يابيه انا لكروش مأعطي ولا ابيع........قبلك طلبها فيصل (ن) وابن هادي

[ابراهيم آل بي حبيب الرفيدي]

السلام عليكم ورحمة الله وبركاته

محمد العلي الرشيد مثبت امارة الرشيد في حايل
كان عنده فرس اسمها كروش طلبها منه احد ولاة الترك
فأرسل له هذه القصيده يلومه في هذا الطلب ويقول قد طلبها من هو افضل منك
(فيصل وابن هادي )ولم اعطيهم ويقصد فيصل الدويش والشيخ محمد بن هادي بن قرملهi

يقول بن رشيد/




يابيه انا لكروش معطي ولا ابيع=قبلك طلبها فيصلن وابن هادي
يابيه لو كثرت بالهرج ماطيع=هل كيف تبغيني اسلم جوادي
ياشيخ مايرهم على مثلها البيع=ولا يجي مثله يقوده مهادي
ماجمع اصله بالقراطيس تجميع=اصله يعرفونه جميع البوادي
باغي الى من لقموا بالمصاريع=وصاح الصياح وثار عج الطرادي
هذاك بيعه والصبايا مفاريع=فوق السبايا والحنايا عوادي
انطح ورى ربعي وجيه المداريع= وفك عليها دينهم والعبادي
من لابة بالحرب ماهم مطاويع=ولا تحسب بالمداس العوادي
حلفت مايطري علينا بها البيع=للحشر ما يفخت سواده سوادي
يا بيه انا لاسمع كلامك ولا طيع=هرجك بمقلة ناظري والفوادي
مادام راسي للرياح الذعاذيع=بالعون طالبها من الناس غادي
صلوا على محمد اخير المشافيع= اللي لنا يشفع بيوم التنادي

[فارس قحطان]

السلام عليكم ورحمة الله وبركاته

لاهنت ياجلحاب الرفيدي

والقصيده اظن والله اعلم انها لعبيد ابن رشيد وليست لمحمد بن علي الرشيد

والقصيده فيها بيت ناقص وهو


ياسابقي مانرخصك بالمطاميع= حتى ولوقيل ارفعوا بالحدادي

والقصائد التي مثل هذه كثيره والتي يرفض صاحب الفرس بيعها او هدوها

كقول الشيخ محمد بن هادي للعبدلي حينما طلب منه جواده


يالعبدلي لا تكثر السوم بالغوج = لوكان طارينا الثمن كان بعناه

وقول ابن حشر لعباس باشه :

ياسابقي حبك مقيم على ساس = مولع في حبك القلب توليع
حلفت لو ساموك بفلوس عباس = اني شفيع فيك لا اصخي ولا ابيع


وقول الشيخ شالح بن هدلان هذه القصيده رداً على ابن سعود وابن رشيد
عندما طلبو منه العبيه وهي من خيل عتيبه عندما قلعه ابنه ذيب بن شالح :


ياسابقي كثرت علوم العرب فيك = علوم الملوك من أول ثم تالي
لانيب لا بايع ولاني بمهديك = وانا اللي استاهل هدو كل غالي

هذه بعض القصائد اردت بها فقط ان اشاركك في موضوعك هذا


وشكرا لك


.

[إبن الأروق]

لاهنت اخي جلحاب

ولكن انت نقلت القصيدة على علاتها ، والظاهر من منتدى المطران

اخي الكريم ابن رشيد يقصد فيصل بن تركي آل سعود ومحمد بن هادي بن قرمله



شكرا لك والرجاء التأكد من النقل مرة أخرى

[محمد الحياني]

لاهنت اخووووووووووووي


جلحـــــــــــــــــــــــــــــــاب


لاهنت يالغالي


الشكر موصول للغالي فارس قحطاااااااااااان


على الاضافة والايضاح

والشكر موصول للبقية

[المشبهاني]

نعم القصيده لعبيد العلي الرشيد وليست لمحمد العبدالله الرشيد ......

