مدري خطى ولا غبى

[طارق الوادعي]

مدري خطى ولا غبى يوم سويت
بناملك مع القوافي مصيبه

ما تدري انك عالجزيلات طبيت
طبت مريض" ما يلاقى طبيبه

تعال سمع بيت وسمعك بيت
كم بيت فيها هاجسك ما يجيبه

حديتني عالرد واليوم رديت
واخو القوافي ما يخاف الغليبه

هي كذا الدنيا وحوش وعفاريت
والي ما يهتاب العرب ما تهيبه

لاجيت ترمي شعر مثل الدناميت
اياك تستامن لظاه ولهيبه

بعض الجهل يجعل من الحي كالميت
وبعض التفلسف له علوم وضريبه

تعال خذ يالي تماديت واعطيت
من دق باب الناس لازم تجيبه

اذا جهلت اسمي على حزتي جيت
واسمي لو انك تجهله ما يعيبه

الجزل ما يحتاج راعيه لصيت
ياكم نشدنا بيت نجهل صحيبه

والجزل ماهو بالمنى لا تمنيت
مثل السراب الي دروبه تعيبه

الجزل جنه في رباها تمشيت
وقطوفها من يد فكري قريبه

قطفت منها بس ما عمري اكليت
اهدي ثمرها للقلوب اللبيبه

حبيت ولا ياحبيبي ما حبيت
انا عيون الشعر وانا حبيبه

ربى معي مدري بحضنه تربيت
عريب ويحب الرجال العريبه