المساعد الشخصي الرقمي

مشاهدة النسخة كاملة : حنا الشدادين من روس القحاطيني


مروي الرمح
11-08-2011, 11:46 PM
بسم الله الرحمن الرحيم


هذه القصيدة للشاعر / عبدالله بن سفر بن حديّد الشدّادي يرحمه الله


وهو من قوم الأمير الفارس شرار بن مهرس أمير قبائل الشدادين الذي يعود نسبهم للفهر من بني شداد عبيدة قحطان وهم اليوم في تعداد بني الحارث




ما عاد أدلّ الطريق اللي يوديني = واللي من الله بنومن به ونرضى به
أونّ والناس بالعمران لاهيني = أحد يغني و أحد خلاّقه أدرا به
نارٍ تجدد على كبدي تصاليني = و إليا انطفت جاء جديد يشعب ركابه
يالله ياللي خلقت الناس من طيني = تجيرنا من عذاب القبر وحسابه
طار ٍ طرا لي وأنا اللي فيّ كافيني = خلا دموعي على الخدين سكّابه
ذكرت صوت الحويّر والبعاريني = وذكرت طرش ٍ تداحم فوق مشرابه
وذكرت قطعان بدو ٍ في المعاطيني = وذكرت حاض ٍ تدفق منه مغرابه
وذكرت خلفٍ تحّلب في الموازيني = حليبها ما يجيه خلاف شرّابه
وذكرت ربعي طحاطيح الشداديني = خيّالهم لو يشوف الموت ما هابه
لقيتهم من شمال العد وايميني = في رأس حزم ٍ تهب الريح بترابه
فعول ربعي تورخ في المياديني = لا صاح صيّاح جاء للخيل ركّابه
على مهار ٍ شقر مثل الشياهيني = واليا اعتزوا كلٍ خذا السيف بنصابه
فعولهم شيبت روس الرضيعيني = يومٍ كلٍ معه شلفا ومشعابه
كم شيخ قوم قسمه الرمح قسميني = وكم شيخ قوم تعشت رأسه ذيابه
اهل البلاجيك لا نادوا المناديني = والله مايخطي الرمّاي مضرابه
من مات جعله شهيد مع الشهيديني = والحي سعد الرفيق إليا تعزوا به
حنا الشدادين من روس القحاطيني = وأميرنا لا بدانا الريع يبدا به
معروف عند القريّب والبعيديني = والبيت للي يباه بدون بوابه
قلت الحقيقة على اللي شافته عيني = وأفواه شيّابنا ما هي بكذابه
اختامها الورد الأحمر والرياحيني = والعود الازرق على الذربين يمشى به
وصلاة ربي على اللي وحد الديني = نبينا اللي هدانا واقتدينا به

الظور
12-08-2011, 05:09 PM
ارحب ارحب ياشدادي

والنعم فيك في ربعك الشدادين وبني شداد كلهم

ابيض وجه على ايراد قضيده عبالله بن حديَد رحمه الله

وله اخو اعبر منه في الشعر اسمه بسيس بن سفر ودي اسئلك عنه

هل هو باقي حي

تقبل ودي وترحيبي

المهلهل
13-08-2011, 04:45 PM
لاهنت على التوضيح

مروي الرمح
17-08-2011, 07:45 AM
ارحب ارحب ياشدادي

والنعم فيك في ربعك الشدادين وبني شداد كلهم

ابيض وجه على ايراد قضيده عبالله بن حديَد رحمه الله

وله اخو اعبر منه في الشعر اسمه بسيس بن سفر ودي اسئلك عنه

هل هو باقي حي

تقبل ودي وترحيبي

ما عليك زود يا صبي قحطان ووجهك الأبيض طال عمرك

وبالنسبة لسؤالك عن الشاعر بسيس بن سفر بن حديّد فقد توفي رحمه الله

وأبناء الفارس سفر بن حديّد جميعهم شعراء بسيس وسعد وهباس وعبدالله رحمهم الله جميعاً واشتهروا بقوة الشعر وجزالته ووالدهم الفارس سفر بن حديّد رحمه الله كان شاعراً مفوهاً ومن فرسان الشدادين وابطالهم وهو القائل في إحدى المناسبات مفتخراً بقبيلته

