الشاعر سعد بن سعيد الزهيري في زواج سعودبن حويس الجرابيع

[حمد الظلافيع]

يالله إن تثبتنا على الحق وتعين
وتدلنا للخير وتجمِل الحال
وصلوا على المختار خير النبيين
اللي وصفه الله ب (طه) و (الأنفال)
وسلام تسليم يفوق الملايين
وعداد ما همل من المزن همال
*للي حضر من بعد واللي قريبين
في حفل شيخ للمسايير مدهال
جتني رسالة غالية ليل الاثنين
حي الرسالة وحي مندوب الإرسال
دعوة عزيزة من رجال عزيزين
أهل الوفا والطيب ذربين الأفعال
وقلت أتشرف واحضر الماقف الزين
واشاركك ياسعود ياطيب الفال
واقول لك مبروك وياحي ذي العين
مبروك ياللي تنضرب فيك الامثال
ياللي بذلت المال في العسر واللين
لما نويت الخير ما همك المال
تفزع لمحتاج وتعطي المساكين
ولك في الثقافة والمعاريف منهال
ومبروك لك قرب الرجال الوفيين
اللي لهم في موطن العز منزال
دعوى ال عادي من بني العم الادنين
تاج ومكان التاج بالراس ينشال
في ملتقاهم قبل ظني اسبوعين
شفت المحبة والغلى والتبهلال
الله يجمعهم على العز والدين
ويثمن جهود الوفيين الابطال
من ناسب الطيب تمتع بشيئين
الطيب والمعروف وابشر برجال
فارس اذا ما قيل ياهل الميادين
فزاع لي جات المهمات في الحال
يرسي وفعله في مواقيفه يبين
ما هو بغصن كلما ذعذعت مال
وياتي الولد يرجح بكل الموازين
راعي وفا ما بين جدان واخوال
ودي اوضح لو سمحتم لي امرين
وارجو العذر لي صار في الهرج طوال
الاول الدنيا اشغلتنا وناسين
انها حقيرة مالها وزن مثقال
دنيا العنى تعطي على الطاق طاقين
ومن طاوع الدنيا توريه الاهوال
دنيا تعاندنا وحنا عنيدين
قامت تجادلنا وصرنا هل جدال
اما نحايلها على شمال ويمين
ولا تحايلنا على يمين وشمال
ياباغي الدنيا وقِف على وين
ياجالس في الظل تراك رحال
خلها طريقك للسلامة وبعدين
تعرف مقامك لانتهت كل الامال
صحيح في الدنيا ملوك وسلاطين
واهم مافي الكون هي راحة البال
والثاني انه من بعد عام الالفين
بدا انطلاق التقنية والتبهذال
ومن عهد ذاك العام يالربع للحين
تظهر علينا التقنية عدة اشكال
واللي نزل بالصدر همه بهمين
ضاعت مجالسنا على شان جوال
لما اجتمعنا في المجالس وهاوين
للعود الازرق وبعده يدار بدلال
ويسولف الرجال والناس مصغين
وتاتي السوالف من سمينات وجزال
كل عل شاشته حلَق بالايدين
وجات الرسايل من قصيرات وطوال
وراحت طراة المجلس وكلش شين
هذا صحيح وكلمة الحق تنقال
تكفون ياهل المرجلة يالشياهين
عسى على تعديل ذا الوضع نحتال
لان المجالس للنشامى عناوين
ما نبغي المجلس يجي لعبة عيال
فيارب ياجامع قلوب المحبين
وادي حنيفة مبطي ما بعد سال
يالله بوسم يسقي الارض وتزين
وكل الشعاب تسيل من الجال للجال
وتنبت الاراضي بالنفل والرياحين
ويزين لون البر بسهول وجبال
في ظل ابو متعب عسى ايامه سنين
ويديم عزك ياوطن عبر الاجيال
وصلاة ربي عد ما قالوا آمين
على رسول الحق والصحب والآل

[مقيد العقرب وهي تشرب]

الأستاذ/ حمد تحية طيبة
أشكر لك نشر القصيدة التي القيت بمناسبة زواج الأستاذ سعود آل حويس .ويوجد ملاحظة حول الإسم /سعيد بن سعد وليس سعد بن سعيد . أكرر الشكر الجزيل وأتمنى أن نلتقي على خير .

[فهد حمد الحبابي]

لاهنت يالشاعر ولاهنت يامشرفنا الغالي

تقبل مروري