[الضويري]

لاهنت يالرفيدي ومثل ماقال اخوي ابن الاروق المقصود بفيصل هوا الامام فيصل بن تركي بن عبدالله رحمه الله وفيصل الدويش لم يعش في زمن ابن هادي ولكن الاخوه المطران هداهم الله يلزون انفسهم في كل عايره

[المشبهاني]

اخوي الضويري + ابن الاروق + فارس قحطان

لاهنتم على التوضيح ودمتم ...

وعندي اضافة :

1- طلب بن هادي للفرس ليس من باب طلب الهدية ... فقد ذكر احد المؤرخين بأن بن هادي اهدى ام الفرس للامام فيصل بن تركي ... وان للعرب عادة قديمة تتمثل في ان اول مولود لها يعطى لمن اهدى ...وهو بن هادي ... ولكن الامام فيصل اهداها لابن رشيد ...

فهل اهداها الامام فيصل لعبدالله بن رشيد وعبدالله اهداها لاخيه عبيد .. او كانت الهدية لعبيد مباشرة ؟؟؟ الله اعلم..

فهل هذه القصيده للقصة اللتي ذكرتها ؟ ام ان هناك قصيده اخرى ؟؟؟؟ ..الله اعلم

وعلى كل حال لاضرر من التحقق من القصة المذكورة من خلال ردودكم او ردود باقي الاخوة الاعضاء

2- فيصل الدويش ( اثـنـيـن ) مهوب واحد ... فيه فيصل اللي عايش الملك عبدالعزيز وفيه عمه او جده ... لست متأكد .... وقد يكون اسم اللي عايش الملك عبدالعزيز الكامل :

فيصل بن سلطان بن فيصل بن وطبان الدويش ... كما قلت لست متأكد من الاسم ...ولكني متأكد بان هناك اكثر من فيصل الدويش وكلهم تشيخوا قبيلة مطير ....

والعلم عند الله


------------------------------
اخوي جلحاب :

تسلم على الموضوع

[ابراهيم آل بي حبيب الرفيدي]

فارس قحطان لاهنت على المرور واضافتك شرف
وفعلا بعد التحقق القصيده لعبيد العلي الؤشيد


ابن الاروق،،،،،،،، الضويري
انا لم انقل القصيده من اي منتدي بل موجوده عندي ومن ضمن مقتنياتي

احب ان اكرر ان المقصود هو فيصل الدويش وليس فيصل بن تركي 0(كلام اكيد )

عبيد الرشيد من مواليد1220
وفي عام 1247مازال فيصل بن وطبان الدويش شيخ المطران

فتي الجوه ,,,,,,,,,,المشبهاني
مرووركم شرف ولاهنتو يالنشاما

[شيهان]

لاهنت على نقل القصيدة

[الضويري]

اخواني المشبهاني + جلحاب الرفيدي

بالنسبه للدوشان فلم يعرف منهم فيصل الا الهارف احد زعماء الاخوان اللذي عاصر الملك عبدالعزيز واللذين قبله لم يعرف احد منهم او شتهر احد منهم باسم فيصل رغم تكرار الاسم عندهم ومن غير المعقول ان يذكر او يقرن ابن رشيد محمد ابن هادي ابن قرمله بشخص اسمه فيصل ومغمور ومطرود من نجد وليس لديه اي دور في المنطقه ويطلب فرس من حاكم اعلى منه مقاما هذا اولا .

ثانيا هناك قصيده اخرى لبن رشيد موجهه شخصيا لبن هادي حينما طلب ابن هادي اول مولود للفرس وحسب الاصول
ويسمى عند البدو مثنوي حيث ابن هادي اهدا الفرس كروش للامام فيصل ابن تركي واشترط عندما تفلز الفرس يكون له اول انتاجها ولكن الامام اهدى الفرس بدوره الى عامله على حايل ابن رشيد يقول عبيد ابن رشيد من قصيدته الموجهه لابن هادي يقول فيها

جانا جوابك يالشجاع ابن هادي ............... تقول لي بكروش عندك مثاني
وكروش جتني من نحاز البوادي ................ عز العرب عند اختلاف الزماني
شيخ على غالي حلاله نفادي ................... وعطاه مابه يابن هادي مثاني

(على العموم ابن هادي كان يطلب حق له هوا من عاده العرب في اهداء الاصايل وبيعها) المصدر .