أرس يا عد ٍ هله نزّلوا فوقه = قرّروا مشروبه الاد شدادي
لو ترد برقا عتيبة مع الروقه = ما يغيّض جمها كل ورّادي
شاهد الموتان تحته ومن فوقه = عزوتي في الحرب شعوان الأولادي
عزوتي نو ٍ تنافض به بروقه = أوله برق ٍ وتاليه رعادي
مثل سيل ٍ ينهب الطلح بعروقه = قام يرميبه على الضلع والوادي
الجبل نبديه ونعدّي اوسوقه = لين راعي الدين يخلص ويزدادي
في نهار ٍ غالي ٍ ينهبط سوقه = كل يوم ٍ فيه صيّاح ومنادي

ويقول الفارس سفر بن حديّد رحمه الله يمتدح الأمير الفارس شرار بن مهرس رحمه الله وابناءه المشهورين بعزوتهم ( أخوان سارة ) وكان ذلك في بدايات ظهور السيارات في المملكة

روّح الموتر وجاين له كراره = واستوى المرواح والشاعر يغني
يالأمير اللي ركب وسط الغماره = الركايب قدهن لا يكبعني
العشاء نبغاه عند أخوان سارة = والرجال أهل الشكاله ما تمني


ومن قصائد الشاعر سعد بن سفر بن حديد رحمه الله قوله متغزلاً

ألا يالله اجعل وايتي ما يجيه اخلاف = علشان كل البدو في القيض يردونه
ويسقي لطيف الروح جالي ثمان رهاف = أنا خادم ٍ له والعرب ما يخدمونه
وهي بنت شيخ ٍ في اللقاء يحتمي الميقاف = ليا هوّن المركي هل الخيل ينخونه


ومن قصائد الشاعر بسيس بن سفر بن حديد رحمه الله في البل


البل عطايا الله طوال النسانيس = حليبها احلى من حليب البقاله
خلف ٍ ليا جن والشمايل معابيس = محلى حليب الخلفه ام الشماله
لا جن يبن مراحهنه مشاميس = تبا المراح وحظ من هي حلاله
لا شافها الغافل تعوذ من ابليس = ازمالة ٍ يا حيها من زماله
حليبها احلى من حليب القراطيس = ماله طعم مثل الشعير النخاله
هذا لبن علبة وهذا لبن كيس = ولا ينعرف صافي اللبن من حثالة
لبن صناعي ماله أم ٍ ولا ديس = وان زل تاريخه نطل في الزباله
نعمة وسميته حليب الدنافيس = يكفيك شرابه ليا شفت حاله
وقلبي ليا دقت عليه الهواجيس = مر ٍ مع العالم ومر ٍ لحاله
ما عاد اشوف النجر هو والمحاميس = واشوف بعض الناس بيّع دلاله
وخلا العوض ثلاجة ٍ مالها قيس = وحاله مع اهل الكيف يا خس حاله
هذا زمان ٍ بذ ابن علي وبسيس = ورمابهم بين الرشاء والمحاله
رمابهم وأخذ عليهم مراويس = وش ذا الزمان اللي سريع ارتحاله
تكفى يا اخو تركي بعيد المراميس = محماس بن سودان عطه الرساله
وقله كفاك الله شر المناحيس = وتراك عني قايم ٍ بالوكاله


ومن قصائد الشاعر عبدالله بن سفر بن حديد رحمه الله قائلاً في رثاء الشيخ فواز بن زياد بن مهرس رحمه الله

اجروح قلبي قامت اليوم تزداد = واليا برت جدت جروحٍ جديده
ياكبدي اللي عافت الشرب والزاد = قامت تداهمها همومٍ عديده
مرحوم ياشيخٍ من الاد شداد = لا والله الا راح منا فقيده
يعوضنا فيك الصبر يابن زياد = وتعوضك الجنه هو اللي تريده
محشوم عن درب الخطاء والتنقاد = محشوم ياراعي الصفات الحميده
الوجه ينور كنه الصبح لا انقاد = ونصايحه للي يبيها مفيده
عنيد ابو فاهد ليا جات لعناد = وان قلت الجمه ذراعه عضيده
حرٍ ولد حرٍ على كف صياد = يبا العشى من صيده اللي يصيده
ان جيت برثي فعلهم ماله اعداد = ولا ودي اكثر بيوت القصيده
الله يصبر لابس حجاب واحداد = سنةٍ محمد ساسنا والعقيده
الموت حق ولا على الارض مقعاد = اللي خلقنا الله وحنا عبيده
وصلاة ربي عد مادن رعاد = على النبي عدة حروف الجريده


