من شعراء قحطان | محمد بن فهاد بن حصيص آل روق

[علي بن شداد القحطاني]

شاعرنا محمد بن فهاد بن حصيص آل روق (والمعروف بابن حصيص) عاش فترة من حياته بين شقرا وعنيزه . وهذه القصيدة زوجت ساره المعنية في القصيدة ، وقد فاتها قصار الزواج لأسباب ستاـتي في الطبعة الثالثة من كتابنا الحنين والاشجان عند شعراء قبائل قحطان .


يقول ابن حصيص :
هيض بن حصيص في تالي نهاره
الف قاف من ضميـره مدلجاتـي

يانديبـي فـوق منبـوز الفقـاره
آركـى و حبـال كـوره كالفاتـي

آركـى يرعـى نواويـر القفـاره
ما علاه الشد من عشر سنواتـي

كن في عينه من الفرقـى شـراره
أو مخاليب الوحـوش الطايراتـي

جعل ضلع طويق يمحل هو وداره
جعل يمحل والوشـوم مربعاتـي

حيث ينزل عندنا مظعـون سـاره
واهتني بصويحبي عشر سنواتـي

ولعتني بالهـوى والحـب سـاره
ولعتنـي عـن غناديـر البناتـي

ماخبر جار ذبـح بالحـب جـاره
.بالمبيسـم والثنايـا المرهفاتـي

راس ساره ذيل شقرا وسط غـاره
والجدايـل بالرشـوش مجدلاتـي

والثنايـا قحويـان فـي زبــاره
علها الوسمي على حـد النباتـي

ريق ساره مثل شكر في غضـاره
أوحليب بكار عـرب مسمناتـي

والنهيد زبيدي فـي دعـب قـاره
في محير الماءالقراح مصلعاتـي

والمطوع لو يشوف خديد سـاره
ضيع المصحف وعجل بالصلاتـي

يا وجودي وجد مكسور الجبـاره
ساهرتسعيـن ليلـه مـا يباتـي

أو وجود اللي فضى الحاكم ديـاره
وخذ مالـه والحريـم مسلباتـي

عقب ما هو تاجر راعـي عمـاره
صار صعلـوك علومـه هيناتـي

لا يمي يعطى حنيش فـي خبـاره
سمها يشظى العظـام الصالباتـي

حالف مااسلى ولا انسى حب ساره
كود أهل شقراء يخلون الصلاتـي

لارمانـي لايميـن ولا يـسـاره
صوبنـي مـار بحـد المرهفاتـي

حطني لهل الهوى المجمول شاره
مثل نيشان المعاطيـب الرماتـي



وسلامتكم

[فارس قحطان]

لاهنت يابن شداد على هذا الموضوع

للشاعر بن بصيص

ومن قصيدته يتبين انه شاعر كبير

لكن حسب اطلاعي ماله الا هذه القصيده هي الموثقه

هل وجدت له عدة قصائد أخرى في صدور الرواة

وهل لديك سيرة عن الشاعر ؟؟

تحياتي

[الظور]

ارحب اخوي ابو ابراهيم

هذا رد لي سابق على احد الاخوان وقد اكون على صواب او نقيضه

وقد وعد ابن سلوم عبدالله بن حصيص اذا جاء زواج ساره على يده باعطائه الخواتين وهي نخلتين من اطيب نخل ابن سلوم راعي الوشم حيث ذهب لاحمد بن دعيج قاضي مرات وهل عليه القصيده فطمع ابن دعيج بساره وتزوجها وعندما وصل بيته كشف عن وجهها انفجع ووبخ ابن حصيص كيف تغشني قال ابن حصيص انا اعمى وانت بصير والشرهه على البصير

وقصه ابن حصيص طويله جدا كيف عاش وكيف تركوه اهله وهو عما عند ابن سلوم وكيف تزوج اخيرا بصنجا واين ذريته





ارحب اخوي فارس

القصيده لحياة عبدالله بن حصيَص رحمه الله وليست لــ محمد بن فهاد

والمقصود ساره بنت محمد بن سلوم من اهل الوشم

وقال القصيده قالها عند قاضي مرات في عهد الدوله السعوديه الاولى الشيخ احمد بن علي بن دعيج فتزوجها ابن دعيج بناء على وصف ابن حصيَص

والمطوع المقصود في القصيده هو نفسه ابن دعيج وابن دعيج قاضي وعالم دين وشاعر وينظم الشعر الفصيح

كل هؤلاء الاشخاص عاشو بين عام 1180 هـ وعام 1270 هـ

والقصيده معى تعديل بعض الغلطات كالاتي


هيّض ابن حصيَص تالي نهاره=والمثايل من ضميره مدرجاتي
يا وجودي وجد مكسور الجباره=ساهرٍ تسعين ليله ما يباتي
أو وجود اللي فضى الحاكم دياره=خذا ماله و الحريم مسلّباتي
عقب ماهو تاجرٍ راعي امـاره=صار عمال وأموره هيّناتي
كن في عينه من الفرقا شراره=أو مخاليب الوحوش الضارياتي
ارتحل ياحمود منبوز الفقاره=آرك وحبال كوره كالفاتي
آرك و مربعٍ عشب القراره=ما علاه الشد من عشر سنواتي
ديرة ابن دعيج ما فيها صقاره=غير شيبانٍ و عجز محندباتي
من خشوم كميت ليا حد الزباره=جعل تمحل و الوشوم مربعاتي
صاحبي بالوشم مدهاله و داره=ما نزل في ثرمدا و الا مراتي
ولعتني بالهوى و الحب ساره=وفطمتني عن غنادير البناتي
يا حسايف بنت ابن سلوّم ساره=عند أبوها تدّرج مثل المهاتي
ريق ساره مثل سكر في غضاره=أو حليب ابكار عربٍ مسمناتـي
و النهيد زبيديٍ في دعب قاره=في محير الما القراح مصلّعاتي
و الثنايا قحويانٍ في زباره=زاهيٍ نبته على كل النباتي
راس ساره ذيل شقراً وسط غاره=و الجدايل بالرشوش مجدّلاتي
المطوع لو يشوف خدود ساره=طبّق المصحف و سج من الصلاتي
ما ذكر جارٍ ذبح بالحب جاره=بالمبيسم و الثنايا المرهفاتي
لايمي جعله حنيشٍ في خباره=سمها يشظى العظام الصالباتي
حالفٍ ما اسلا ولا انسى حب ساره=كود أهل شقرا يخلون الصلاتي


اشكرك على اجتهادك

تقبل تحياتي


تقبل تحياتي

[علي بن شداد القحطاني]

مشرفين هذا المجلس شعراء ولهم رأيهم الذي نتوقعه دايما في كل لحظة وكل طرح ولكن هذا الرأي واصحابه في همله ! .

[مشخل الدله]

قصيده جزله من قلب هاوي
يعطيك العافيه يابن شداد