وعبيد له علاقه ما مع ابن هادي و تطرق الى ذكر ابن هادي في عده مواقع ومنها البيت المشهور

وازنت من الباري على السيف بسنوع .............. ماهو قصيد وردحته يابن هادي

ولا ادري على اي اساس يطلب فيصل الدويش المثاني اذا افترضنا ان هناك فيصل الدويش في ذالك العصر ولديه مكانه رفيعه تعادل حكم فيصل ابن تركي على الدوله او عبيد بن رشيد على جبل شمر او ابن هادي على نجد واذا اخذنا في عين الاعتبار اضمحلال دور مطير في المنطقه وخروجها من نجد وكذالك عاشت حرب اهليه داخليه ؟

[المشبهاني]

اخوي الضويري :

كفو والله يابن عاطف ..... وادري انك ذيب وتجيب التايهه ... خصوصا ً سالفة اهداء بن هادي للامام فيصل ...

بس خلك معي شوي :

1- انا ماجادلت في مسألة (من فيصل) الذي يعنيه عبيد بن رشيد ... ولايهمني وانا افداك من قريب او من بعيد من فيصل المقصود بكلام ابن رشيد ....

2- نعم وبكل تأكيد هناك فيصل الدويش امير مطير وهو جد فيصل الدويش الذي عايش الملك عبدالعزيز .... اما هل كان مشهورا ً ام نكرة ... فلن اخوض في هذا الموضوع .....

3- شكر جزيل لك يابن عاطف على توثيق القصة اللتي ذكرتها انا في ردي اعلاه عن اهداء سلطان نجد للامام واحقيته بما ياتي منها .... وشكرا ً لايراد الابيات لانني كنت ابحث عنها من امس .....

وفقط للمعلومية :

سبق وتحدثت انا عن الامام فيصل بن تركي في موضوع آخر عن مقتل الامير جمل بن لبده على يد المريخات واجارته لهم ...وقلت انا ..ومازلت اقول بأن الامام فيصل بن تركي ليس نبيا ً ولا رسولا ً مرسل ... له اخطاء .... خصوصا ً في التعامل في امور القبائل ....

فاجارته للمريخات رغما ً عن علمه بثأر قحطان كان خطيئه ....وارتدت عليه بعدم احترام قحطان لاجارته واخذهم بثأر الامير جمل بن لبده ....

وعدم تقيده بسلوم العرب من خلال هدية بن هادي له وتقديمها لابن رشيد هو خطأ آخر ....

يجب علينا ان لانقدس الاشخاص ... لفيصل بن تركي حسناته وله سيئاته ... وليس هو فقط ... انما هناك غيره ...ولقد ذكر الزركلي عن الملك عبدالعزيز قوله :

( لقد اخطأ عمي عبدالله بن فيصل بن تركي عندما اهمل معاملة امراء القبائل واوكلها الى من لايقدرهم فابتعدوا عنه عندما احتاجهم ضد خصومه) ....

وهذا يكفي بهذا الخصوص .......

----------------------------------------

ولكن لك يابن عاطف ولابن روق ...انتم ياوجيه آل محمد ... سؤال :

اذا كان الامام فيصل بن تركي هو من اهدى كروش لابن رشيد ... فكيف يطلبها منه بعد اهدائها ؟؟؟؟؟؟؟


والسلام ختام

والله جل جلاله اعلم

[إبن الأروق]

اخي المشبهاني

قصيدة ابن رشيد اللي يرد على ابن هادي يوم طلب مثنوي كروش غير قصيدته يوم طلب الباشا عباس كروش البنت ( بنت الحصان اللي شبا كروش المهداه من ابن هادي لفيصل بن تركي )

والشاهد ان ابن هادي لم يطلب من ابن رشيد الفرس التي اهداها لفيصل بن تركي ، بل طلب مثنويها وكذلك قد يكون فعل فيصل بن تركي

فالموضوع بقصيدتيه يدور على ثلاث شخصيات رئيسية هي ابن هادي وابن سعود وابن رشيد


والسلام عليكم

[المشبهاني]

اخوي : ابن الاروق

ما والله ودي اجادل في موضوع مثل هالموضوع لاني مثل ما قلت لاخوي الضويري ( مايهمني من فيصل المقصود بكلام ابن رشيد) ..... مع كل الاحترام والتقدير للاثنين ... الا انه مايهمني المقصود بالكلام لافيصل بن تركي ولا فيصل الدويش ....