وهذه احدى قصائد الشاعر بسيس بن حديد رحمه الله والتي قالها امام أمير منطقة مكة المكرمة عندما ضعف بصره


سـلام يـا أميـر الوجيـه المسافيـر = اقولهـا يـا أميـر ســر وعـلانـي


سـلام ٍ احلـى مـن حليـب الاباكيـر = مرباعهـا العبـلـه ووادي المحـانـي


اما استمع بشرحلـك الوضـع ياميـر = ولا خـذ المكتـوب والعمـر فـانـي


ياعيـن حـر مـا يصيـد العصافيـر = مايـذبـح الا طيـبـات السـمـانـي


يامير انا اطلب لي فحـوص وتقاريـر = ولو لا رجايـه فيـك ماجيـت عانـي


لا طالـب ٍ منحـه ولا ابغـى دنانيـر = الا العلاج عـن العمـى يـوم جانـي


الشـوف راح وعكـر الجـو يامـيـر = واهـل الفلـوس علاجهـم ماشفـانـي


يامير انـا جالـي صـدوف ومقاديـر = وازريت امشّـي مابقـى مـن زمانـي


يامير ابا الممشى مـع النـاس = واسيـر لكن ضعف الشـوف عنهـم حدانـي


يامير عقب الشـوف عفـت المساييـر = ماعـاد ادانـي مجلـس مـع خوانـي


ويامير فـي عينـي سـواة المساميـر = ماغمضـت مـن ليلهـا لـو ثـوانـي


وياميـر فيّـه مـا تجـوز المعـاذيـر = تحسـنـوا يافاعـلـيـن الحـسـانـي


اعمالكـم لله وانـتـم هــل الخـيـر = ياعيـال اخـو نـوره طـوال اليمانـي


عبدالعزيـز اللـي يعسـف الطوابيـر = عسـى مقـره فـي فسيـح الجنانـي


ياما شعـا مـن كـل ملـح ومغاتيـر = علـى ذلـول ام الحقـب والبطـانـي


مشى على عوص النضى صبح وعصير = مـن الريـاض اليـا حـدود اليمانـي


اخذ شهر يمشي ليا قـوز ابـا العيـر = واخـذ ليـا جـازان عشـر وثمانـي


واليوم عقب الجيـش سفـن وطياييـر = وارتـاح خيـال الفـرس والحصانـي


سرب يجـن مـن الخضيـرا محاديـر = ماقـادهـا مجـنـون ولا جـبـانـي


مـا فوقهـا غيـر العيـال المناعـيـر = اللـي يصيبـون الهـدف والمكـانـي


ومن عـاش بالدنيـا يشـوف التفاكيـر = اللي من اول تحـت هـالارض بانـي


وصـلاة ربـي عـد ماغـرد الطيـر = علـى محمـد قلتهـا مــن لسـانـي

مروي الرمح
18-08-2011, 09:12 PM
لاهنت على التوضيح

شكرا على المرور

عبدالعزيز الحمداني الفهري
19-08-2011, 03:30 AM
ونعم ببني عمنا الشداااادين معروووفين بظفرهم وكرمهم

والله انكم تنومسونا بعلومكم الزينة وسوالفكم

تحياتي لك

اخوك عبدالعزيز ابن محمد الفهري

عبدالمحسن مبارك
28-08-2011, 11:51 PM
واللة غريبة قحطان فيهم راس وذيل ---- انا اللى اعرفة انا قحطان كلها روووووووووووووس

فعلا عنوان غريب

أبو عقاب البشري
03-09-2011, 04:59 PM
ومليون نعم يالشدادين

لاهنت يابن العم

ابن قناد
21-09-2011, 01:25 PM
والله ومليون ونعم بكم يا بني شداد

أحمد آل مدهش
15-03-2012, 01:06 AM
والله ونعم يا عبيدة

بيض الله وجيه الشعار ووجهك

مبارك بن حاضر
15-03-2012, 04:35 PM
الله اكبررر

قصيدة شوشت راسي

ابياتها جززززله

كفووووو يالشدادين

عزالله ما كذب

الله يرحمه و يسكنه الجنه


لاهنت يا مروي الرمح