المساعد الشخصي الرقمي

مشاهدة النسخة كاملة : فزعة الكفْو


هتاش
22-03-2014, 12:06 AM
سوّيت في وقتٍ مضى لي علاقات
أذخر بعضها وافتديها بعمري

ذخرٍ ذخرته في الظروف المهمّات
واللي مجرب فزعة الكفو يدري

تقوى مع ارجال الوفا والمروّات
اشبورها في المرجله مثل شَبْرِي

اخطي وتخطي والغلا ما بعد فات
واخذ بوجهي واتجمّل بعذري

الوقت لو ذوّب جبال السراوات
ما ذوّب اجبال المحبّه بصدري

لكن عماة العين بعض الصداقات
ما احدٍ عرفها في المخاليق كثري

اللي لها انفوسٍ ترود المذلّات
وشلون تقبل طاري الذلّ!! ما ادري

تقبل علي وقت الرضا والمسرّات
وان شان شاينها.. مع الناس تجري

واتغيب عنّي في نهار الملمّات
يا جعلها هي والملمّات نذري

الوقت علّمني وانا كلّي انصات
تعليم عالي.. لكن الدرس حصري

الوقت مشّاني على الدرب باسكات
واصبح يقوّيني مع العزم.. صبري

واصبحت اميّز كل حاسد وشمّات
واصبحت من بعض المخاليق حذري

تقطع بي اصروف الليالي مسافات
وامشي.. والقّي ريح الاقدار نحري

مكتوب والمكتوب ما منه منجات
لو كان من دونه ثمانين جَدْري

كذا كذا والناس راحت مقامات
احدٍ على القمّه واحدْ راح حدري

مانع الملاطي
22-03-2014, 10:13 AM
صح لسانك وبيض الله وجهك

دره من درر الشعر لاعدمناك


تحياتي وتقديري

هتاش
22-03-2014, 05:56 PM
صح بدنك لا عدمت راسك

مبآركـ،
27-03-2014, 01:06 PM
كفووو يا هتاش

وصح الله السانك وبيض الله وجهك...

تقديري وأحترآمي

هتاش
28-03-2014, 01:06 PM
فكوك الطيب يا مبارك وصح بدنك

حزام العجرشي
02-02-2015, 07:05 PM
صح الله لسانك

حسن الفاهمي
28-02-2015, 03:12 PM
صح الله لسانك

سعيد ال قداح الزهيري
09-06-2015, 01:44 PM
صح لسان الشاعر ,
دره من درر الشعر لاعدمناك ..