ولكن ..... حنا هنا نسولف ... ناخذ ونعطي ... من اجل التوثيق ......

واقول لك ....

1- من كلامك تقول ان كروش ثنتين ... الام والبنت .... الفرس والمهرة يعني ... باسم واحد ... وان فيصل بن تركي طلب المثنوي لحقه فيها مثل ما كان لابن هادي نفس الحق ..... فهل يعقل ان ابن رشيد يرفض طلبا ً للامام فيصل الذي انتشله هو واخوه عبدالله من مرارة التشرد في الجوف وسكاكا وعينهم امراء على جبل شمر بعد ان طردهم منها آل علي ؟؟؟؟

اقول يمكن ... ليش لا .... طالما ان ابن رشيد وقف مع القوات المصرية - التركية ضد فيصل بن تركي عام 1254 هجري خلال الحملة المصرية الثانية واللتي انتهت بأستسلام الامام فيصل وترحيله الى مصر وسجنه 5 سنوات الى ان هرب وعاد الى الرياض .... اقول يمكن وليش لا .... وهذا في حالة ان كروش ثنتين .... وان المقصود منها في قصيدة عبيد الاولى هي المهرة وليست الفرس .......

2- اما ما يظهر للقاريء مبدئيا ً ... فهو ان كروش وحده ... فرس وحده ليس لها مهرة .....

فمن خلال القصيده الاولى :

يابيه انا لكروش ما اعطي ولا ابيع
قـبلـك طـلبـها فـيصل ٍ وبن هـادي

فالكلام هنا واضح ومحدد ..... هناك فرس طلبها الحاكم التركي ورفض عبيد ابن رشيد طلبه وذكر اسماء من طلبوها قبله ولم يعطهم ما طلبوه ....

ثم في القصيده الاخرى :

جانا جوابك يالشجاع بن هادي
تقـول لي بكروش عـندك مـثاني

هنا يظهر للقاريء مبدئيا ً ان المقصود هو مثنوي كروش ...... ولكن .....

شيخ ٍ على غالي حلاله نفادي
وعطاه مابه يابن هادي مثاني

هنا يختلف الوضع ......

فقد ربط ابن رشيد كروش بالعطا ..... وانه ليس هناك مثاني لها .... يعني ان سلطان نجد طلب كروش نفسها لانا هي المثنوي وليس بنتها .... ويتضح ذلك من قوله :

تقول لي بكروش عندك مثاني

المقصود هو ان سلطان نجد بن هادي يقول ما جاك يابن رشيد ليس لك .. بل هو لي لانه مثنوي ... وهذه هي سلوم العرب ... وابن رشيد يرد على هذه الحجه بقوله انه ليس من عطا ابن سعود مثاني ... فهو اعطاني ولم يعتبر لكونها مثنوي ....

عسى ما لخبطتك بهالشرح .... ولكن هي وجهة نظر لا اقل ولا اكثر .....

وسمعني صوتك ياوجه آل محمد ... رايك مفيد ... وعلومك زينه ..... نفيد ونستفيد منها ان شاء الله .... والمنتدى هذا ما صار ولا كان الا علشان مثل هالسوالف اللي تبيض الوجه قدام الناس كلها ....

واعيال الشايب لا اجتمعوا ... اجتمعوا على بياض الوجه ....

سمعني رايك وراي اخوي الضويري .... وراي اخواني الاعضاء .... ودي اشوف الصح عشان يسهل علي اتباعه ....

والسلام ختام

والله جل جلاله اعلم

لو سمحت اقرا التوقيع للاجر والفائده

[الضويري]

اخوي المشبهاني

كروش هوا اسم سلاله من الخيل وليست اسم الفرس مثل الكحيله و العبيه وغيرها من الاصايل وسالفه الفرس تدور حول المثنوي وليست الام .

