المساعد الشخصي الرقمي

مشاهدة النسخة كاملة : " الشعب في غلاف الكتاب "


عبدالعزيز الشاطري
19-12-2011, 06:59 PM
ندري انك بخير ان كان حنا بخير=دام معدنك صافي واطهر من السحاب

مانت راضي يصيب الشعب كبر الشعير=والشكوك ابعد من الشمس وقت الغياب

يا حبيب البلد والشعب والمستجير=يا زعيم العروبة يا مهين الصعاب

كل قولٍ تقوله فالمحافل يصير=كلمة الحق منك السيف قص الرقاب

في زمانٍ يشوف الخافيات الضرير=والرجولة عمت والحر تحت الغراب

والثعالب تلف اذيالها فوق طير=والذيابة سرت وتهاب نبح الكلاب

جاتك علوم عنا من وكيل ووزير=صورة الشعب حلوة في غلاف الكتاب

لكن الشعب فيه وفيه والوضع غير=لو تجيك العلوم مبروزة فالخطاب

زينوا لك صورنا مستشار وخبير=في رحاب الوزارة مجلس الزور خاب

خاربين الطبايع بايعين الضمير=خاينين الامانة آمنين العقاب

بين ( تمسك وانا اقطع ) فيه تاجر خشير=يرفع السعر مستامن بحضرة جناب

يسهرون الليالي كالرحى المستدير=واصبح الشعب منهم بين ضرسٍ وناب

والحقيقة صورنا نار حول الغدير=بين حرق وغرق جسر السلامة سراب

لو شكى الفقر عرعر جاوبت له عسير=والحسا قبل جدة تشتكيه استجاب

كلنا بين مديون الغلا والفقير=نطلب حقوقنا لو صار معها عتاب

مارضينا المذلة من كبير وصغير=عزة النفس سدّت للعطا كل باب

والله انا مرضنا فالزمان العسير=مارضينا عليك خلاف وقت المصاب

ما نمنّه ولكن جابه امرٍ خطير=في وطنا انحرمنا وْغيرنا بلا حساب

والوطن لو علينا قلّ حقه كبير=لو على نهضته ناطى على راس داب

دون أرضه نجي فاليسر قبل النذير=عند رهن الاشارة بين شيب وشباب

والخطر لو يجي لا قدر الله نصير=كل روحٍ على حدّ الوطن ما تهاب

المنايا لها مابين ورد وصدير=والوصية على دين الكفن والثياب

الظور
19-12-2011, 08:09 PM
ارحب ياالشاطري ارحب

هكذا يكون النصح وهكذا تفضح سماسره قوت الشعوب

هناك تغيَب واضح لكبار الدوله لتحسس شئون مواطنيهم

وهناك عزل واضح بيننا وبين حكامنا فرضوه الوزراء ومعاونيهم

اشكرك

غشام ال مهدي
20-12-2011, 05:59 PM
صح السانك على هاذي القصيده الجميله0
مع تمنياتي لك بالتوفيق