه والسوالف التي سجلها الرواة لكثير من الفرسان
والتي تدل على الرفقه الطيبه
والكرم والشهامة النادرة
ثلاثه تخاووا شيوخ القبائل
ابن وقيان الغياثات الدوسري وابو ثنين الجمالين السبيعي وابن قرمله القحطاني
متوجهين للكويت
جو حول الدبدبه وشافوا بيت كبير لأحد كرماء القبائل وهو رجل مشهور
ويسمى ابن حجرف
دخلوا الرياجيل في المجلس وقام باستقبالهم المضيف وأوقد النار لعمل القهوه
لكنهم شاهدوه يدخل إلى البيت ويظهر وكأنه بطيء وممشاه ثقيل
والضيوف عندهم عجله وكما قيل: كلمة السوء مسموعه
فقال ابن قرمله وهو أصغرهم
والله أظن معزبنا ماعنده قهوه
سمعها المعزب وكأنه ماسمعها وقام يسوي القهوه وهي من النوع الاسود
ومعروف أن أهل نجد مايحبون القهوة السوداء يحبون القهوة الشقراء
المهم سوالهم 3 دلال وشربوها لأنهم على سفر
وبعد ذلك طلّع له دله خاصة من معاميله
وسوا له دله شقراء بالهيل والزعفران
وقام يتقهوى لحاله
وقااموا الطراقي يشوفون ذلك وحاولوا أنه يصب لهم
وكان ذلك له حكمه :
فقال ابن قرمله : يامعزبنا ماتصب لنا من هالقهوه الطيبه
فقال :القهوه هذي مايذوقها الا اللي يعد فعله
فقال ابن وقيان الدوسري : صبها للي يفك الطياح نهار الصياح
قال ونعم وصب له
وقال أبو ثنين السبيعي : صبها للي يجمعها لا تفرقت ويفرقها لا تجمعت
قال ونعم وصب له
فقال ابن قرمله : يامعزب الرحمن مايكفيني فعل أخوياي
قال والله ماتذوقها لين تعد فعلك
قال صبها للي يبوج له الطريق ويدمح زلات الرفيق
قال غثيتني أول وتالي :
يوم تقول أول : معزبنا ماهو مسوي لنا قهوه
وتقول تالي :تدمح زلات الرفيق
أتمنى إني دمحت زلتك
وقام وأكرمهم لأنهم كلهم شيوخ
وصارت معرفة طيبه .

[مسفر آل حيان]

سالفة عليها الكثير من الاستفهامات؟!
وش مصدرها..

[عادل علي الجرابيع]

شلون وش مصدرها

[عادل علي الجرابيع]

السالفه تحكي عن الخوه وتحكي عن حكمه وتحكي عن شهامه وشجاعه وكرم

[ابونايف العبيدي]

انت ساري ليل

اولا من ال قرمله
هل تقصد محمد بن هادي ام غيره
ثانيا سوالف تالي الليل مع الشيبان تظل سوالف يتوقف عندها النقل وتظل تحت الشك ليس عيبا في الشايب اللي رواها وانما لانها تظل مجهولة المصدر لا يعرف تسلسلها للجزم بصحة هذه الروايات من عدمه الا ما تواتر منها

[غلاب الحبابي]

الأخ عادل بن علي الجرابيع لاهنت وبيض الله وجهك على إراد هذه القصّة الطيبه المؤثقة في كثير من المصادر ولاعليها غبار معروفه وهي قديمه وتشتمل على الشيمه والكرم واختبار الفعايل الكفو بين هؤلاء الشيوخ النجوم الساطعة واشكرك

[عادل علي الجرابيع]

وجهك أبيض يا غلاب الحبابي ولا عليك زود طال عمرك ولا نجي ألا من بعدكم


الكفوو أعده ابن عمي وأخي @@@ واللي ما عنده حميا ما يخصه كلام

[ابونايف العبيدي]

ممكن تعطينا بعض المصادر اللي تم توثيق هذه القصة فيها يا اخ غلاب

[شلاش العاطفي]

صبها للي يفك الطياح نهار الصياح

صبها للي يجمعها لا تفرقت ويفرقها لا تجمعت

من غير قصور في اخوياه اللي معه ........ولكن هذا والله فعل ابن قررررررررررررررررملة ياعاااادل

[عادل علي الجرابيع]

يا جماعة الخير صلوا على النبي هذي سوالف يحكيبها التاريخ ويسولف بها في المجالس الرجال عند قحطان ولا غير قحطان والله لا لحقنا فيهم والله يرحمهم جميع ولكن سوالف يروونها اشيبان لنا وبنسبه لخوي اللي يسأل يقول هل هو محمد ابن هادي ابن قرمله يقال ابن قرمله عاد الامير محمد او من عايلة ال قرمله والله واعلم

[ابونايف العبيدي]

هذي مشكلة المنتديات في توثيق التاريخ
من الممكن ببساطه كتابة اي رواية والدفاع عنها لتصبح في المستقبل حقيقة يتم مهاجمة من يشكك بصحتها والامثله على ذلك لاتعد ولا تحصى
هذا اولا
اما ثانيا
فالقصة هذه ليست منقبة لمحمد بن هادي او غيره من ال قرمله ... فيها تسرع وزلة لسان كما ان فيها مدح للاخرين الذين معه حيث كانوا احكم من ابن قرمله فايرادها من الاساس ليس فيه من مدح او ايجابية الا تدارك الرجل لخطئه واعترافه به وان بطريقة غير مباشرة
القصة لي عليها تحفظات كما ان لي تحفظات على غيرها ولا يمنع هذا من ان يشكر مجهودك يا اخ عادل لكن التروي والتوثيق دائما افضل

[طالب علم 18]

تقبل تحياتي