ولي عوده

[إبن الأروق]

السلام عليكم

مرحبا مجددا

فيصل المذكور هو فيصل بن تركي

البيت الذي أورده الأخ الكريم الضويري موجه من ابن رشيد لابن هادي الشمري وليس لابن قرمله

والسلام عليكم

[بن لبده]

لا هنت والله يرحمنا وياه برحمته

الخيل عز للرجال وهيبه ولى يبيه التركى فيها حنا نبيه

[سليمان القحطاني]

شكراً لك اخي الكريم على هذا المشاركة

[الفرعينى]

مشكور جلحاب الرفيدى على هذا الموضوع

[علي بن شافع العنبسي]

الله ينور عليك ياجلحاب
عوايدك ياذيب المساري تاصل الهقوات=تجيب العشالاحال من دونه التفاق

شكراعلى المشاركه وننتظر الجديد

[باحث أنساب]

بسم الله الرحمن الرحيم

السلام عليكم ورحمة الله وبركاته

فيصل المذكور هو فيصل بن وطبان الدويش شيخ مطير، وابن هادي هو محمد بن هادي بن قرملة شيخ قحطان.

والدَّليل على ذلك قوله في بيت في وسط القصيدة يمدح فيها فيصل بن تركي:

الاّ ان بغاه الليث حنا مخاضيع = لامره وهو فوقه كما البدر بادي

وهذه هي القصيدة كاملة:

يابيه انا لكروش ماعطي ولا ابيع = قبلك طلبها فيصل وابن هادي

يابيه لو كثرت بالقول ماطيع = ياحيف تبيني اسلم جوادي

يابيه مايرهم على مثلها البيع = ولايجي مثله بقودة مهادي

ما جمّع اصله بالقراطيس تجميع = اصله يعرفونه جميع البوادي

باغٍ الا من لقّموها المصاريع = وصاح الصياح وثار عج الطرادي

انهج عليها وتعدى بالتراثيع = مثل الفحل لاصار وقت الهدادي

وأصلها لعيون بيض مفاريع = فوق الحنايا والسبايا غوادي

هذاك بيعه والصبايا مفاريع = بين القنا ومخفّرات الهنادي

هذاك بيعه كان ماتفهم البيع = لامنهن جلبن بسوق المزادي

يابيه انا ماسمع جوابك ولاطيع = هرجه بمقلة ناظري والفوادي

ياسابقي مانرخص بالمطاميع = حتم ولو قيل ارفعو بالجوادي

ابغي لاثار الدخن بالزعازيع = وحطو على عجلاتهنّ العدادي

بيومٍ يشيب من وحاه المراضيع = حدّين وحاديهن من الخوف غادي

انطح ورا ربعي وجيه المداريع = واقضي عليها دينهم والعيادي

وأنشد عن افعاله بعاد المفازيع = هو هرجنا ذا كذب ولا وكادي

من لابةٍ بالحرب ماهم مطاويع = ولا تحسّب بالمداس العوادي

حلفت مايطري علينا بها البيع = للحشر مايفخت سواده سوادي

مادام راسي للرياح الذعاذيع = بالعون طالبها من الناس غادي

وديارنا حامينها بالمرابيع = واضدادنا عنها تجي بالحيادي

الاّ ان بغاه الليث حنا مخاضيع = لامره وهو فوقه كما البدر بادي

هذاك انا وحذاي لامره مطاويع = فرز الوغى صياد من لايصادي

حرٍ يفدّع بابرق الريش تفديع = ولا يفرس الا من كبار الثنادي

طير السعد يفرح قلوب المراضيع = تشتاق له معها وهو بالمهادي

يدرا وترجى من وراه المنافيع = الليث يرجى للعطايا الزيادي

أودع مصاعيب القبايل مراجيع = والخيل جاته من عمانٍ تقادي

وصلّوا عد ماحيش مال وما بيع = على نبيّ للورا خير هادي

[حمود الحمالي]

بسم الله الرحمن الرحيم

السلام عليكم ورحمة الله وبركاته

فيصل المذكور هو فيصل بن وطبان الدويش شيخ مطير، وابن هادي هو محمد بن هادي بن قرملة شيخ قحطان.

