يمناه بالخير مذكورة و مجروبه .. و من العطايا ما تعطِ الا جلايلها

[هداج تيما]

السلام عليكم ورحمة الله وبركاته




.
.




هذه القصيدة قالها الشاعر سعد بن عبدالله العليمي العايذي القحطاني
في الصديق والأخ العزيز الشيخ/ عبدالعزيز بن عبدالرحمن بن أحمد الداعج العايذي القحطاني -المستشار الشرعي بوزارة الداخلية-..





للبال طاري وللتفكير مسحوبه = وللكلمة الصادقة معنا يمثلها
يتعب عليها وسيع العرف باسلوبه = حتى ليا قالها كل يجللها
والكلمة اللي من اصل العرف مصبوبه = ما هيب تهدى على ناس تقللها
يسمابها عن ردي العرف ودروبه = اللي ليا طافت الكلمة يحللها
يسمي بها من يثمّن حرف مكتوبه = واليا اكتمل عقد معناها وكملها
تهدى على اللي خذا بالعرف ماجوبه = رجل يقدر معانيها وقايلها
يعرف حقايق سمان الهرج و ضروبه = واكيال الاقوال ميزانه يكيلها
رجل له ركاب خلق الله مشعوبه = منصى كبار العرب هي وزحايلها
رجل ليا كبرت القالات نادوبه = وقفة جنابه تعدل ميل مايلها
رجل هقاوية فوق المزن و نصوبه = ماكل رجل يبي ياصل مواصلها
هذاك شيخ به الامثال مضروبه = عبدالعزيز المدايح له جزايلها
شيخ بنا سمعته طوبه على طوبه = ما يرفع الناس فوق إلا فعايلها
شيخ مقر الكرم واصله و منصوبه = شيخ دواوينه لضيفه مسبلها
المرجله طبعه و زاده و مشروبه = سجيه فيه خلقه ما تمثلها
يمناه بالخير مذكورة و مجروبه = و من العطايا ما تعط الا جلايلها
سمعة جنابه بذكر الطيب مصحوبه = طابت فعوله و قولة نعم حصلها
و ابوه قبله و جده طابت دروبه = على الحجاجي نفع ربعه و جملها
عليه الافواج مثل الحج و شعوبه = من كل خلق الله و مجمل قبايلها
يالداعج الطيب قمة جال مهيوبه = ما كل من هو تهقواها بطايلها
إلا انت تهوى الصعيب وتلتفت صوبه = طوعتها لين دانت لك منازلها
و انا لو بيوت شعري فيك مسكوبه = ما عبرت عن مشاعر صدر قايلها
خذ ما بدالي وللميقاف ماجوبه = تستاهل المدح يا موفي مكايلها
وأقبل سلامي وذا قولي ومكتوبه = يا مزبن الكايدة لا عال عايلها.



وسلامتكم ..

[أبوسعد الصقري]

يستاهل الشيخ المدح