" الصقر ينفض غباره "

[عبدالعزيز الشاطري]

ياحرفي اللي فيه روس الكباريت=لا ناش بارود القهر شب ناره
فعله كما نسف الجبل بالدناميت=لا طارت طْيوره تميّز حراره
احيان يقدح نار من دون توقيت=والحين وقته حان يقدح شراره
لاخواننا في سوريا يغلي الزيت=لا دين فينا لا عرب لا نعاره
اخواننا تحت القهر والطواغيت=بالقتل والتشريد في كل حاره
اليا متى نبقى على لو وياليت=والحلّ تحت القصف ندرس قراره
الذلّ فينا يالعرب ما ترك بيت=والعزّ ناشه كسْر ماله جباره
صرنا سببهم ضحكةٍ للشماميت=في وضع ما يحسد على كل غاره
يوم الحديا بالظفر جالها صيت=والصقر ينفض فالجحاره غباره
والله مابكيهم بعد ماتخليت=عنهم .. وكلٍّ جنة الخلد داره
ابكي عربنا الدم بعروقهم ميت=محدٍ لهم مقبول منه اعتذاره
يالله يا ناصر ببابيلك البيت=عجّل على الشام الفرح بانتصاره