والدَّليل على ذلك قوله في بيت في وسط القصيدة يمدح فيها فيصل بن تركي:

الاّ ان بغاه الليث حنا مخاضيع = لامره وهو فوقه كما البدر بادي

وهذه هي القصيدة كاملة:

يابيه انا لكروش ماعطي ولا ابيع = قبلك طلبها فيصل وابن هادي

يابيه لو كثرت بالقول ماطيع = ياحيف تبيني اسلم جوادي

يابيه مايرهم على مثلها البيع = ولايجي مثله بقودة مهادي

ما جمّع اصله بالقراطيس تجميع = اصله يعرفونه جميع البوادي

باغٍ الا من لقّموها المصاريع = وصاح الصياح وثار عج الطرادي

انهج عليها وتعدى بالتراثيع = مثل الفحل لاصار وقت الهدادي

وأصلها لعيون بيض مفاريع = فوق الحنايا والسبايا غوادي

هذاك بيعه والصبايا مفاريع = بين القنا ومخفّرات الهنادي

هذاك بيعه كان ماتفهم البيع = لامنهن جلبن بسوق المزادي

يابيه انا ماسمع جوابك ولاطيع = هرجه بمقلة ناظري والفوادي

ياسابقي مانرخص بالمطاميع = حتم ولو قيل ارفعو بالجوادي

ابغي لاثار الدخن بالزعازيع = وحطو على عجلاتهنّ العدادي

بيومٍ يشيب من وحاه المراضيع = حدّين وحاديهن من الخوف غادي

انطح ورا ربعي وجيه المداريع = واقضي عليها دينهم والعيادي

وأنشد عن افعاله بعاد المفازيع = هو هرجنا ذا كذب ولا وكادي

من لابةٍ بالحرب ماهم مطاويع = ولا تحسّب بالمداس العوادي

حلفت مايطري علينا بها البيع = للحشر مايفخت سواده سوادي

مادام راسي للرياح الذعاذيع = بالعون طالبها من الناس غادي

وديارنا حامينها بالمرابيع = واضدادنا عنها تجي بالحيادي

الاّ ان بغاه الليث حنا مخاضيع = لامره وهو فوقه كما البدر بادي

هذاك انا وحذاي لامره مطاويع = فرز الوغى صياد من لايصادي

حرٍ يفدّع بابرق الريش تفديع = ولا يفرس الا من كبار الثنادي

طير السعد يفرح قلوب المراضيع = تشتاق له معها وهو بالمهادي

يدرا وترجى من وراه المنافيع = الليث يرجى للعطايا الزيادي

أودع مصاعيب القبايل مراجيع = والخيل جاته من عمانٍ تقادي

وصلّوا عد ماحيش مال وما بيع = على نبيّ للورا خير هادي


ولاكن لم نسمع بذكر فيصل الا فيصل زعيم الاخوان على عهد الملك عبدالعزيز

[فايز البقعاوي]

حوار يعتبر نموذجا عاليا بالاخلاق وحسن التحاور وحفظ المنطق


وهو شي نادر فعلا لاننا نرى المتخالفين يجرح بعضهم البعض في بعض المنتديات وكأنك اصبحت عدوا له لمجرد


خلافك معه00 اما هنا فالوضع يختلف حوار ومنطق واحترام وخلق فلله دركم من رجال يتشرف من تحاور معكم ودخل


منتداكم لانه سيتعرف على اشخاص يرفعون الراس يستفيد منهم ومن حوارهم ويخرج مرفوع الراس محفوظ الكرامه


كما دخل فتقبلوا كل الاحترام والتقدير يارجال قحطان00 ودخولا معكم في هذا الحوار المفيد:


اولا-

قول ابن رشيد (ماهي قصيد وردحتك يابن هادي) فهو هنا لايقصد الشيخ ابن قرمله كما يعتقد البعض وانما يقصد


(ابوهادي) وليس (ابن هادي) وابوهادي هو الشخص الذي ارسله اهل القصيم لاغتيال عبدالله بن رشيد وانكشف امره


لانه كان في حفل مع (العرضه) وكان يقترب من ابن رشيد شيئا فشيئا وهو يتضاهر بالرقص ففطن له ابن سبهان


وعندما قبضوا عليه وجدوا معه خنجرا مسموما واعترف بمهمته وهو المقصود بقول ابن رشيد لاهل القصيم:


ويوم انهم عجزوا عني بالغياله000 شبوا لنار الحرب بالقيظ صوال


وهو المقصود عندما قال ابن رشيد:


لي ديرتن مابه حذا البرد والجوع000 لولاي عفيته بضرب الهنادي

حميتها عن كل دوار مطموع000 وحي(ن) نصبحهم وحي نهادي

القلب مصموعن وبالكف قاطوع000 ماهي حكايا رقصتك يابوهادي


فهذا نطق البيت الصحيح وفيه (رقصتك يابوهادي) الشخص الذي ارسل لاغتياله لكي لايظن البعض ان الكلام هذا


موجه للشيخ ابن قرمله بهذا الاسلوب الاستفزازي وهو شي من الصعب حدوثه للعلاقه الجيده بين شمر وقحطان


دائما كما تعلمون000


واما بالنسبه لفيصل 000 فكماتعلمون ان ابن رشيد كان في زمانه حاكما قويا للكثير من اجزاء نجد ولن يطلب منه


مثل هذا الطلب الا شخص طالب حق مثل ابن هادي او اقوى منه وصاحب سلطان مثل البيه او ابن سعود مثلا0


اما الدويش وهو شيخ ومن قبيله لها ثقلها وقيمتها لكن بأي صفه يطلب الفرس ؟؟؟


لاتوجد بينهم علاقه صداقه ولاهو صاحب حكم قوي جدا في نجد وانما هو مثل غيره من شيوخ القبائل ولاهو صاحب


حق مثل ابن هادي فمن الصعب الجزم انه الدويش الا اذا علمنا ماهو المبرر لهذا الطلب000


وعبدالله بن رشيد لم يقف ابدا مع الاتراك ضد فيصل ابن تركي وانما في عام 1254 هجريه وعندما قدمت حملة الاتراك


اقتربوا من حايل لدخولها فتفاوض معهم ابن رشيد فاشترطوا عليه مقابل عدم دخول حائل ستمائه بعير وكان ابن رشيد


في بداية امارته ولا يوجد لها قوه مثل ماحدث بعد ذلك فخرج ابن رشيد لجمع الابل واتى عنزه وكانت اخذت من شمر


مناطق بيضاء نثيل وماحولها اثناء حروبهم معها فاتفقوا مع ابن رشيد ان يدفعوا جميل الابل مقابل معاهده مع البقاء


في اراضيهم اللي اخذوها من شمر وفعلا حدث0 وكان هو سبب عدم مطالبة التمياط من شمر بالارض اللي كانت له00


وعندما انطلق من السجن الامام فيصل عام 1259 هجريه نزل حائل وارسل معه ابن رشيد رجال بصحبته للرياض فقبض


على خالد بن ثنيان اميرها للاتراك وعندما عتب الامام على اللي خانوه في قصيدته المشهوره لم يذكر ابن رشيد وانما


قال الامام فيصل: بشر هل العارض ترى حظهم باق000 وحميرهم حالت عليها المقادير


مابين حصانن ومابين تفاق00 راحوا فواتن بين ذيك الدعاثير


ناروا مع الصفره نشيفين الارياق000 ولا لقوا عن نقمة الله مصادير


وحصل تواصل بينه وبين ابن رشيد وبعد وفاته وعلى وقت ابنه طلال الرشيد زار الامام فيصل حائل عام 1268 هجريه0


مجرد سطور متواضعه ربما تفيد البعض وتقبلوا تحياتي000

[خيال الزرقاء]

لا هنت متألق دائما وموضوع جميل لك مني التقدير

[الضويري]

مرحبا فيك اخوي فايز

ونشكر لك اطراءك

واتفق مع ماكتبته مع ملاحظه ان ابو هادي

اسطوره شكك في صحتها مصدر معروف

وعلاقه شيخ قحطان محمد ابن هادي مع ابن رشيد

يشوبها الغموض الشديد فصحيح انه لم يحدث احتكاك

ولكن لم تكن وديه وانا اتحدث عنهما فقط كأصحاب نفوذ

على العموم فيصل الدويش لم يكن في نجد بل في حمايه حضر

القصيم وقت القيظ ومرباعهم في مهد الذهب او اراضي قبائل اخرى

بعد تعليق العاني